Read Fulfulded Hikma 4 Bible Online

Hikma 4 - Fulfulded bible

Hikma 4

¹Ndikka huuwgo mbooɗeeŋga dow margo ɓikkoy! Waɗanɓe mbooɗeeŋga ɓe ciftorteeɓe haa foroy, ngam Allah e yimɓe ɗon ngerdi kuuɗe maɓɓe.

²Wakkati ngeendam maɓɓe, ɓe ɗon nyemmbita ɓe, to ɓe maayi, ɓe ɗon miccito. Haa alaahira, ɓe ɗon kifni hufnoore jaalorgal ngam ɓe njaali haɓre laaɓnde.

³Ammaa ɓikkoy yedduɓe Allah, koy nafataa sam no koy ɗuuɗiri fuu. Koy nanndi bee leɗɗe kalluɗe ɗe ɗaɗi mum'en luggaay, ɗe maraay semmbe.

⁴Koo to ɗe mari lice wakkati seɗɗa, ɗe tabitittaa. Henndu dimmban ɗe, to ndu wifi bee semmbe, ndu ɗoofan ɗe.

⁵Lice maaje kecce ngewaama. Ɓenndalooje maaje, to ɗe ɓenndaay, ɗe nyaamataake, ɗe nafataa boo, walaa ko ɗe nafataa.

⁶Nyannde darŋgal, ɓikkoy njaaluhoy ceedanto aybe saaro'en muuɗum'en.

⁷Adiliijo kam, koo to o maayi nder nderkaaku, o heɓan siwtaaru.

⁸Nayeewu waddan hormu, ammaa naa ɗum nayeewu malla ɗuuɗgo duuɓi hokkata goɗɗo neɗɗaaku.

⁹Saman hikma neɗɗo fotan bee dandanndi, joonde laaɓnde fotan bee nayeewu.

¹⁰Nonnon ɓe ngi'no ɓooyma gorko mo Allah yerdi yahdu mum, yiɗi ɗum. Nde o ɗon jooɗi caka halluɓe, Allah sottini mo.

¹¹O itti mo ngam taa halleende maɓɓe raaɓa numooji maako malla boo ngam taa ƴoyre maɓɓe sarga mo.

¹²Sakkomaa ngam yiide halleende haɗan laargo mbooɗeeŋga, fitina suuno majjinan koo adiliijo.

¹³Gorko go nder duuɓi seɗɗa laati timmididɗo bana keɓɗo juutal balɗe.

¹⁴Allah yerdi joonde maako, ngam maajum o yaawi wurtingo mo diga duniyaaru hallundu. Yimɓe ndaari, ammaa ɓe paamaay ngam ɓe ngiɗaa faamgo huunde woore:

¹⁵Yerduye e barkaaji Allah ɗon ngondi bee suɓaaɓe maako. Allah ɗon hakkilana hooliiɓe mo.

¹⁶Adiliijo, koo to o maayi, kuuɗe maako hiitoto yeeɗɓe yawiiɓe Allah. Sukaajo timmididɗo hiitoto nayeeɓe halluɓe.

¹⁷Yimɓe ɗon ndaara no hikmaajo maayrata, ammaa ɓe paamataa anniyaaji Jawmiraawo dow maako e ngam ɗume o jo'ini mo nder salaaman.

¹⁸Ɓe ɗon ndaara ɗum, ɓe ɗon njawo ɗum, ammaa kamɓe Allah jancata.

¹⁹To ɓe maayi, yimɓe teddintaa waade maɓɓe. Haa nder joonde maayɓe boo, ɓe cemtan haa foroy. Allah ittan ɓe haa ɓe ngoni, o sakkinan ɓe, hoore aartata meemgo lesdi, ɓe keɓataa koo wolwugo. Nde baawɗe maɓɓe pat timmidi, ɓe nastan nder bone, walaa mo siftorta ɓe.

²⁰Yaake Allah ƴamtata ɓe aybeeji maɓɓe, ɓe ɓadito bee kulol, aybeeji maɓɓe ummoto ngam aybingo ɓe.