Read Fulfulded Hikma 5 Bible Online

Hikma 5 - Fulfulded bible

Hikma 5

¹Nden adiliijo daroto bee dartaare yeeso yarnuɓe mo bone e jancuɓe mo daliila kuuɗe maako.

²Nde ɓe ndaarata mo ɓe kultoran kultoreeŋgol caatuŋgol, ɓe kayɗinan ngam ɓe tammaakino o hisan.

³Ɓe mboyan, ɓernde maɓɓe ta'an, ɓe miccititto daakaareeku maɓɓe e ɓe mbi'mbi'tiran:

⁴“Ɗum gorko mo njaleten ɓooyma, kaŋko en njawino. En bilki'en meere! En tammino joonde maako ɗum bilkaare e maayde maako walaa daraja.

⁵Jonta kam, o jo'inaama caka ɓiɓɓe Allah, o hawtani tedduŋgal malaa'ika'en!

⁶Nii kam, ɗum enen ɓen majji laawol gooŋga. Adilaaku yaynaay ngeendam meeɗen bee jayŋgol mum, naaŋge fuɗaay ngam meeɗen!

⁷En njiɓake nder tuufnorgol halleende naawnde, en ngaanci haa harde hamaadaare haa laabi ngalaa, ammaa en tokkaaki laawol ngol Jawmiraawo diidi.

⁸Ɗume mawnitaare meeɗen nafi en? Ɗume jawdi ndi en mantori nafi en?

⁹Ɗum fuu ɗum majji bana ɗowdi, bana habaruwol gejjitaaŋgol law.

¹⁰To koommbowal ta'i ƴuuge ndiyam maayo, seɗɗa nii ɓe tawataa diidi haa ngal saali, ngal accataa maandorde dow ndiyam.

¹¹To sonndu ɗon fiira haa dow, en keɓtataa laawol gal ndu tokki. Bee dimmbugo bileeji maaru, ndu ɗon faɗɗa henndu, ndu ɗon ta'a ndu bee semmbe, ndu ɗon maɓɓita laawol yeeso maaru, ammaa ɓaawo man walaa ko hollata en ndu saali ton.

¹²To kurol fiɗaama, henndu ngol seeki ɗon maɓɓo law, bana nii en ndaarataa laawol haa ngol tokki.

¹³Bana nii enen boo, en ndanyaama hannde, jaŋngo en majji, en accaay alaama kuuɗe meeɗen booɗɗe sam, nganyaandi wartiri en meere.”

¹⁴Ooho, tammunde yimɓe yedduɓe Allah nanndi bee kuɗi ɗi henndu ruuynata malla bana mallimallooje pamare ɗe waabiliire yoosnata. Tammunde maajum ɗon saaya bana cuurka nder henndu, nde ɗon yejjite bana baɗoowo jahaaŋgal siftorta jemmaare haa o weerino.

¹⁵Ammaa adili'en ɗon ngeeɗa haa foroy. Jawmiraawo ɗon hokka ɓe mbarjaari, Allah Baawɗo ɗon hakkilana ɓe.

¹⁶Bee juŋngo maako ɓe keɓata hufneere marnde daraja, hollannde laamu. Ngam juŋngo maako hisnan ɓe, juŋngo maako semmbiɗŋgo aynan ɓe.

¹⁷Tiinaare maako laatanto mo balmi haa konu fuu, tagle maako laatoto balmi partananɗi mo konne'en.

¹⁸Bana sulke, o ɓornoto adilaaku. Bana hufneere njamndi, o hifnoto kiita ndarnuka.

¹⁹O hoocan senaare maako bana ndarganaawal cemmbiɗŋgal.

²⁰Ɓernuki maako caatuki laatoto bana kaafahi belki. Duniyaaru fuu wallan mo haɓugo bee faataaɓe.

²¹Bana kuri piɗaaɗi cir bee lagaawal aaftaaŋgal, ma'e ngurtoto nder duule ɗe ndillan haa ɗe kaandi yahgo.

²²Mallimallooje coldan bee semmbe bana kaa'e piɗaaɗe bee piwlol. Ƴuuge ndiyam ukkanto yedduɓe Allah, maaje ilnan ɓe bilaa enɗam.

²³Henndu saatundu ummoto dow maɓɓe, dilliran ɓe bana henndu semmbiɗndu. Lesdi fuu wartan bana ladde hamaadaare ngam daliila aybe halluɓe, koromwal laamiiɓe yibbinte ngam daliila kuuɗe maɓɓe kalluɗe.