Read Fulfulded Hikma 6 Bible Online

Hikma 6 - Fulfulded bible

Hikma 6

¹Keɗite, onon laamiiɓe, kakkile! Njaɓe ɓe njaŋngina on, onon marɓe laamu dow duniyaaru.

²Maɓɓite noppi mon, onon laamaniiɓe mooɓgal yimɓe, on ɗon mantoro ummaatooje ɗuuɗɗe ɗe on leestini!

³Paame, ɗum Jawmiraawo, Allah Baawɗo hokki laamu e sumsum, o laaran kuuɗe mon, o hakkilanan anniyaaji mon.

⁴Nde on ɗon nder tedduŋgal laamu ngu Allah hokki on, on kiitoraaki bee adilaaku, on ƴaɓɓi umrooje, on kuuwaay fodde muuyo maako.

⁵Kanjum waɗi o naŋngiran on bee caatuɗum e jaawɗum boo, ngam yimɓe ardiiɓe ndeenan kiita caatuka.

⁶Bee enɗam ɓe njaafoto yimɓe tampuɓe, ammaa ɓe linyan kuuɗe yimɓe tedduɓe bee tiinaare.

⁷Jawmiraawo hulataa koo moy, walaa maŋngu estanŋgu mo. O tagi riskuɓe e laafuɓe, ɓe fuu o suklani ɓe kal-kal,

⁸ammaa o linyan riskuɓe bilaa enɗam.

⁹Onon laamiiɓe, onon mbolwananmi, ngam haa keɓon hikma, taa eeron.

¹⁰Ɗowtaniiɓe umrooje ceniiɗe laatoto seniiɓe. Jaɓanɓe jaŋngineego keɓan hujja nyannde darŋgal.

¹¹Nden kam keɗite jaŋngirde am bee tiinaare, ngele tefgo nde, on laatoto annduɓe.

¹²Hikma ɗon jalbita, jayŋgol maaka halkataa. Yiɗɓe ka keɓan ka koyɗum. Tefanɓe ka keɓan ka.

¹³Hikma ɗon fotta bee yiɗɓe ka.

¹⁴Koo moy dawi ngam fottugo bee maaka somataa, o tawan ka, ka ɗon jooɗi haa dammugal maako.

¹⁵Yiɗgo ka jamum ɗum margo faamu, hiirananɗo ka senndiran bee cakle.

¹⁶Kaŋka ɗaɓɓititta marɓe haaje maaka. Ka waŋganan ɓe bee mbooɗeeŋga dow laawol maɓɓe. Ka waŋganan ɓe nder numooji maɓɓe fuu.

¹⁷Fuɗɗam hikma ɗum yiɗgo jaŋngineego diga maaka.

¹⁸Suklanaago jaŋngirde maaka ɗum yiɗgo ka, yiɗgo hikma ɗum ɗowtanaago umrooje maaka, huuwtinirgo umrooje ɗe'e, ɗum tabitingo ngeendam nduumiiɗam.

¹⁹Ngeendam nduumiiɗam ɓadinan goɗɗo bee Allah.

²⁰Nii kam yiide hikma mawninan goɗɗo haa o laamo.

²¹Nden kam onon laamiiɓe jama'aaje, to on ngiɗi koromwal laamu mon e laamu, teddine hikma, on laamoto haa foroy.

²²Ammaa ɗume woni hikma? Toy iwde maaka? Mi yiɗi fiistango on ɗum bilaa suuɗgo koo ɗume. Mi loroto haa fuɗɗam maaka, mi laɓɓinan ko haani anndugo dow maaka, mi sottataa e gooŋga.

²³Mi maraay haaje suuɗgo on koo ɗume ngam am, ngam irin numo ngo'o yahdataa bee hikma.

²⁴Ndikkana duniyaaru to marɓe hikma ɗuuɗɗi, laamiiɗo kakkilɗo yiɗanan yimɓe mum hayru.

²⁵Nii kam acce mi jaŋngina on bee boliiɗe am, nden on naftoran ɗum.