Read Fulfulded Hikma 7 Bible Online

Hikma 7 - Fulfulded bible

Hikma 7

¹Min boo mi maayan bana yimɓe fuu. Min boo mi iwi diga neɗɗo arano tagraaɗo bee loope. Mi tagraaɗo bee aawdi gorko nder belɗum yiide. Nder reedu daada am ɓanndu am tafaama, lebbi joweenayi ƴiiƴam daada am mawnini yam.

³Wakkati ɓe ndanyi yam, mi yotti haa lesdi njaɓɓotoondi en fuu kal-kal. Mi foofi henndu ndu poofeten en fuu, bana ɓikkoy ndanyeteekoy fuu mi teɗki bee bojji.

⁴Ɓe caawi yam bee limce, ɓe cuklani yam.

⁵Nii yimɓe fuu puɗɗiri ngeendam muuɗum'en, koo laamiiɓe boo.

⁶Enen fuu en nastiri duniyaaru bee laawol gootol, non ngurtortooɗen boo.

⁷Mi tori Allah, faamu warani yam. Mi tori mo, ruuhu Hikma wari nder am.

⁸Mi hiiti hikma man, mi tawi ka ɓuran koromwal laamu bee laamu man fuu teddugo. Jawdi laati huunde meere haa gite am, to mi fotni ɗum bee maaka.

⁹Luuluuri ɓurdanndi wooɗgo maraay saman maaka. Kommbi maaka, kaŋŋeeri duniyaaru fuu laatoto lesdi meere, ceede boo bana loope meere.

¹⁰Mi yiɗi hikma ko ɓuri njamu e ŋarol. Mi yeli hikma dow annoora ngam jayŋgol maaka nyifataa.

¹¹Bee hikma, jawle fuu ngarani yam, ka ɗon jogino nder juuɗe maaka jawle ɗuuɗɗe ɗe limataake.

¹²Mi seyori jawle man ngam hikma waddani yam ɗe. Ammaa mi anndaano tawon kaŋka woni daada maaje.

¹³Ko mi ekkiti e maaka bee ɓernde laaɓnde, mi ɗon wi'a ɗum yimɓe bilaa suuɗgo koo ɗume. Mi suuɗataa risku maaka.

¹⁴Ngam hikma ɗum risku ngu timmataa haa yimɓe. Keɓɓe risku man laati soobiraaɓe Allah: Alaama anndal wartiri ɓe yerdeteeɓe yeeso maako.

¹⁵Allah hokkam baawal wolwugo boliiɗe darnuɗe e margo numooji fodde dokke ɗe o hokkimmi. Kaŋko woni ɗowanɗo hikma e kaŋko woni jo'itinanɗo marɓe hikma dow laawol darnuŋgol.

¹⁶Laamu maako ɗon jogi en, enen bee boliiɗe meeɗen e hakkiilo meeɗen e ko mbaawɗen waɗgo fuu.

¹⁷Kaŋko hokki yam anndugo ko woni nder duniyaaru bee gooŋga. O ekkitini yam no duniyaaru wa'i e ko woni nder maaru.

¹⁸Fuɗɗam, caka e ragare wakkatiiji, egguki naaŋge, sannjugo fasluuji,

¹⁹waylitaago kitaale e joonde koode,

²⁰no tagdi dabbaaji wa'i e no dabbaaji ladde mba'i, baawɗe ruuhuuji e numooji yimɓe, asli leɗɗe e kurgun iwɗum diga ɗaɗi maaje.

²¹Mi anndi baŋguɗum e cuuɗiiɗum, ngam hikma mooɓti ɗum fuu, jaŋngini yam ɗum boo!

²²Hikma mari yoŋki kakkilki e ceniiki. Yoŋki man ki gooti, ammaa ki huuwan bee laabi ɗuuɗɗi. Ki ɗelemki, dimmbotooki, nastanki, bilaa aybe e laaɓki. Kaŋki, kalluɗum heɓataa ki, ki soobri bee mbooɗeeŋga bee hakkiilo.

²³Walaa ko he'i naŋngugo ki, ki ɗon waŋgina mbooɗeeŋga, ki soobri bee neɗɗo. Ki tabitki, ki de'uki, ki waawan koo ɗume, yiitere maaki ɗon dow koo ɗume, ki nastan nder yoŋkiiji kakkilɗi e laaɓɗi no ɗi ɗelmiri fuu.

²⁴Hikma ɓuran koo ɗume fuu jaawal. Daliila laaɓeeŋga maaka, ka nastan koo toy e ka saaloto nder toy fuu.

²⁵Ngam hikma ɗum poofɗe baawɗe Allah, ɗum fuu iwi haa tedduŋgal Allah Baawɗo, kanjum waɗi walaa no coɓe nasta ka.

²⁶Kaŋka woni mbeelu annoora nduumiika, daarorgal laaɓŋgal ngal kuugal Allah e suura mbooɗeeŋga maako.

²⁷Ka ɗon feere maaka, ammaa ka waawan koo ɗume fuu. Ka sannjataako sam, ammaa ka hesɗitinan kuuje fuu. Yidere haa yidere ka ɗon nasta nder yimɓe marɓe yoŋki ceniiki haa ka laatina ɓe soobiraaɓe Allah e annabi'en.

²⁸Ngam Allah yiɗi yiɗɓe wondugo bee maaka.

²⁹Hikma ɓuran jayŋgol naaŋge e koode yaynugo. To en poondi ka bee jayŋgol nyalawma ka ɓuran ngol piw.

³⁰Nonnon, nyalawmaare ɗon waɗana jemma babal, ammaa halleende jaalataako hikma.