Read Fulfulded Hikma 8 Bible Online

Hikma 8 - Fulfulded bible

Hikma 8

¹Hikma ɗon forto bee semmbe haa alkibilaaji duniyaaru fuu, ka ɗon ɗowa koo ɗume bee laawol ɓurŋgol wooɗugo.

²Hikma ngiɗmi, kaŋka tefmi diga nderkaaku am. Mi yiɗi ŋarol maaka, mi yelake wartirgo ka kore am.

³Ka ɗon waŋgina laaɓɗum iwde maaka teddunde, ngam ka ɗon wondi bee Allah, Jawmu koo ɗume fuu yiɗi ka.

⁴Allah anndini ka annde mum cuuɗiiɗe e ka umra mo ko o huuwata.

⁵Fakat, haa duniyaaru ndu'u, jawdi ɗum huunde yeleteende, ammaa jawdi ndiye ɓurata hikma kiɓɓinanka haajeeji fuu?

⁶Fakat, hakkiilo nafan ammaa hikma ɓurataa ɗum nafgo na? Ka waŋginan anndal maaka dow koo ɗume fuu.

⁷On ngiɗi adilaaku na? Nden kam, hikma waɗata inɗe fuu, ka ɗon ekkitina naŋgtaare, senndindirgo booɗɗum e kalluɗum, adilaaku e cuusal. Haa ngeendam walaa ko ɓurata ka nafgo haa yimɓe.

⁸On ngiɗi naftoraago kirseeku juutŋgu na? Nden kam, hikma anndi ko saali e ko warata yeeso, ka anndi fassitirgo boliiɗe caɗɗe e fiistugo sirriiji. Ka anndi alaamaaji kayɗiniiɗi e kaayeefiiji non boo tokkindirki wakkatiiji nder taariha duniyaaru boo.

⁹Ngam maajum mi haɓɓi anniya hoo'ugo hikma bana kore am, mi anndino fakat ka hokkatam sawariiji booɗɗi, ka wallatam saalaago wakkatiiji torra malla boo suno.

¹⁰Mi numi nder ɓernde am: “Ngam daliila maaka, mi wartan anndaaɗo caka yimɓe, marɓe duuɓi teddintam koo to mi derkeejo tawon.

¹¹To mi hiiti, ɓe annditan anndal am, koo laamiiɓe kayɗinan daliila am.

¹²To mi jeeɗake, ɓe ndeenan, to mi fuɗɗiti wolwugo, ɓe keɗititto yam bee hakkiilo. To boliiɗe am njuuti, ɓe njeeɗoto siriw, ɓe njo'inan juŋngo dow hunnduko maɓɓe.

¹³Barka hikma, mi laatoto duumiiɗo, mi accanan waranɓe ɓaawo am ciftorki duumiiki.

¹⁴Mi laamanto jama'aaje, ummaatooje leestanto yam.

¹⁵Laamiiɓe saatuɓe kultoran to ɓe nani innde am. Mi hollan mbooɗeeŋga am haa jama'aare am e cuusal am waŋgan haa konu.

¹⁶To mi huuci, mi siwtoto baŋnge hikma, ngam kommbi maaka walaa miccitaaki, walaa suno, ammaa ka hokkan seyo e hayru.”

¹⁷Nde mi numi dow man fuu, mi faami nder ɓernde am no yendugo bee hikma tabitinan ngeendam nduumiiɗam,

¹⁸no soobiraaku bee maaka ɗum seeɓoore hayru e kuuɗe maaka ɗon hokka risku ngu timmataa. Mi faami kadi boo goɗɗo heɓan hakkiilo bee gondal bee maaka e daraja bee sarwootirgo bee maaka. Ngam daliila man mi yehino tefgo ka ngam haa mi te'ra bee maaka.

¹⁹Mi laatinooɗo ɓiɗɗo kakkilɗo, mi keɓnooɗo yoŋki booɗki,

²⁰ɓaade nde mi booɗɗono mi nastini nder ɓanndu ndu walaa aybe.

²¹Ammaa mi faamino mi heɓataa hikma sey to Allah hokkino yam ka — e anndugo diga moy dokkal hikma iwata ɗum margo hakkiilo. — Kanjum mi huuciti gal Jawmiraawo ngam mi toro mo, mi wi'i mo bee ɓernde am fuu: