Read Fulfulded Hikma 9 Bible Online

Hikma 9 - Fulfulded bible

Hikma 9

¹Allah kaakiraaɓe am, Jawmiraawo keewɗo enɗam! A tagri koo ɗume fuu bee wolde maaɗa,

²bee hikma maaɗa a tagri neɗɗo ngam o laamano tagle ma fuu,

³ngam o laamano duniyaaru bee senaare e adilaaku e o hiitoro kiita ngooŋɗuka.

⁴Hokkam hikma ngonka kommbi ma, dow koromwal ma, taa wurtinam nder limgal ɓikkoy maaɗa.

⁵Mi jagganiiɗo ma ɓii korɗo ma. Mi tampuɗo, ramma-ngeendamjo, mi waawataa faamgo kiitaaji e umrooje ma.

⁶Koo to neɗɗo laati timmididɗo, walaa mo faalataa mo sam to o walaa hikma iwka diga maaɗa.

⁷Yaa Jawmiraawo, an suɓi yam dow luttuɓe bana laamiiɗo jama'aare ma, bana kiitoowo ɓiɓɓe ma worɓe e rewɓe.

⁸A umri yam mi maha haykaliiru dow hooseere seniinde, hirsirde haa berniwol haa ngonɗa, fodde misaalu suudu laymaaru senaandu ndu a taaskitinino diga fuɗɗam.

⁹Hikma ɗon daro baŋnge maaɗa, ka anndi ko a waɗi fuu, ka ɗonno yaake a tagi duniyaaru. Ka anndi ko a yerdi, ko woni darnuɗum e ko yahdata bee umrooje maaɗa.

¹⁰Jippin ka diga asama, saare ma seniinde, nuldanam ka diga koromwal ma tedduŋgal, ngam haa gondal maaka bee am wallammi nder kuuɗe am e ka waŋginanammi muuyo ma.

¹¹Ka anndi e ka faami koo ɗume fuu, ka ɗowatam ngam mi huuwa koo ɗume bee hakkiilo. Bee annoora maaka marka tedduŋgal, ka hisnatam e aybe.

¹²Bana nii a yerdoto kuuɗe am, yaa Jawmiraawo, mi laamanto jama'aare ma bee adilaaku, mi laatoto ke'iiɗo jooɗaago dow koromwal baaba am.

¹³Neɗɗo moy heɓtata anniyaaji ma, yaa Allah? Moy waawata faamgo muuyo ma, yaa Jawmiraawo?

¹⁴Numooji ɓiɓɓe Aadama ɗi pamari, numooji amin laaɓaay.

¹⁵Ɓanndu amin nyolanndu ɗon teddina nafsu amin e paɓaawal nga'al ɗon teddana ruuhu amin bee numooji ɗuuɗɗi.

¹⁶Daker min ɗon paama ko woni nder duniyaaru, daker min ɗon keɓta ko min mbaɗata. Moy wallata min heɓtugo ko woni nder asama?

¹⁷Noy goɗɗo anndirta muuyo ma to a hokkaay mo hikma e a nuldanay mo ruuhu ma ceniiɗo diga dow?

¹⁸Bana nii yimɓe wonɓe nder duniyaaru njo'itinaama dow laawol darnuŋgol e nii non boo ɓe anndiri ko ngerduɗa e no hikma hisniri ɓe.