Read Fulfulded Sirasid 1 Bible Online

Sirasid 1 - Fulfulded bible

Sirasid 1

¹Sirri Hikma Hikma fuu gal Jawmiraawo iwata, ka ɗon wondi bee maako haa foroy.

²Moy waawata limgo baade ndiyam, gawe njaareendi daande maayo malla nyalɗe duumiiɗe?

³Moy waawata heɓugo toweeŋga duule, njaajirka lesdi malla luggeeŋga maayo maŋngo?

⁴Hikma aarti koo ɗume fuu tageego, faamu timmididŋgu ɗonno diga foroy.

⁵Seeɓoore hikma woni wolde Allah mo asamanji, laabi maaka ɗum umrooje duumiiɗe.

⁶Moy heɓti iwde maaka? Moy anndi sirriiji maaka?

⁷Haa moy anndal hikma waŋgi? Kirseeku maaka maŋngu, moy faamata ngu?

⁸Gooto tan mari hikma, o kulniiɗo masin. Ɗum Jawmiraawo, jooɗiiɗo dow koromwal laamu mum.

⁹Kaŋko tagi hikma, o laari ka, o foondi ka e o waanji ka dow ko o tagi fuu.

¹⁰O hokki ka ɓiɓɓe Aadama fuu, o ɓesdani ka yiɗɓe mo. Yiide Jawmiraawo, ɗum hikma ke'iika teddineego, o hokkan ka hulɓe mo. Hulgo Jawmiraawo

¹¹Teddingo Jawmiraawo, ɗum huunde marnde daraja nde goɗɗo mantorto. Ɗum heɓnan seyo fantuŋgo.

¹²Kulol Jawmiraawo seynan ɓernde, hokkan seyo fantuŋgo e juutal balɗe. Kulol Allah ɗum dokkal Jawmiraawo, ngol yahran dow laabi yiide.

¹³Ɗowtaniiɓe Jawmiraawo, ɗume fuu yahanan ɓe booɗɗum. Haa timmoode balɗe maɓɓe, ɓe barkiɗinaaɓe.

¹⁴Kulol Jawmiraawo woni fuɗɗam hikma. Ngam nuɗɗinɓe, hikma ɗon fuɗɗa diga nder reedu daada maɓɓe.

¹⁵Hikma man waɗi suudu mum haa ɓiɓɓe Aadama, ruutu maɓɓe tammorto ka.

¹⁶Kulol Jawmiraawo, ɗum hikma timmididka e keewka. Ka ɗon hokka ɓenndalooje maaka ɗuuɗɗe haa yimɓe.

¹⁷Ka hebbinan saare maɓɓe bee ko ɓe cuuni e beembe maɓɓe keewiran bee ko ka hokki ɓe.

¹⁸Kulol Jawmiraawo, ɗum meetaleewol hikma. Ka finnan hayru e njamu. Ɗiɗi fuu ɗum dokkal Allah ngam hayru maɓɓe. Bumnaare yiɗɓe mo yaajan.

¹⁹Hikma waanjan dabareeji faamugo kuuje fuu, ka ɗon ɓaŋgta daraja jogiiɓe ka.

²⁰Kulol Jawmiraawo woni ɗaɗol hikma. Lice maaka ngoni juutal balɗe.

²¹Kulol Allah ittan hakkeeji, tiiniiɗo duncan tikkere fuu. Laataago munyɗo e naŋgtiiɗo

²²En potaay yerdaago tikkere dow fewre, ngam goɗɗo ɓernuɗo ɗon dow diirtorde halkannde mo.

²³Goɗɗo munyɗo ɗon de'o bana no haani, nden haa ragare o heɓan seyo. Kulol Allah ɗum dokkal Jawmiraawo, ngol yahran dow laabi yiide.

²⁴O anndi sirwaago bana no haani. Yimɓe fuu mbi'an o ɗon bee hakkiilo. Ngam ɓaditaago Allah

²⁵Caka riskuuji hikma woodi balndi keewɗi anndal, ammaa kulol Allah nyiddani hakke'en.

²⁶To a yiɗi heɓgo hikma, sey a ɗowtana umrooje, nden Jawmiraawo hokkete ka waagaare.

²⁷Kulol Jawmiraawo jaŋnginan hikma. Ko fottanta mo ɗum ɗowtaare e yaŋkinaare.

²⁸Taa yawa kulol Jawmiraawo, taa war haa maako bee ɓerɗe ɗiɗi.

²⁹To a ɗon wolwana yimɓe taa waɗ naafikaare, hakkilan ko mbi'ata.

³⁰Taa laatoɗa mawnitiiɗo, to naa non a do'oto, a fooɗan toskaare dow hoore ma, Jawmiraawo feftan ko cuuɗuɗa. O semtinte yeeso yimɓe ngam a ɓaditi mo bilaa ne'aare e bee ɓernde heewnde faasikaare.