Read Fulfulded Sirasid 10 Bible Online

Sirasid 10 - Fulfulded bible

Sirasid 10

¹Kiitoowo marɗo hikma eltan jama'aare mum. To o woodi hakkiilo o maran baawɗe.

²Bana no kiitoowo wa'i, non wakiili'en boo nga'ata. Bana no laamiiɗo wa'i, non yimɓe wuro boo nga'ata.

³Laamiiɗo mo jaŋngaay nattinan ummaatoore mum. Ardiiɓe hakkilɓe njahran wuro yeeso yeeso.

⁴Jawmiraawo jogi laamu duniyaaru fuu haa juŋngo mum, o umminan nder wakkatiire haandunde laamiiɗo pottuɗo.

⁵Jawmiraawo jogi risku goɗɗo fuu haa juŋngo mum, o hokkan laamu maako haa waɗanɓe umrooje. Mawnitaare e doolɗinki

⁶Taa monnu gaɗɗo ma halleende, taa huuwru bee elewre.

⁷Jawmiraawo e ɓiɓɓe Aadama nganyan mawnitaare. Haa maako e haa maɓɓe fuu sooynde-adilaaku wooɗaay.

⁸Laamu sottan diga jama'aare haa jama'aare woɗnde ngam doolɗinki, mawnitaare e suuno. Walaa mo ɓuri suunomaajo ceede geddal, ngam o soorran koo yoŋki maako.

⁹Goɗɗo fuu ɗum collaaje e ndoondi: E ko waddi maŋngal hoore? Diga o geeto, ɓanndu maako ɗon heewi nyolnere!

¹⁰Nyawu caatuŋgu ɗon jala koo kurgoowo. Hannde a laamiiɗo, jaŋngo a maayɗo.

¹¹To goɗɗo maayi walaa ko luttanta mo, sey gilɗi, koowoowe e ɓuɗɗi.

¹²Goɗɗo fuɗɗan laataago mawnitiiɗo to o daaytake Jawmiraawo, to o acci numgo moy tagi mo.

¹³Goɗɗo fuɗɗan laataago mawnitiiɗo wakkati o sali baawɗe Jawmiraawo. To o ŋa'inake dow laawol man, o toɓnan masiibooji kulniiɗi. Kanjum waɗi Jawmiraawo yarni mawnitiiɓe bone, haa ragare o ɗon yahra ɓe haa majjere mawnde.

¹⁴Jawmiraawo ɓorti laamiiɓe tedduɓe. O laami yaŋkiniiɓe haa pellel maɓɓe.

¹⁵Jawmiraawo ɗoofi mawnitiiɓe, o tiggi yimɓe ɓe ngalaa manti haa pellel maɓɓe.

¹⁶Jawmiraawo jiiɓi lesɗe ummaatooje goɗɗe, o wirgi caɓɓawal maɓɓe diga les.

¹⁷O nattini ɗe, o wili ɗe diga duniyaaru haa walaa ciftoranɗo ɗe.

¹⁸Allah tagaay yimɓe ngam ɓe laato mawnitiiɓe. Ɓe ndanyaaka ngam ɓe laato tikkooɓe.

¹⁹Asŋgol ngole haani darjiɗineego? Ɗum asŋgol ɓiɓɓe Aadama to ɓe teddini Jawmiraawo. Asŋgol ngole haani haɗeego daraja? Ɗum asŋgol ɓiɓɓe Aadama, to ɓe ɗowtanaaki umrooje maako.

²⁰Laamiiɗo ɗon teddine caka banndum'en, kaŋko boo, o teddinan hulɓe Jawmiraawo.

²¹Ka'ida jaɓeego ɗum kulol Jawmiraawo, ka'ida kiita Allah ɗum tukku e mawnitaare.

²²Kulol Jawmiraawo, ɗum welwelo haa hesɓe nastuɓe diina, hoɗɓe e laafuɓe.

²³Wanyugo marɗo hikma ammaa laafuɗo, ɗum sooynde-adilaaku. Teddingo kalluɗo boo, ɗum haanaay.

²⁴Ɓe ndokkan daraja haa tedduɓe, ardiiɓe, marɓe laamu. Ammaa walaa ɓuranɗo ɗowtaniiɓe Jawmiraawo koo gooto cala maɓɓe.

²⁵Koo nder maccuŋgaaku, marɗo hikma heɓan walliinde haa rimɓe. Koo ko marɓe hakkiilo fuu mbi'ata dow man. Daraja gooŋga

²⁶Taa hoositir hoore ma bana a marɗo hikma to a ɗon huuwa kuugal ma, taa mawnitu to a ɗon nder ɓillaare.

²⁷Ndikka huuwugo e marugo jur dow darjiɗingo hoore mum to walaa koo ko nyaame.

²⁸Ɓiŋngel am, to a ɗon darjiɗina hoore ma, taa ɓur no ngonɗa.

²⁹Walaa gooŋɗinango zammbuɗo hoore mum, walaa gerdotooɗo boo toskinɗo joonde mum.

³⁰Laafuɗo he'i darjiɗineego ngam anndal mum, ammaa diskuɗo ngam risku mum tan.

³¹To ɓe mbaagani goɗɗo daraja wakkati o talakaajo, noy daraja maako fotata to o riski? Ammaa to ɓe nganyi mo yaake o diskuɗo, noy ɗum laatoto to o laafi?