Read Fulfulded Sirasid 11 Bible Online

Sirasid 11 - Fulfulded bible

Sirasid 11

¹Goɗɗo jaŋkiniiɗo marɗo hikma, ɓaŋgtan hoore mum: O jooɗoto caka mawɓe. Hiitaago bee gooŋga

²Taa maŋgtu goɗɗo ngam mbooɗirka maako, taa wanya goɗɗo boo ngam sifa mum.

³Nyaaku ɓuri famɗugo caka piiranɗum, ammaa belɗum njumri maagu ɓurdan welgo nder duniyaaru.

⁴Taa jal goɗɗo ngam o ɓornaaki booɗɗum non boo taa jal gonɗo nder ɓillaare, ngam Jawmiraawo huuwan kuuɗe kayɗiniiɗe, walaa annduɗo ko o waɗata.

⁵Ɗuuɗɓe caka laamiiɓe ɓortaama e mo ɓe tammaakino hooci laamu maɓɓe.

⁶Ɗuuɗɓe caka ardiiɓe majjini tedduŋgal muuɗum'en, ɗuuɗɓe teddinaaɓe boo ngarti maccuɓe.

⁷Faamu tawon hiddeko a fela. Linyu tawon, ɓaawoɗon pela.

⁸Taa jaaba law, sey to a nani booɗɗum. Taa ta'u wolde goɗɗo to o ɗon wolwa.

⁹Taa nastu nder jokkirgol ngol laaranaay ma, taa nastu boo nder haalaaji halluɓe. Risku e laafere

¹⁰Ɓiŋngel am, taa huuw kuuɗe ɗuuɗɗe wakkatiire woore. To ɗe ɗuuɗi, a waawataa huuwdugo ɗe. Dogganɗo koo toy fuu naŋngataa huunde. Saŋkititgo semmbe mum, ɗum yahrugo hoore mum haa do'ere.

¹¹Woɗɓe feere ɗon tiino haa kuugal, ɓe njaawa, ɓe njottataako ko ɓe tiiti.

¹²Woɗɓe feere boo faafama'en, ɓe mari haaje walleego. Ɓe ngalaa daliilaaji, laafere maɓɓe mawni. Ammaa Jawmiraawo ɗon laara ɓe bee enɗam, o umminan ɓe diga toskaare maɓɓe.

¹³O hokkitan ɓe neɗɗaaku maɓɓe haa ɗum hayɗina ɗuuɗɓe.

¹⁴Booɗɗum e kalluɗum, ngeendam e waade, laafere e risku, ɗum fuu ɗum iwi haa Jawmiraawo.

¹⁵Hikma, anndal, faamu Tawreeta iwi haa Jawmiraawo. Yiide e huuwugo kuuɗe booɗɗe fuu haa maako iwi.

¹⁶Nginnaaku e nyiɓre tagaama ngam hakke'en. Yiɗanɓe kalluɗum naywan bee maajum.

¹⁷Ko Jawmiraawo hokkata haandani ɗowtaniiɓe mo, mbooɗeeŋga maako ɗoftan ɓe haa foroy.

¹⁸Ɗuuɗɓe ɗon ndiska bee mooɓtugo e sigaago, ammaa ndaa ko reenata ɓe:

¹⁹Wakkati ɓe mbi'ata: “Mi foti mi siwto, haa mi naftoro ko mi mari fuu”. Nden wakkati waɗan, walaa seko, ɓe maayan non, ɓe ɗalan ɗum fuu haa yimɓe feere. Jawmiraawo tan waawan waylitaago joonde

²⁰Hakkilan kuugal ma, hokku semmbe ma fuu haa maagal haa yotto nayeewu ma!

²¹Taa hayɗin daliila jaalorgal halluɓe. Hoola Jawmiraawo e tiinan kuugal ngal kuuwata. Ngam haa Jawmiraawo, ɗum koyɗum riskingo laatunooɗo laafuɗo.

²²Barka Jawmiraawo, ɗum ngeenaari hulɓe mo: Wakkatiyel pamarel nii, Allah finnan barka mum.

²³Taa ƴam ɗume ŋakkani ma fahin malla jawle ɗeye a marata yeeso?

²⁴Taa mbi'a boo: “Mi mari ko marmi haaje fuu, sarru nguye heɓatammi fahin?”

²⁵Wakkati hayru, en numataa masiibooji fahin, nder nyalɗe ɓillaare, en ngejjitan hayru fuu.

²⁶Haa Jawmiraawo, ɗum koyɗum reenugo nyalaade maayde goɗɗo haa o warjo mo deydey fodde kuuɗe maako.

²⁷Wakkatiyel ɓillaare ɗon yejjitina goɗɗo hayru ngeendam fuu. Nyalɗe ragareeje innu hollan noy kuuɗe maako mba'ino.

²⁸Taa mbi'a seyo woodani goɗɗo hiddeko o maaya. En anndataa goɗɗo sey to ragare wari. Halluɓe ngalaa amaana

²⁹Halluɓe ngoodi dabareeji teemerre ngam zammbugo. Naa koo moy fuu nastinta haa saare ma.

³⁰Mawnitiiɗo nanndi bee gerlal naŋngaaŋgal ngam naŋngugo gerle luttuɗe: O reenan wakkati haa o waawa naŋngugo.

³¹O waɗan tuufnorgol maako, o waylitan booɗɗum bee kalluɗum, o tunwinan bee loope kuuɗe laaɓɗe fuu.

³²Bana feetere yiite huɓɓirta waare leɗɗe, kalluɗo boo tuufnorto tuuforli kalluɗi.

³³Daaya halluɓe. Ɓe ngaɗan halleende, ɓe kallinan neɗɗaaku ma haa foroy.

³⁴To a weerni koɗo, foti a aawa jiiɓre haa saare, a ummina yimɓe saare ma dow maaɗa.