Read Fulfulded Sirasid 12 Bible Online

Sirasid 12 - Fulfulded bible

Sirasid 12

¹Walaa kawtal bee yawiiɓe Allah To a yiɗi yetteego dow mbooɗeeŋga ma, anndu moy a waɗanta nga.

²Waɗ mbooɗeeŋga haa ɗowtaniiɓe Jawmiraawo, gooto yoɓete: To ɗowtaniiɓe man njoɓaay ma, Allah Ɓaŋiiɗo yoɓete.

³Walaa barkaaji haa yimɓe tokkotooɓe waɗgo halleende e saliiɓe wallugo laafuɓe.

⁴Hokku ɗowtaniiɓe Jawmiraawo, taa wallu hakke'en.

⁵Enɗu famɗa-semmbe'en ammaa taa hokku wanyɓe Allah koo ɗume: Ɗum hokkugo ɓe sawru haa ɓe piire bee maaru, ɓe njoɓete kalluɗum cowi ɗiɗi ngam mbooɗeeŋga nga a waɗani ɓe.

⁶Allah Ɓaŋiiɗo yiɗaa halluɓe, o yoɓan ɓe ko ɓe kuuwi.

⁷Hokku wooɗɓe, taa wallu halluɓe. Hakkilango sooba'en gooŋga e fewre

⁸Wakkati feecaare, goɗɗo annditittaa moy woni soobaajo mum, ammaa wakkati ɓillaare, konneejo waŋgata.

⁹To goɗɗo ɗon seyi, konne'en maako ɗon ɓerni. To o ɗon nder naawɗum, koo soobaajo maako ɗon dilla.

¹⁰Taa hoola konneejo ma, ngam nganyaandi maako ɗum njamndi mboɗeeri ɓakkotoondi ɓotokorooji.

¹¹Koo to o warti o ɗelemɗo e o ɗon yaha o ɗon turi, hakkilan mo e daaya mo. Laata ngam maako bana cehoowo daarorgal, annduɗo ɓotokorooji neeɓataa.

¹²Taa ɓadin mo e ma, ngam taa o hippe, o hooca babal ma. Taa laatin mo balloowo ma, sonaa non o tefan jaɓtugo koromwal ma. Haa ragare, a faaman mi marino gooŋga ammaa a miccititto bolle ɗe mbi'nomaami.

¹³Moy yurminta pijiranɗo mboodi mo ndi memti ɗum malla haɓanɓe bee dabbaaji ladde?

¹⁴Bana nii ɓe njurmintaa boo gillotooɗo halluɓe e to sarru maɓɓe heɓi mo.

¹⁵No jahaaŋgal ma bee kalluɗo juutiri fuu, o hollataa ma moy o woni. To a ɗon do'o, o accete ndo'oɗa. To a ɗon dari o ɗon suuɗi haa ɗowdi, to a fergake o taɓɓataako ma.

¹⁶To konneejo ɗon wolwane bolle belɗe, o ɗon tefa noy o naŋngirte nder tuufnorgol maako. A laaran bana o ɗon bee yurmeende, ammaa to o heɓi laawol, o yaran ƴiiƴam.

¹⁷To masiibo ukkanane ma, o fortoto law. O waɗan bana o yiɗi wallugo ma, ammaa o yiɗi do'ugo ma.

¹⁸Nden o hollete no o wa'i bee gooŋga, nden o dimmbinan hoore maako, o jalete, o hellan juuɗe, o feewante yeeso yimɓe.