Read Fulfulded Sirasid 13 Bible Online

Sirasid 13 - Fulfulded bible

Sirasid 13

¹Tuuforli diskuɗo mawnitiiɗo To a meemi ɗaccere, a tunwinan juuɗe ma. To a ɗon yiilla mawnitiiɗo, o raaɓete.

²Taa roonda doŋngal tedduŋgal. Nii non boo taa yiildu bee ɓuranɗo ma semmbe malla ɓuranɗo ma risku. Ɗume fayannde loope heɓata bee yiilaago fayannde njamndi? To ɗe lukkindiri, fayannde loope fusan law.

³Diskuɗo koo toonyake goɗɗo, kanyum haaŋoto. Laafuɗo mo ɓe toonyi, kanyum ƴamata yaafuye.

⁴To woodi ko a nafirta diskuɗo, o huuwtinirte. To an ɗon nder haaje, o sakkinte.

⁵To a woodi jawdi, o ɗakkoto ma, o ɓolete bilaa miccitaago sam.

⁶To o mari haaje ma, o ƴoƴrete: O moosane, o wi'ete haalaaji belɗi e o ƴamete: “Ɗume ngiɗɗa mi waɗane?”

⁷O semtinte to o ewnake ma haa nyaamduuji maako. Nden, o yerɓete majjingo ko marɗa fuu bee yoɓango mo nde ɗiɗi malla nde tati. Haa ragare o jalete, o dimmbinan hoore, o waɗa bana o yi'aay ma.

⁸Hakkil! Taa laata paataaɗo, taa jaɓ sargeego e semtineego.

⁹To goɗɗo marɗo daraja wi'i ma ngara haa maako, taa yah: O tiinoto ewnaago ma.

¹⁰Taa yaaw, ngam taa o farte. Ammaa taa daaya mo jamum, sonaa non, o yejjititte.

¹¹Taa foondu wolididgo bee maako bana on potan, taa jaɓ boo ko o wi'ete fuu: Bee ɗuuɗal haala e bee moosaango o yiɗi faamgo ko woni nder ɓernde ma.

¹²O tefan feftugo haalaaji ma. Fakat, taa sek, o hisnataa ma fiyeego e yahreego daŋngay.

¹³Hakkil booɗɗum e waata hakkiilo: A ɗon yeeso joote. Riskuɓe e laafuɓe

¹⁵Dabba fuu tefan asŋgol mum, goɗɗo boo non yiɗi banndum'en.

¹⁶Ko mari yoŋki fuu hawtan fodde asŋgol mum. Goɗɗo boo ɗakkotiran bee nanndu mum.

¹⁷Narral ngale hakkunde suundu e be'el, hakkunde halluɓe e nuɗɗinɓe Jawmiraawo?

¹⁸Fowru e rawaandu mbaawan yeeɗididgo nder jam na? Woodi narral hakkunde diskuɗo e laafuɗo na?

¹⁹Haa ladde, nyaamdu barooɗe ɗum bamɗe ladde. Nii non boo kusel riskuɓe ɗum laafuɓe.

²⁰Mawnitiiɗo ɗon wanya ko leesi. Nii non diskuɗo boo wanyiri laafere.

²¹To diskuɗo mari ɓillaare, sooba'en maako mballan mo. Ammaa to laafuɗo do'ake, sooba'en maako ngudinan mo.

²²To diskuɗo waɗi aybe, o heɓan wallooɓe ɗuuɗɓe. To o wi'i haalaaji ɗi njahaay, ɓe mbi'an gooŋga maako. To laafuɗo waɗi aybe, ɓe pelan mo. To o wi'i haala laaɓka, ɓe njaɓantaa mo.

²³To diskuɗo fuɗɗi wolwugo, yimɓe fuu njeeɗoto, kakkilanan boliiɗe maako. To laafuɗo fuɗɗi wolwugo, yimɓe fuu ƴaman: “Ɗum moy?” To o seli seɗɗa, ɓe ngerɓan mo o do'o.

²⁴Risku ɗum huunde woonde to ngu heɓraaka bee laawol kalluŋgol. Ammaa laafere wooɗaay fodde yedduɓe.

²⁵Ko goɗɗo saawi nder ɓernde mum ɗon waylito yeeso maako booɗɗum malla kalluɗum.

²⁶Yeeso pertiiŋgo hollan ɓernde woɗnde. Ammaa heɓtugo balndi, kuugal comniiŋgal.