Read Fulfulded Sirasid 15 Bible Online

Sirasid 15 - Fulfulded bible

Sirasid 15

¹Nii kulɗo Jawmiraawo waɗata. Annduɗo Tawreeta heɓan hikma.

²Bana daada ka waran ka hawran bee maako. Ka jaɓɓoto mo bana budurwaajo mo o ɓaŋgi.

³Tamseere ka nyaamnata mo, ɗum hakkiilo. Ndiyam ka yarnata mo, ɗum hikma.

⁴To o tuggorake ka, o tampataa. To o hoolake ka, o miccitittaako.

⁵Ka wartiran mo goɗɗo teddinaaɗo caka heeddiɗɗiraaɓe maako. To o ɗon wolwa yeeso yimɓe, ka ɗon wi'a mo ko o wolwata.

⁶Nii non o heɓan seyo ɗuuɗŋgo, innde maako boo wartan nanaande.

⁷Bilki'en keɓataa hikma, halluɓe boo ngi'ataa ka haa foroy.

⁸Hikma daran daayiiɗum bee mawnitiiɓe, fewooɓe ciftortaa ka.

⁹Maŋgtugo Jawmiraawo haandaay yimɓe halluɓe ngam ɗum iwataa haa Jawmiraawo.

¹⁰Hikma yahrata goɗɗo haa maŋgta Allah, Jawmiraawo ɗowata ka. Neɗɗo ardinan kuuɗe muuɗum

¹¹To a seli laawol darnuŋgol, taa aybin Jawmiraawo, ngam ko Allah wanyi, o waɗataa ɗum!

¹²Taa mbi'a: “Kaŋko nastini yam nder aybe” ngam o walaa haaje waɗooɓe kalluɗum.

¹³Jawmiraawo yiɗaa kalluɗum no wa'i fuu. Nuɗɗinɓe mo boo ngaɗan bana maako.

¹⁴Haa fuɗɗam, Allah tagi ɓii-Aadama, o ɗali mo o gaynaako hoore maako.

¹⁵To a yiɗi, a waawan tokkaago Tawreeta. Laataago nuɗɗinɗo iwan haa maako.

¹⁶O jo'ini yeeso ma yiite e ndiyam: An numata ko a suɓata!

¹⁷O lii'ani ɓiɓɓe Aadama ngeendam e waade. Fodde cuɓol maɓɓe, ɓe keɓan ngeendam malla boo waade.

¹⁸Jawmiraawo o hikmaajo tedduɗo, baawɗe maako mawɗe, yiitere maako laaran koo ɗume fuu.

¹⁹Gite maako ɗon tiiti ɗowtaniiɓe mo e o anndi ko yimɓe ngaɗata fuu.

²⁰O umrataa goɗɗo laato kalluɗo, o hokkataa goɗɗo duŋayeere waɗgo hakke.