Read Fulfulded Sirasid 16 Bible Online

Sirasid 16 - Fulfulded bible

Sirasid 16

¹Mbooɗeeŋga e caatal Allah Margo ɓiɓɓe ɗuuɗɓe naa huunde yeleteende sakkomaa to ɓe nafataa. Taa seyora margo ɓiɓɓe worɓe to ɓe njawiiɓe Allah.

²Taa seyora ɗuuɗeeŋga maɓɓe to ɓe ngalaa kulol Jawmiraawo.

³Taa tamma balɗe maɓɓe njuutan, taa jo'in tammunde ma dow maɓɓe. Ndikka ɓiŋngel gootel ɗowtaniiŋgel Jawmiraawo dow margo ɓikkoy ujineere koy nafataa, ngam bee wuddaare a uuman ngam naawral e law a anndan timmoode maakoy. Ndikka maaygo bilaa heɓgo ɓiŋngel dow heɓgo ɓikkoy ɗuuɗkoy yeddukoy Allah!

⁴Goɗɗo gooto kakkilɗo he'an hebbingo wuro, ammaa kawtal buuɗaaje wartiran wuro man ferewŋgo.

⁵Bee gite am, mi laari kuuje ɗuuɗɗe nannduɗe. Bee noppi am, mi nani misaaluuji feere ɓurɗi hayɗingo.

⁶Haa weerde hakke'en, yiite Allah huɓɓan, ɓernuki maako wulan yimɓe tuurtuɓe.

⁷Allah yaafaaki maapinndi'en ɓooyma, tuurtiiɓe ngam ɓe semmbiɗɓe.

⁸O hinnaay yimɓe wuro Ludu ngam o nyiddinino mawnitaare maɓɓe.

⁹O yurminaay yimɓe Kanaana, waraaɓe ngam daliila hakkeeji muuɗum'en. O waɗi ɗum fuu haa tampa-diina'en saata-ɓerɗe'en e o yurminaay seniiɓe ɗuuɗɓe maako.

¹⁰Bana non boo Isra'iila'en ujine teemeɗɗe joweego mbaraama ngam tukku muuɗum'en. Jawmiraawo ɓoccan, yurminan, naawnan e hurgan: O aynan o enɗan, o torran.

¹¹To woodi tuurtuɗo gooto, ɗum hayɗinan to o torraama. Jawmiraawo ɗon bee mbooɗeeŋga e tikkere, o mari baawɗe yaafugo e torrugo.

¹²Bana o nyaaɗiri, non o wooɗiri boo, o ɗon hiito yimɓe deydey kuuɗe muuɗum'en.

¹³Aybinaaɗo fuu daɗataa bee jawdi mum, ammaa munyal hooliiɓe toskataako.

¹⁴Tum Allah ɗon taaski waɗgo booɗɗum, ammaa koo moy fuu yoɓete deydey kuuɗe ɗe o huuwi.

¹⁵Jawmiraawo saatini ɓernde Firawna ngam taa o anndita mo ngam haa kuuɗe maako mbaŋgine haa duniyaaru.

¹⁶Enɗam maako waŋginaama haa tagle maako fuu, o senndi annoora e nyiɓre maako caka ɓii-Aadama. Walaa baawanɗo daɗgo Jawmiraawo

¹⁷Taa goɗɗo wi'a: “Mi suuɗoto yeeso Jawmiraawo. Walaa gonɗo asama ciftoranɗo yam. Mi saaloto caka yimɓe, ɓe ngi'ataa yam. Noy ngonmi caka tagle ɗe limataake?

¹⁸Duule bee njaajirka mum, lugguɗum maaje e lesdi fuu ɗon ndiwna to Jawmiraawo wari linyugo ɗum. Duniyaaru e koode fuu tagaama e ɗon ngam muuyo maako.

¹⁹Kooseeje e caɓɓaaje lesdi fuu, to o laari ɗe, ɗe ɗon ndiwna.

²⁰O hakkilantaa ɗum. Moy suklanto laabi maako?

²¹To mi waɗi aybe, walaa gi'anɗo yam. To mi fewi bee sirri walaa anndanɗo.

²²Kuuɗe adiliije ɗe kuuwmi, moy anndinta mo ɗum? E ɗume tammortoomi to mi tokkake umrooje maako?” Kiita dow kuuje fuu sey haa timmoode waɗete.

²³Goɗɗo numan bana nii to hakkiilo mum famɗi! Goɗɗo mo walaa hakkiilo, hakkiilo mum eeri, kanyum tan numata numooji bilkiiji ɗi'i! KAƁƁOL WASUYEEJI ƊIƊAƁOL Tokkindirki tagle Allah

²⁴Ɓiŋngel am, heɗitam, jaɓ anndal am, hakkilan ko mbi'anmaami.

²⁵Mi waɗan njayawri dow elto woɗŋgo, bee hakkiilo mi jaŋnginte anndal am.

²⁶Haa fuɗɗam, yaake Jawmiraawo tagi tagle mum, o sennditi koo ɗume haa babal mum.

²⁷O waɗi tokkindirki nder koode haa foroy, o hokki ɗe umrooje deydey sarti maaje. Ɗe meeɗaay anndugo comri malla weelo e ɗe meeɗaay ɗalgo ko ɗe ngaɗata.

²⁸Walaa koo woore lukki feere malla luuti umrooje Allah.

²⁹Ɓaawo man Jawmiraawo laari lesdi e o hebbini ndi bee barka maako:

³⁰O hebbini ndi bee dabbaaji fuu, ɗi loroto haa lesdi wakkati ɗi mbaatata.