Read Fulfulded Sirasid 17 Bible Online

Sirasid 17 - Fulfulded bible

Sirasid 17

¹Kuugal ɓii-Aadama yeeso Allah Jawmiraawo tagi neɗɗo bee lesdi, haa lesdi boo o lornata mo.

²O hokki ɓiɓɓe Aadama sarti ngam yeeɗgo, o hetani ɓe wakkati ngeendam maɓɓe ammaa o hokki ɓe baawɗe dow lesdi.

³Nde o tagi ɓe dow jaati maako, o hebbini ɓe bee baawɗe, kamɓe boo.

⁴O waɗi ko yeeɗata dow lesdi fuu hula ɓe, ɓe laamo dow dabbaaji e colli.

⁵Ɓe njaɓi huuwtinirgo baawɗe Jawmiraawo jowi, o hokki ɓe dokkal joweegowal, hakkiilo e joweeɗiɗaɓal boo wolde fassitirgo baawɗe maako.

⁶O waɗani ɓe ɗemŋgal, gite, noppi e o hokki ɓe ngaandi ngam numgo.

⁷O hebbini ndi faamu e anndal e o anndini ɓe booɗɗum e kalluɗum fuu.

⁸Haa nder ɓerɗe maɓɓe, o waati njayawri seɗɗa, haa o holla ɓe maŋngal kuuɗe maako.

⁹O yerdi ɓe maŋgta kaayeefiiji maako haa foroy.

¹⁰Ɓe mbaawan maŋgtugo innde maako seniinde, ɓe anndina koo toy fuu maŋngu kuuɗe maako. Umroore Alkawal

¹¹Jawmiraawo hokkaay yimɓe dabareeji faamgo tan, ammaa o ɗalani ɓe umroore ngam ɓe ngeeɗa haa yeeɗanɓe jonta anndita ɓe maayooɓe.

¹²O haɓɓotiri alkawal duumiiŋgal bee maɓɓe e o faamni ɓe anniyaaji maako.

¹³Nden gite maɓɓe peeri, ndaari tedduŋgal laamu maako, noppi maɓɓe keɗiti daande maako mawnde.

¹⁴O wi'i ɓe: “Kakkilane ko luuti umroore fuu.” O hokki ɓe umrooje dow gendal maɓɓe. Walaa ko daɗata Jawmiraawo

¹⁵Jawmiraawo ɗon laara tum ko ɓiɓɓe Aadama mbaɗata, walaa ko suuɗoto haa gite maako.

¹⁶Diga nderkaaku laabi maɓɓe njahran gal kalluɗum, ɓe mbaawataa sannjugo ɓerɗe maɓɓe caatuɗe bee ɓerɗe ɗelemɗe

¹⁷Nder cenndiigu ummaatooje duniyaaru, o darnani ummaatoore fuu laamiiɗo gooto, ammaa Isra'iila ɗum maral maako.

¹⁸Bana bajjo maako, o ɗon wuurna mo bee anndal, o ɗon hokka mo annoora yiide maako, o wudintaa mo sam.

¹⁹Haa laarannde Jawmiraawo, ko ɓiɓɓe Aadama ngaɗata fuu laaɓi bana naaŋge, gite maako ɗon ayna kuuɗe maɓɓe tum.

²⁰Walaa sooynde-adilaaku suuɗoto yeeso maako, aybeeji maɓɓe fuu ɗon mbaŋgi yeeso maako.

²¹Ammaa Jawmiraawo o booɗɗo e o anndi tagle maako, o wilataa ɗe, o wudintaa ɗe ammaa o hisnan ɗe.

²²Haa gite maako, mbooɗeeŋga nga goɗɗo waɗata ɗon bee daraja bana halagaare laamiiɗo, walliinde woonde maran saman bana ɓiŋngel yiitere maako, o ɗon waɗana ɓikkoy maako worɓe e rewɓe mo'ere.

²³Nyannde feere, o ummoto o warjoto ɓiɓɓe Aadama kuuɗe maɓɓe e batte maɓɓe.

²⁴Ammaa o ɗon hokka haa tuubanɓe no ɓe lortoro haa maako, o ɗon hokka cuusal haa ta'a ɓerɗe'en. Ewnaandu huucititgo e Allah

²⁵Huucitit haa Jawmiraawo, faasitit waɗgo aybe, tora mo nden a ustan hakke ma.

²⁶Wartanan Ɓaŋiiɗo, daaytu kalluɗum, ngam kaŋko yahrete diga nyiɓre haa annoora kisndam. Wanyu bee semmbe ko o wanyi fuu.

²⁷Haa joonde maayɓe, moy maŋgtata Ɓaŋiiɗo? Ɗum yeeɗɓe maŋgtata mo!

²⁸Geeto, jamo foti yettugo Jawmiraawo. To o maayi, o halki, nii non yettoore maako timmi boo!

²⁹Mo'ere Jawmiraawo nde mawnde e yaafuye mum boo ɗon ngam huucititɓe gal muuɗum!

³⁰Kilamaaku walaa haa ɓii-Aadama, ngam tagdi ɓii-Aadama duumataako.

³¹Ɗume ɓurata naaŋge njayawri? Bee non fuu, nge ɗon muta e nyifa. Non ɓii-Aadama numanɗo halleende.

³²Allah ɗon ayna jama'aare konu koode ammaa ɓiɓɓe Aadama ɓe tagraama bee lesdi e mbulwuldi non!