Read Fulfulded Sirasid 18 Bible Online

Sirasid 18 - Fulfulded bible

Sirasid 18

¹Maŋngu Jawmiraawo Jawmiraawo o geeto haa foroy, o tagdi kuuje fuu hawtaade.

²Kaŋko tan haani wi'eego adiliijo, walaa ɗowanteeɗo sonaa kaŋko.

³O ɗon laamano duniyaaru bee newre juŋngo maako, koo ɗume fuu ɗon ɗowtano muuyo maako. Ngam daliila baawɗe maako, o laamiiɗo dow koo ɗume fuu, o senndindiri kuuje ceniiɗe e kuuje ɗe cenaaki.

⁴O halfinaay koo moy maatingo ko o waɗata. Moy waawata heɓtididgo kaayeefiiji maako

⁵malla foonda maŋngu semmbe maako? Sakkomaa, moy waawata limtugo mbooɗeeŋga maako?

⁶Walaa ko mbaaweten ustugo malla ɓesdugo malla heɓtididgo kaayeefiiji sirriiji Jawmiraawo!

⁷To goɗɗo numi o timmidini, nden wakkati man o fuɗɗata. To goɗɗo dari, o anndaa toy o woni. Moy woni ɓii-Aadamaajo?

⁸Moy woni ɓii-Aadamaajo? Ɗume o nafata? Noy saman mbooɗeeŋga nga o waɗi malla halleende nde o waɗi?

⁹To o heɓi duuɓi teemerre, ɗum ɗuuɗɗum jamum. Walaa annduɗo nyalaade maayde mum.

¹⁰Haa yeeso duumaare, duuɓi maako seɗɗa potan bee baadel nder maayo, potan boo bee gawel nder waagaare njaareendi.

¹¹Kanjum waɗi Jawmiraawo ɗon munyani ɓiɓɓe Aadama e o ɗon waanja dow maɓɓe mbooɗeeŋga maako.

¹²O ɗon yi'a e o anndi noy ragare maɓɓe wa'i, kanjum waɗi o ɗon yaafo ɓe.

¹³Goɗɗo woonanan gonɗo kommbi muuɗum, ammaa Jawmiraawo woonanan yimɓe fuu. O felan ɓe, o eltoto ɓe, o jaŋnginan ɓe, o wartiran eerɗo fuu haa maako bana no gaynaako waɗata to mbaalu mum eeri.

¹⁴O yurminan marɓe haaje jaŋngineego e yaawotooɓe heɗitaago umrooje maako. Saahoraago deydey

¹⁵Ɓiŋngel am, to a ɗon woonana goɗɗo, taa jillu ɗum bee feloore. To a ɗon saaho boo, taa tokkin ɗum bee haalaaji lakasɗi.

¹⁶Foti kalimawol ɓura caahu nafgo, bana saawawre ustirta nguleeŋga.

¹⁷Wolde woonde ɓurataa caahu mbooɗŋgu na? Caahiiɗo hokkan ɗiɗi fuu.

¹⁸Paataaɗo felan goɗɗo bilaa lisaafi bana caahu kaajuɗo woynirta. Hakkiilo marɓe hikma

¹⁹Hiddeko a wolwa, wiɗita ƴamol man tawon. Hiddeko a nyawa, aynu hoore ma.

²⁰Linyu hoore ma hiddeko Allah hiite e to wakkati waɗgo lisaafi kuuɗe ma waɗi, a heɓan yaafuye haa maako.

²¹Taa munya sey to a nyawi ngam puɗɗa anndititgo aybe ma, ammaa diga a waɗi aybe, hollu a micciti.

²²To woodi ko a togani Jawmiraawo, sey kebbina ɗum to wakkati man waɗi. Taa reen haa yotto maayde ngam hebbitingo togayeere ma.

²³Hoolɗin hoore ma hiddeko ngaɗa togayeere, taa nyemmbitu jancanɗo Jawmiraawo.

²⁴Siftor balɗe ma ragareeje, Jawmiraawo foti ɓernana ma, o torra ma e o waylitane ɓaawo.

²⁵To a ɗon mari nyaamdu ɗuuɗndu, num dow weelo tammiiŋgo waɗgo. To a ɗon mari koo ɗume fuu ɗuuɗɗum, taa yejjitit foti a laato laafuɗo e talakaajo.

²⁶Diga fajira haa asiri, ɗume fuu foti sannja, koo ɗume saaloto bee jaawal yeeso Jawmiraawo.

²⁷Nder koo ɗume fuu, marɗo hikma laatoto kakkilɗo. Haa hakke woni, o laatataako geebiiɗo.

²⁸Marɗo hakkiilo fuu annditan hikma e teddinan keɓtuɗo ka.

²⁹Waawɓe wolwugo ɗon kolla kamɓe boo hikma maɓɓe, ɓe ɗon caŋkita bana toɓatoɓaalo balndi booɗɗi. Ndikka hoolaago Jaagorɗo gooto dow takkugo dow maayɗo bee ɓernde waatnde. Margo naŋgtaare

³⁰Taa tokka suunooji ma e daaya giɗaaɗi ma.

³¹To suuno ma jaalake ma, a toskoto, konne'en ma ceyoto boo.

³²Taa waɗ seyo dow giɗaaɗi ma, ngam a yoɓan ɗum fakat.

³³Taa laafin hoore ma bee nyaamduuji ɗi ngaɗata bee nyamaande, alhaali boo walaa ko marɗa nder jiiba ma.