Read Fulfulded Sirasid 19 Bible Online

Sirasid 19 - Fulfulded bible

Sirasid 19

¹Kuuwoowo njaroowo riskataa. Jawiiɗo naŋgtaare diirtoto diirtannde fakat koo bee hakkiilo.

²Suklanaago giya e rewɓe halkan koo marɓe hakkiilo. Tefanɗo ajaba'en marataa hoore muuɗum.

³Cuusal maako yerɓan mo haa maayde, gilɗi ndonan ɓanndu maako to nyoli. Sababu tufle

⁴Jaɓgo law ko ɓe mbi'ata, ɗum sooynde hakkiilo. Gaɗɗo aybe sarran hoore mum.

⁵Mo welwelti ngam kalluɗum, o kiiteteeɗo, mo naŋgti hoore mum e suunooji heɓanan ngeendam mum meetaleewol.

⁶Mo naŋgti ɗemŋgal mum yeeɗan bilaa ɓillaare. Mo wanyi tufle, hisan kalluɗum.

⁷Taa lornu sam ko a nani, a hisan batte ɗuuɗɗe.

⁸Taa nyo'u goɗɗo koo soobaajo koo konneejo. Taa feeftu ko nanɗa dow goɗɗo, sey to jeende ma aybinte.

⁹To goɗɗo nani ko a wolwi dow maako, o miijete e to daliila waŋgi o hollete nganyŋgu maako.

¹⁰To a nani sini-sini haala, taa anndin ɗum haa yotto maayde ma. Taa hultor, ka fettataa nder ma!

¹¹Sini-sini haala yarnan paataaɗo bone bana ɓiŋngel yarnirta ɓesnanɗo bone.

¹²Sigaago sirri ɗon naawa paataaɗo bana kurol ɗisaaŋgol nder daŋngo maako. Tefgo gooŋga dow ko ɓe mbi'i

¹³To a nani ɓe ɗon kuɗa soobaajo ma, ewna mo, ƴam mo: Teema walaa ko o waɗi. To woodi ko o waɗi teema o meetataa waɗgo ɗum.

¹⁴To ɓe kaadani keeddu ma tufle, ewna mo, ƴam mo: Teema walaa ko o wi'i. To woodi ko o wi'i teema o meetataa waɗgo ɗum.

¹⁵Woodi boliiɗe naawɗe ɗuuɗɗe! Ewna soobaajo ma, ƴam mo e taa jaɓ ko yimɓe ngeewtata.

¹⁶Goɗɗo foti wi'a kalimawol ngol haanaay, ammaa naa bee haɓɓere. Moyjo meeɗaay waɗgo ɗum?

¹⁷Ƴam keeddu ma hiddeko kiitoɗa mo, accu umroore Allah Ɓaŋiiɗo huuwa nder maako.

¹⁸Kulol Jawmiraawo ɗum ka'ida jaɓgo ngol, ammaa hikma ɗum laawol heɓgo enɗam maako.

¹⁹Anndugo umrooje Jawmiraawo ɗum elto ngeendam. Huuwanɓe muuyo maako teɓan ɓenndalooje haa lekki ngeendam nduumiiɗam. Hikma gooŋga e hikma fewre

²⁰Ndaa ko hikma fuu saawi: Hulgo Jawmiraawo e huuwgo ko o umri.

²¹To kuuwoowo wi'i jaagorɗo mum: “Mi waɗataa ko ngiɗɗa”, o mettini ɓernde nyaamnanɗo mo koo to ɓaawoɗon o waɗi ɗum.

²²Ammaa anndugo kalluɗum naa ɗum hikma, tokkaago sawari halluɓe naa ɗum margo hakkiilo.

²³Woodi dabarewol nyidduŋgol goɗŋgol. Geebiiɗo hikma ɗon huuwa bana goɗɗo mo walaa hakkiilo.

²⁴Ndikka goɗɗo marɗo hakkiilo seɗɗa ammaa teddinanɗo Jawmiraawo dow marɗo hakkiilo timmididŋgo ammaa ganyɗo umroore Jawmiraawo.

²⁵Woodi dabarewol kakkilŋgol faasikiiwol. Yimɓe caalorto gal soobaaku haa ɓe keɓa hakke maɓɓe, ammaa marɗo hikma hiitoto bee adilaaku.

²⁶En ɗon ngi'a yimɓe ɗon ngiilo ɓe ɗon turi, ɓe cuniiɓe, ammaa ɓerɗe maɓɓe ɗon keewi rikici.

²⁷Ɓe turan hoore, ɓe pahɗitinto, ammaa to on kakkilanaay ɓe, ɓe mba'oto dow mooɗon.

²⁸Woɗɓe ɗon kaɗito waɗgo kalluɗum ngam ɓe ngalaa semmbe, ammaa to ɓe keɓi dabare, ɓe ngaɗan ɗum.

²⁹To a yi'i goɗɗo a faaman ɗum moy, to on potti a faaman to o ɗon bee hakkiilo.

³⁰No o ɓornorto, no o jalirta, no o yahirta, hollan no o wa'i.