Read Fulfulded Sirasid 2 Bible Online

Sirasid 2 - Fulfulded bible

Sirasid 2

¹Jogaago amaana nder jarriboore Ɓiŋngel am, to a huuwanan Jawmiraawo, taaska yiidugo bee jarribooje.

²Tiiɗa bee cuusal e semmbe, taa ɓilla to saɗirma waɗi.

³Ɗakkotir bee Jawmiraawo, taa daayta mo sam. A tammi jaalaago haa ragare ngeendam ma.

⁴Jaɓ ko heɓi ma fuu, munyu to toskaare heɓi ma.

⁵Taa yejjitit, kaŋŋeeri foondete bee yiite. Bana non yiɗaaɓe Allah foondete bee toskaare. Nder nyawuji e bone, hoola mo.

⁶To a hoolake Jawmiraawo, o wallete. Tokka laawol ma cir e tammora mo.

⁷Onon hulɓe Jawmiraawo, tammore mbooɗeeŋga maako. Taa ndaayte mo, to naa non, on ndo'oto.

⁸Onon hulɓe Jawmiraaawo, koole mo. On ɗaltorta mbarjaari mon.

⁹Onon hulɓe Jawmiraawo, ndeene bee tammunde, o hokkan on mo'e maako, seyo ngo timmataa e mbooɗeeŋga mum, ngam mbarjaari maako ɗum dokkal duumiiŋgal e ceyniŋgal.

¹⁰Ndaare jooɗiiɓe nder zamanuuji caaliiɗi: Ndaare to woodi goɗɗo mo toski ngam o hooli Jawmiraawo malla nuɗɗinɗo Jawmiraawo gudinaaɗo malla boo toriiɗo Allah ammaa o nanaay mo?

¹¹Jawmiraawo kam yurminan naawreeŋga e laafere yimɓe mum, o yaafoto boo hakkeeji maɓɓe e o hisnan ɓe to ɓe ɗon nder ɓillaare.

¹²Naaloore dow hulɓe e waaɗɓe tokkotooɓe laabi ɗiɗi!

¹³Naaloore dow kulɗo mo hoolaaki Allah: Allah hisnataa mo!

¹⁴Naaloore dow mon, onon accuɓe tiinaago! Noy ngaɗoton to Jawmiraawo ƴami lisaafi kuuɗe mon?

¹⁵Hulɓe Jawmiraawo luutataa ko o wi'i. Yiɗɓe mo ɗon tokko laabi maako.

¹⁶Ɓe ɗon tefa fottango mo. Yiɗɓe mo ɗon nguurira Tawreeta maako.

¹⁷Hulɓe Jawmiraawo mari ɓernde taaskiinde foroy ngam maako. Ɓe annditi aybe maɓɓe yeeso maako.

¹⁸Ɓe ɗon mbi'a: “Ndikka yanugo nder juuɗe Jawmiraawo dow juuɗe yimɓe ngam mbooɗeeŋga maako foti bee maŋngu maako!”