Read Fulfulded Sirasid 20 Bible Online

Sirasid 20 - Fulfulded bible

Sirasid 20

¹Anndugo ndey haani wolwugo e ndey haani jeeɗaago Woodi pelooje ɗe kaandaay. Jeeɗaago, wapaka ɗum alaama hakkiilo.

²Ndikka felgo dow tikkugo.

³Anndititɗo aybeeji mum hisan ɓillaare.

⁴Giɗɗo waɗgo adilaaku bee semmbe nanndi bee cortaaɗo doolanɗo paanyo debbo.

⁵Woɗɓe ɗon njeeɗo ngam hollugo hikma maɓɓe. Woɗɓe ɗon laato halluɓe ngam ɓe ɗuɗɗinan bolle.

⁶Woɗɓe ɗon njeeɗo ngam walaa ko ɓe njaabo, woɗɓe boo anndi ndey ɓe mbolwata.

⁷Marɗo hikma reenan wakkatiire woonde ngam o wolwa, ammaa mawnitiiɗo, goɗɗo mo walaa hakkiilo, ɗalan wakkati man saalo.

⁸Ɗuuɗa-haalaajo wartan ganyaaɗo. Mo wolwataa boo yimɓe ngiɗataa mo. Ɗum booɗɗum to ɓe peli ma, a waŋgini tuubu, nden a waɗataa aybe bee haɓɓere. Luutondiraaje

⁹Ndego kam masiibo wooɗi ngam goɗɗo, ndego boo jaalaago wartan huunde hallunde.

¹⁰Caahu ngoɗŋgu walaa nafuuda, ngoɗŋgu boo wartirante ɗum cowi ɗiɗi.

¹¹Tedduŋgal foti leestingo ma, toskaare boo foti seynugo ma.

¹²Goɗɗo sooda kuuje jur bee ceede seɗɗa, ammaa gooŋga kam o yoɓan ɗum caɗɗum cowi joweeɗiɗi.

¹³Bee kalimaaji seɗɗa marɗo hikma waɗan haa ɓe ngiɗa mo, ammaa paataaɗo wonnan mbooɗirka mum.

¹⁴Caahu ngu famɗa-hakkiiloojo hokki ma nafataa ma, bana ngu goɗɗo suunomaajo, mo ɗon hokka sey to ɓe ndooli ɗum ngam sey ko ndokkata mo fottanta mo.

¹⁵O hokke seɗɗa ammaa o fele bee haraka bana piloowo haa luumo. Hannde o hokke nyamaande e jaŋngo o ƴamta. Irin goɗɗo oo o ganyaaɗo.

¹⁶Humakiijo ɗon wi'a: “Mi walaa soobaajo, walaa annditanɗo nafuuda am. Nyaamanɓe nyaamdu am fuu ɗum yettarɓe.”

¹⁷Ammaa yimɓe fuu ɗon njala mo. Ngam njawdi maako kam o heɓraay ndi bee adilaaku, koo nder sooynde boo walaa ko yaali mo. Taa wolwu ko yahaay

¹⁸Ndikka moostaago do'o dow laawol dow wolwugo boliiɗe kalluɗe! Do'ere halluɓe boo laatoto saatunde.

¹⁹Goɗɗo mo eltaaka booɗɗum nanndi bee haala ka yahata, ka goɗɗo tawata tum haa boliiɗe yimɓe ɓe njaŋngaay.

²⁰Yimɓe ngerdataa balndol gurtiiŋgol hunnduko humakiijo ngam o wolwataa ngol wakkati maagol.

²¹Laafuɓe woɗɓe mbaawataa waɗgo kalluɗum. Ɓe poti ɓe ɗaano bee hakkiilo de'iiŋgo.

²²Ammaa woodi woɗɓe ɗon majjina hoore maɓɓe ngam ɓe mbaawataa wi'go aa'a haa goɗɗo mo walaa hakkiilo.

²³Woɗɓe boo, ngam ɓe mbaawataa salanaago soobaajo maɓɓe iinawol, ɓe ngartiran mo konneejo maɓɓe meere.

²⁴Haa neɗɗo, fewre ɗum kuugal nyidduŋgal. En ɗon tawa nde haa faataaɓe.

²⁵Ndikka gujjo dow pewoowo tabititɗo, ammaa gujjo bee pewoowo fuu kalkan.

²⁶Woowaande fewgo ɗum toskaare. Nde suddan pewoowo bee semteende nde timmataa. Riba e waajibi hikma

²⁷Marɗo hikma maraay kuuje ɗuuɗɗe haa ɓe ngerdo ɗum. Marɗo hakkiilo boo fottanan marɓe laamu.

²⁸Demoowo booɗɗo ɗon mooɓta waagaare alkamaari mawnde. Marɗo yerduye mawɓe wo'itinan sooynde adilaaku.

²⁹Caahu e dokke maɓɓan gite hikma'en bana sabakaare dow hunnduko haɗan ɓe waɗgo feloore.

³⁰Hikma cuuɗiika malla risku cuuɗiiŋgu, ɗume ɗum nafata?

³¹Ndikka goɗɗo cuuɗanɗo bilkaare mum dow cuuɗanɗo hikma mum!

³²Ndikka tiinaare mawnde ngam ɗakkotirgo bee Jawmiraawo dow yeeɗgo bilaa jaagorɗo.