Read Fulfulded Sirasid 21 Bible Online

Sirasid 21 - Fulfulded bible

Sirasid 21

¹Doggu hakke! Ɓiŋngel am, to a waɗi aybe, taa meetu e ƴam yaafuye dow aybeeji ma caaliiɗi.

²Doggu hakke bana ɓe ndoggirta yeeso mboodi: To a ɓaditake ndi, ndi ŋatete. Hakke maran nyii'e nannduɗe nyii'e mbarooga mbarooje yimɓe.

³Bana laɓi ki mbeldiiji ɗiɗi, luutgo Tawreeta ɗalan huuduure nde yamɗitittaako.

⁴Doolɗitinki e mawnitaare njahran haa halkere. Mawnitiiɓe kalkan bee jawle muuɗum'en e bee calaaje muuɗum'en.

⁵To laafuɓe ɗon toro Allah, o heɗititto do'a maɓɓe, o neeɓataa hiitango ɓe.

⁶Caliiɗo feloore tokkoto ɗatal hakke'en. Ammaa kulɗo Jawmiraawo jaɓan bee ɓernde woore feloore nde ɓe peli mo.

⁷En keɓtan diga daayiiɗum bolwanɗo booɗɗum. Ammaa to o wonni wolde, marɗo hikma annditan ɗum.

⁸Nyiɓgo saare mum bee jawdi yimɓe, ɗum mooɓtugo kaa'e ngam yenaande mum.

⁹Yedduɓe Allah ɗon bana waare huɗo yoorko ko nafataa: Ɓe timman nder yiite.

¹⁰Laawol halluɓe ɗon ɗiggi, ngol walaa kaa'e ammaa ngol ɗon yahra nder lugguɗum joonde maayɓe. Marɗo hikma e humakiijo

¹¹Tokkiiɗo umroore Jawmiraawo naŋgtan giɗaaɗi mum. Kulol Jawmiraawo yahran haa hikma.

¹²En mbaawataa jaŋngingo mo waawataa koo ɗume. Ammaa woodi dabarewol ngol riman mettamɓeram ɗuuɗɗam.

¹³Anndal marɗo hikma nanndi maayo to waddi, sawari maako boo ɗon bana seeɓoore ndiyam laaɓɗam.

¹⁴Ɓernde paataaɗo nanndi fayannde pusnde, waawataa sigaago anndal no ngal famɗiri fuu.

¹⁵Goɗɗo jaŋnguɗo heɗititto haala marka hikma, o yerdo ka e o lugginan ka. Ammaa daakaareejo tawataa belɗum haa haala man, o sakkinan ka haa geene.

¹⁶Wolde bilkiijo teddan bana doŋngal ngal goɗɗo roondoto haa laawol jahaaŋgal. Ammaa ngeewta marɗo hakkiilo welan tum.

¹⁷Haa kawtal fuu ɓe keɗititto tum ko goɗɗo marɗo hakkiilo wi'ata, ɓe numan dow ko o wi'i.

¹⁸Bilkiijo yawan hikma bana o yawirta winnde, anndal maako luggaay.

¹⁹Haa humakiijo, jaŋngirde ɗon bana callallu haa kosɗe e juuɗe maako.

²⁰To bilkiijo jali, o jalan bee semmbe. Ammaa marɗo hikma kanyum kam moosan tan.

²¹Jaŋngirde nanndi pawne kaŋŋeeri, ɗum jawo haa juuɗe marɗo hakkiilo.

²²Bilkiijo yaawan nastugo saare, ammaa marɗo kirseeku duniyaaru nastan saare bee de'eende.

²³Goɗɗo mo walaa hakkiilo yurnan gal dammugal haa o laara nder saare, ammaa kakkilɗo daroto haa yaasi.

²⁴Heɗitaago haa dammuɗe, ɗum sooynde ne'aare. Ɗum toskaare haa marɓe hakkiilo!

²⁵Ɗuuɗa-haala'en lornan ko woɗɓe mbi'i, ammaa marɓe hakkiilo anndan ko ɓe mbi'ata.

²⁶Humakiijo wolwan tawon nden numa, marɗo hikma numan hiddeko o wolwa.

²⁷To gedduɗo Allah naali konneejo mum, ɗum hoore maako o naali.

²⁸Tuflemaajo wonnan hoore mum e heeddiɗɗiraaɓe maako fuu nganyan mo.