Read Fulfulded Sirasid 23 Bible Online

Sirasid 23 - Fulfulded bible

Sirasid 23

¹Yaa Jawmiraawo, Baabiraawo e Jawmu yoŋki am, taa wudinam haa baawɗe hunnduko am, taa ɗalam mi yollo nder halkere.

²Dartin numo am, eltu ɓernde am boo bee ne'aare hikma, ngam mi laara aybe am, taa mi yejjita hakkeeji ɗi mi waɗi koo bilaa anniya.

³Nden kam mi yowdindirtaa aybeeji, mi waɗataa aybe dow aybe, mi daroto cir yeeso konne'en am, mi accataa ɓe ɓe njaalo yam. Tammoraago hinnuye ma daayake ɓe.

⁴Jawmiraawo, Baabiraawo, Allah jawmu ngeendam am, waɗ no mi mara daarɗe ɗe ngalaa mawnitaare.

⁵Daaytin bee am suunooji nyidduɗi.

⁶Taa giɗaaɗi e suunooji ɓanndu am nastinammi nder tuufnorgol muuɗum'en! Taa yerɓam e suunooji caatuɗi. Jaŋngirde ko laarani boliiɗe: a. Kunayeeje

⁷Ɓikkoy am, ekkite naŋgtugo bolle mon. Tokkiiɗo jaŋngirde nde'e hisan naŋngireego aybe.

⁸Bana tufloowo e mawnitiiɗo, kalluɗo boo naŋngete nder tuufnorgol bolle mum.

⁹Taa woow hunaago malla ewnaago innde Ceniiɗo ndey fuu.

¹⁰Maccuɗo mo jawmum caatuɗo, ɓanndu mum maran ɓattatte. Non kunotooɗo e ewnanɗo innde Allah haa koo ɗume wakkati fuu ɓurdan waɗgo aybe.

¹¹Ɗuɗɗinanɗo kunayeeje ɗuɗɗinan boo luutugo umroore, sarru ukkanto saare maako. To o waɗi ɗum bilaa numgo, o waɗi aybe. To o waɗi ɗum ngam ngorgu, o waɗi aybe cowi ɗiɗi. To o hunake dow fewre, o hiitete kaŋko e saare maako bee torra caatuka. Jaŋngirde ko laarani boliiɗe: b. Dabare wolwugo

¹²Woodi laawol wolwugo nannduŋgol bee maayde — En ngiɗaa fottugo bee maagol haa ruutu Yaakubu! — Ɗowtaniiɓe Jawmiraawo sey daayto ngol, taa tallo nder hakkewol ngo'ol.

¹³Taa woownu hunnduko ma haalaaji laakiiji: Ɗum nastinte nder aybe.

¹⁴Num dow baaba ma e daada ma to a ɗon e mooɓgal ardiiɓe: To naa non a wolwan haalaaji paataaɗi yeeso maɓɓe daliila woowaande. Nyannde man, a miccititto danyeeki ma e a naalan nyannde danyirde ma.

¹⁵Goɗɗo boowɗo laakiiri heɓataa saa'a laataago ne'iiɗo. Hokkugo ɓanndu mum haa daakaareeku: a. Gorko daakaareejo

¹⁶Yimɓe ɗuuɗɓe ɗon mbaaga aybeeji, ammaa woɗɓe ɗon pooɗa tikkere Allah: Jarriboore maɓɓe ɗon wula bana yiite nge nyifataa sey to wuldi fuu. Dokkuɗo ɓanndu mum e daakaareeku accataa sey to wuli haa wulda.

¹⁷Haa jeenoowo kam, debbo fuu foti, o accataa sey to o maayi.

¹⁸Woodi goɗɗo mo ɗon jumja debbo mum, o wi'a: “Moy yi'ata yam? Jemma taari yam, mahi ɗon cuuɗi yam, walaa gi'anɗo yam. Ko hulnata yam? To mi waɗi wooɗaay, gonɗo haa asama suklantaako yam!”

¹⁹Ko goɗɗo man hulata fuu, taa goɗɗo feere laara mo. O anndaa gite Jawmiraawo ɓuran yiitere naaŋge nde cowi ujineere, ɗe ɗon ayna ko yimɓe ngaɗata fuu e ɗe nastan nder nokkuuje ɓurdanɗe suuɗaago.

²⁰Jawmiraawo anndi kuuje fuu hiddeko o taga ɗe. O anndi ɗe hiddeko ɗe halka.

²¹Marɗo aybe fuu naŋngeteeɗo haa wakkatiire nde o tammaaki, o heɓan torra mum haa yeeso yimɓe. Hokkuɓe ɓalli muuɗum'en haa daakaareeku: b. Debbo ajabaajo

²²Ɗum ɗon laato non ngam boo debbo jeenoowo mo ɗowtanaaki gorum, mo waddani mo donoowo mo baaba feere.

²³Aran kam, o ɗowtanaaki umroore Allah Ɓaŋiiɗo. Ɓaawoɗon o torri goriiko. Bee waɗgo njeenu boo, o huuwi bana ajabaajo, o reedi bee gorko feere.

²⁴Ɓe njahran mo yeeso kiita mooɓtorde, ɓe lincitan haa ɓikkoy maako iwi.

²⁵Ɓikkoy man maayan diga nderkaaku maakoy, koy ndanyataa ɓikkoy.

²⁶Toskaare debbo man wilataake haa foroy koo ɓaawo maayde maako, ɓe naalan ko siftorta mo fuu.

²⁷Yeeɗanɓe ɓaawo maako annditan walaa ko ɓuri kulol Jawmiraawo wooɗugo, tokkaago umrooje maako, kanjum woni kaanduɗum.