Read Fulfulded Sirasid 24 Bible Online

Sirasid 24 - Fulfulded bible

Sirasid 24

¹Maŋgtoore Hikma Hikma ɗon waɗa maŋgtoore mum. Caka jama'aare maako Isra'iila, ka ɗon holla seyo maaka.

²Ka ɗon wolwa haa yeeso jama'aare Allah Ɓaŋiiɗo, ka ɗon holla seyo maaka yeeso baawɗe maako.

³Ka wi'i: “Mi wurti e hunnduko Allah Ɓaŋiiɗo. Bana budiire mi suddi lesdi.

⁴Mi ɓaŋgti bukkaaru am dow townde asama, nden mi jo'ini koromwal laamu am haa townde ruuldere nanndunde bee daŋraŋgal.

⁵Mi taari asama fuu, mi waanci nder lugguɗi ndiyamji.

⁶Laamu am we'iti dow ƴuuge ndiyam e dow lesdi fuu, dow jama'aaje e ummaatooje fuu.

⁷Haa maɓɓe fuu mi ɗaɓɓi babal haa mi jooɗo, maral haa mi jooɗo.

⁸Nden Tagɗo duniyaaru umri yam, tagɗo yam boo tinndini yam haa njooɗotoomi: O wi'i yam: “Jooɗa haa Yaakubu, Isra'iila laato maral ma.”

⁹O tagi yam diga fuɗɗam, diga duniyaaru ndu'u tagaaka, mi duumoto haa foroy.

¹⁰Mi ɗonno huuwa yeeso Allah Ɓaŋiiɗo nder bukkaaru seniindu, ɓaawoɗon, dow towndiire Siyona haa njooɗiimi.

¹¹Bana nii Jawmiraawo jo'ini yam haa Urusaliima, berniwol giɗaaŋgol. Haa ton mbaɗmi laamu am.

¹²Mi waɗi ɗaɗi nder jama'aare teddunde, nder maral Jawmiraawo, mi ɗon nder saare am.

¹³Mi mawni ton bana lekki makki ki Liban, bana lekki makki dow towndiire Hermoon,

¹⁴bana dibinoohi haa yayre En-Gedi malla boo bana pinndi mboɗeeri haa Yeriko e bana jaytunhi haa yayre, mi mawni bana lekki booɗki.

¹⁵Mi waanji uurdi am bana uurdi nyaaɗndi, keewal uurŋgal malla ɗaccere uurnde e leɗɗe uurɗe feere feere bana cuurka tamre uurnde nder bukkaaru seniindu.

¹⁶Mi ɗon bana ibbi ki ɗon we'ita lice maaki, lice mawɗe e booɗɗe.

¹⁷Mi ɗon bana inabohi marki lice booɗɗe,

¹⁸pinndi maaki boo waɗan ɓenndalooje booɗɗe e ɗuuɗɗe. Min woni daada yiide mawnde e kulol, daada anndal e tammunde seniinde. Ɓikkoy am fuu, mi ɗon hokka koy jawdi nduumiindi.

¹⁹Ngare haa am, onon gerdiiɓe yam, nyaame, kaare bee ɓenndalooje ɗe mi hokkata on.

²⁰Numgo dow am ɓuran njumri welgo, margo yam ɓuran jogaago njumri ɗuuɗndi.

²¹Nyaamɓe yam ngiɗi ɓesdugo fahin, yarɓe yam maati ɗomka am fahin.

²²Mo ɗowtani yam toskataa sam, mo huuwdi bee am waɗataa aybe.” Hikma e Tawreeta Allah

²³Ko en jaŋngi ɗo fuu, ɗum tawaama nder deftere alkawal Allah Ɓaŋiiɗo. Ɗum Tawreeta ka Muusa umri en, ɗum ndonŋgu ɓiɓɓe Yaakubu nder jama'aare muuɗum'en.

²⁴Taa acce tiinaago haa laawol Jawmiraawo, ɗakkotire bee maako haa o semmbiɗina on. Jawmiraawo Baawɗo o gooto, walaa kisnoowo feere sey kaŋko.

²⁵Tawreeta ɗon heewi hikma, heewi haa facci bana maayo, bana Pijon e Tigiris yaake duumol.

²⁶Ka ɗon rufa anndal bana maayo Efratis paccuŋgo malla boo bana maayo Urdun wakkati codol.

²⁷Ka ɗon rufa jaŋngirde bana maayo Niil to facci malla boo maayo Gihon, wakkati dabbunde.

²⁸Aartuɗo jaŋngugo Tawreeta timminaay anndugo ka, cakitiiɗo boo timmintaa lugguɗum maaka.

²⁹Hikma woodi numooji jaasɗi ɓurɗi weendu yaajugo e sawariiji maaka ɓuran ndiyamji lugguɗi luggugo.

³⁰Min kam, mi seki mi ɗon bana gasol koo'aaŋgol ndiyam ɗam maayo waddata malla boo gasol jahranŋgol ndiyam haa jarne.

³¹Mi wi'i hoore am: “Mi yarnan jarne am, mi rufan ndiyam haa pinndi am.” Ammaa ndaa gasol am warti maayo e maayo am warti bahar.

³²Nden jaŋngirde am jalbitan bana njayawri subaha, nde yaynan daayiiɗum.

³³Mi waanjan nde bana annabaaku, mi accana nde gide garanɗe.

³⁴Ndaare: To mi yari bone, naa ngam hoore am tan, ammaa ngam tefanɓe hikma.