Read Fulfulded Sirasid 26 Bible Online

Sirasid 26 - Fulfulded bible

Sirasid 26

¹Hayru gorko ɓaŋɗo bee laawol Barka laatanto gorko ɓaŋɗo debbo kakkilɗo: Balɗe maako njuutan.

²Debbo kakkilɗo seynan gorum, gorko oo yeeɗan nder jam e hayru duuɓi maako fuu.

³Ɓaŋgugo bee laawol, ɗum saa'a makka! Ɗum caahu Jawmiraawo ngam kulɗo mo.

⁴Koo to gorko laati o diskuɗo malla boo o laafuɗo, ɓernde maako seyan wakkati fuu, yeeso maako hollan seyo. Daayaago rewɓe

⁵Woodi kuuje tati kulnatammi, ammaa huunde nayaɓre ɓuri hulnugo yam: Ɗum tufle feere-feere, ɗum mooɓtugo yimɓe ɗuuɗɓe e seedanaago fewre. Ɗum fuu ɗum naawɗum ɓuri maayde.

⁶Ammaa bone ɓuranɗo mawnugo ɗum laargo debbo mo haajata nawliiko e debbo marɗo ɗemŋgal kalluŋgal.

⁷Debbo kalluɗo waɗan bononndaaji bana kaɓɓirgal dimmbanŋgal haa daaɗe na'i. De'itingo mo nanndi bee naŋngugo yaare.

⁸Debbo guykoowo waɗan sababu, nden o suuɗataa ko semtinta mo.

⁹To a laari gite debbo estanɗe, a faaman joonde debbo oo wooɗaay. Haa yirlugo gite maako, a faaman no o wa'i.

¹⁰To ɓiɗɗo debbo woodi sooynde naŋgtaare, ɓesdu aynugo mo sonaa non o ƴoƴrete ngam daliila a hakkilanaay mo.

¹¹Aynu daarɗe maako ɗe ngalaa semteende, taa hayɗin to o burmi ma.

¹²Bana baɗanɗo jahaaŋgal ɗomɗuɗo yarata ndiyam ɗam o aarti heɓgo fuu, debbo oo taaski waaldugo bee mo aarti wargo fuu. Maŋgtoore debbo timmididɗo

¹³Debbo ŋarniiɗo seynan gorum, bee hakkiilo maako wooɗŋgo o aynan njamu goriiko.

¹⁴Debbo mo ɗuɗɗintaa bolle, ɗum caahu Jawmiraawo. Debbo keɓɗo elto wooɗŋgo, saman maako limataake.

¹⁵Debbo marɗo naŋgtaare, ɗum dokkal ɓurŋgal wooɗugo. Marɗo semteende boo, saman muuɗum walaa keerol.

¹⁶Haa saare laɓɓinaande, debbo ŋarniiɗo nanndi bee wooɗgo naaŋge caka nyalawma.

¹⁷Yeeso wooɗŋgo e ɓanndu woondu nanndi bee annoora jo'inirɗum pittirla haa haykaliiru.

¹⁸Kosɗe booɗɗe dow kolɓule cemmbiɗɗe nanndi bee daŋraŋge kaŋŋeeri dow caɓɓawal cardi.

¹⁹Ɓiŋngel am, aynu nderkaaku ma booɗɗum, taa ɗal semmbe ma haa hoɗɓe.

²⁰Tef ngesa mbooɗka, aaw aawdi ma ton, hoola boo asŋgol ma tedduŋgol.

²¹Nden kam ɓikkoy koy a ɗalata ɓaawo ma mantan ngam haa tedda-asli'en koy iwi.

²²Debbo ajabaajo yottaaki koo tuuɗe, debbo te'aaɗo boo nanndi bee suudu aynordu mbaranndu tefoowo ndu fuu.

²³Debbo geddo Allah hokkete haa hakkeejo, debbo kulɗo Allah boo hokkete haa kulɗo Jawmiraawo.

²⁴Debbo mo semtataa seyorto toskaare, debbo cemtoowo ɗelmanan koo gorum.

²⁵Debbo mo semtataa teddintaake bana rawaandu, ammaa debbo naŋgtiiɗo hulan Jawmiraawo.

²⁶Debbo teddinanɗo gorum ɗon bana marɗo hikma haa yeeso yimɓe fuu, ammaa toskinanɗo gorum yimɓe fuu anndi o geddo Allah, mawnitiiɗo e hakkeejo. Seyo woodani gorko mo debbo mum timmididɗo ngam balɗe maako ɓesdete cowi ɗiɗi.

²⁷Debbo karkoowo e ɗuuɗa-haalaajo nanndi bee algaytaaru anndinanŋgu do'ere. Goriiko timminan ngeendam mum nder konuuji.

²⁸Ndaa kuuje ɗiɗi mettuɗe, ammaa tataɓre umminan tikkere am: Aran ɗum diskuɗo mo laafere fiyi ɗum, ɓaawoɗon, marɓe anndal ɓe woɗɓe njawoto. Ammaa ko ɓurata ɗum fuu, ɗum goɗɗo mo acci waɗgo mbooɗeeŋga ngam waɗgo halleende. Jawmiraawo hoddiranan mo maayde hallunde! Estooji piloowo

²⁹Ɗum caɗɗum haa piloowo acca waɗgo rikici e caɗɗum cippoowo laato adiliijo.