Read Fulfulded Sirasid 27 Bible Online

Sirasid 27 - Fulfulded bible

Sirasid 27

¹Ɗuuɗɓe ngaɗan aybe ngam suuno riba. Tefanɗo risku marataa enɗam.

²Bana gasirgal tiggaaŋgal caka kaa'e ɗiɗi, non boo hakke ɗon nasta hakkunde coorroowo e coodoowo.

³To a hakkilanaay hulgo Jawmiraawo bee tiinaare, saare ma neeɓataa wilgo. Neɗɗo ɗon waŋga nder ko o wolwata

⁴To ɓe ɗon ceɗa kuroori bee kata, ko lutti ɗum suururo. Non aybe neɗɗo ɗon waŋga to o fuɗɗi wolwugo.

⁵Yiite waŋginan saman fayannde nde mahoowo mahi. Bana non boo a faaman saman neɗɗo to a nani ko o wolwata.

⁶Ɓenndalooje ɗon mbaŋgina noy ɓe ndemri ɗe. Bana nii wolde goɗɗo faamtinan ko o numata nder lugguɗum ɓernde maako.

⁷Taa maŋgtu goɗɗo diga o wolwaay ngam bee nango mo tan, ɓe paamata numooji maako. Ribaaji joonde Hikma

⁸To a ɗon tokko adilaaku, a jokkoto ngu, a ɓornoto nafuuda maajum bana limce juulde.

⁹Colli nannduɗi ɗon mooɓto ngam siwtaago. Non adilaaku ɗon yahda bee adili'en.

¹⁰Bana mbarooga aynirta kusel muuɗum, non hakke boo aynirta waɗanɓe kalluɗum.

¹¹Bolle nuɗɗinɗo Jawmiraawo ɗon keewi hikma, ammaa sooya-hakkiiloojo ɗon sannja bana lewru.

¹²Reen wakkatiire haandunde to a yiɗi nastugo saare paataaɗo, ammaa neeɓ to a ɗon caka marɓe hakkiilo.

¹³Bolle faataaɓe ɗon tikkina, to ɓe ɗon njala, ɓe ɗon ngaɗa aybe dow aybe.

¹⁴Bolle hunotooɓe tum umminan gaasa hoore mon, to ɓe ɗon njokkira, sey cukkon noppi mon.

¹⁵Jokkirli mawnitiiɓe, timman tum bee dufki ƴiiƴam, kuudi maɓɓe boo torran noppi. Waawgo sigaago sirri

¹⁶Mo waŋgini sirri, itti hoolaare dow hoore mum, o meetataa heɓgo soobiraawo gooŋgaajo.

¹⁷Yiɗ soobaajo ma, joga amaana maako, ammaa to a waŋgini sirri maako, taa tef heɓtugo soobaaku maako fahin:

¹⁸Ngam maaɗa, soobaaku man halki, bana yoŋki banndiraawo ki maayde halki.

¹⁹Bana sonndu ndu a acci daɗi, fiiri, non a tammaaki heɓtugo soobaajo mo a farti bana nii.

²⁰Taa foondu jokkugo mo: O dilli daayiiɗum bana to lelwa jiɓtake e tuuforgol.

²¹Huuduure yamɗitan malla yimɓe culhindiran ɓaawo kuudi, ammaa waŋgingo sirri, walaa kurgun. Kunnduɗe ɗiɗi

²²Mo yiɗaa gite mon potta woodi anniyaaji kalluɗi. To a tawi mo, taa yahdu bee maako.

²³Yeeso maaɗa bolle maako ɗum sukar e njumri, o yerdoto bolle ma, ammaa to a dilli, o waylita bolle maako o huuwtiran ɗe ma ngam waɗgo ma kalluɗum.

²⁴Mi wanyi kuuje ɗuuɗɗe ammaa walaa bana irin neɗɗo oo, Jawmiraawo maa yerdataako mo. Kalluɗum ɓe ngaɗi fuu, ɓe njoɓan ɗum foroy

²⁵Mo sakkini kaa'e haa dow, ɗe loroto dow hoore maako. To neɗɗo tappi goɗɗo haa ɓaawo, o piyeteeɗo haa ɓaawo kaŋko boo.

²⁶Mo wasi ngaska ngam keeddiɗɗiraawo maako, aartan nastugo ka. Mo waɗi tuuforgol, ngol aartan naŋngugo mo.

²⁷Kalluɗum ɗum ngaɗata fuu solan dow maaɗa bilaa anndaaŋgal ma.

²⁸Jancugo yimɓe malla boo huɗgo ɓe, ɗum kuugal mawnitiiɓe. Baataaki reenan ɓe bana mbarooga reenirta kuuje ladde.

²⁹Mo seyorto bone adili'en, o naŋngeteeɗo nder tuuforgol, o yaran bone hiddeko o maaya. Ndikka yaafaago dow sigaago dugun

³⁰Dugun e tikkere, ndaa kuuje nganyeteeɗe, kalluɗo anndi ɗe booɗɗum.