Read Fulfulded Sirasid 28 Bible Online

Sirasid 28 - Fulfulded bible

Sirasid 28

¹Mo waatanto hoore muuɗum, Jawmiraawo waatoto ɗum. O accataa aybewol maako ko gootol.

²Yaafa deerɗa baɗɗo ma aybe. Nden, to a tori, Jawmiraawo yaafante hakkeeji maaɗa boo.

³To a ɗon tikkani goɗɗo, noy ƴamrata Jawmiraawo o yamɗitine?

⁴Noy a toroto yaafuye aybeeji maaɗa, to an a walaa enɗam bee goɗɗo nannduɗo ma?

⁵To a bee dugun, an ɓii-aadamaajo meere, moy wilata aybeeji maaɗa?

⁶Num dow ragare maaɗa e accu dugun. Num dow maayde e nyolol ɓanndu, joga amaana e umrooje Jawmiraawo.

⁷Siga ɗe haa ciftora ɗe, taa joga keeddiɗɗa nder dugun. Siftor amaana alkawal Allah Ɓaŋiiɗo, yejjitit halleende nde ɓe ngaɗani ma bilaa haɓɓere. Jokkirli

⁸Daaya jokkirli, nii kam a heɓataa laawol waɗgo aybeeji. Ngam saatuɓe umminta jokkirli,

⁹halluɓe aawata tuurtol caka soobiraaɓe e cennduki caka yimɓe narruɓe.

¹⁰To ɓe ɓesdi leɗɗe haa yiite, ɗemɗe yiite ɓesdoto. Non boo to jokkirgol faɓɓi, ngol ɓesdoto wulgo. To neɗɗo woodi semmbe, tikkere maako saatan, to o diskuɗo, tikkere maako ɓesdoto.

¹¹Luural bee juhuki huɓɓan yiite e to jokkirgol ummi, ƴiiƴam rufan.

¹²Fuufgo dow ƴulɓe, huɓɓan yiite. To a tuuti tuuɗe dow maage boo, nge nyifan. A waɗan kuuɗe ɗiɗi ɗe'e fuu bee hunnduko. Ɓilla ɗemɗe kalluɗe

¹³Bone laatanto soofndotooɓe e marɓe ɗemɗe ɗiɗi! Ɓe cakli yimɓe ɗuuɗɓe narrunooɓe.

¹⁴Ɗemɗe kalluɗe jiiɓi yimɓe ɗuuɗɓe. Ɗe ndooli ɓe eggugo lesdi maɓɓe. Ɗe mbili berniiji cemmbiɗɗi, ɗe njiiɓi ci'e tedduɗe.

¹⁵Ɗemɗe kalluɗe ndiiwi rewɓe hakkilɓe e ɗemɗe man cenndiri ɓe bee ko nafuuda kuugal maɓɓe.

¹⁶Nananɗo ɗemɗe kalluɗe de'itittaako, jooɗataako jam.

¹⁷Ɓoccol ɗon acca maandorde muuɗum, ammaa fiygo bee ɗemŋgal yewan i'e.

¹⁸Balmi mbari yimɓe ɗuuɗɓe, ammaa ɗemɗe kalluɗe mbari ko ɓuri.

¹⁹Jam laatano mo ɗemɗe kalluɗe meemaay mo e mo daɗi tikkere maaje! Jam laatano boo mo roondaaki kaɓɓirgal maaje, mo meeɗaay haɓɓeego e callalluuji maaje

²⁰ngam kaɓɓirgol maaje ngol njamndi e callalluuji maaje ɗum njamndi mboɗeeri!

²¹Maayde daliila ɗemɗe kalluɗe, ɗum maayde hulniinde. Ndikka maaygo dow yeeɗgo les baawɗe maaje!

²²Ammaa kanje, ɗe mbaawataa koo ɗume dow adili'en. Ɗemɗe yiite man ngulataa ɓe.

²³Wudinɓe Jawmiraawo, kamɓe ɓen do'oto les baawɗe maaje: Haa maɓɓe, kanje ɗe kuɓɓan yiite nge nyifataa sam. Bana mbarooga, ɗe ndoggan dow maɓɓe, bana paaɗaawu ɗe campitan ɓe.

²⁴To a taari ngesa ma bee kowaagol gi'e, herlu boo dammugal hunnduko ma. To a hakkilanan ceede e kaŋŋeeri ma, hakkilan boo bolle ma.

²⁶Hakkil taa ɗemŋgal ma yahre haa aybe, ngal do'ete yeeso laarndanɗo ma.