Read Fulfulded Sirasid 3 Bible Online

Sirasid 3 - Fulfulded bible

Sirasid 3

¹Saaro'en e ɓikkoy Ɓikkoy am, keɗite sawariiji baaba mon, tokke ɗi ngam haa ngurton ɓillaaje fuu.

²Fakat Jawmiraawo hokki baaba baawɗe dow ɓikkoy mum, o darni ko ɓikkoy ngaɗanta daada maakoy.

³Teddinɓe baaba muuɗum'en keɓan yaafuye hakkeeji muuɗum'en.

⁴Teddinɓe daada muuɗum'en boo cigan ndesaari.

⁵To goɗɗo teddini baaba mum, ɓikkoy mum ceynan mo. To o torake Jawmiraawo, o heɓan jaawaabu.

⁶Teddinɗo baaba mum heɓan juutal balɗe. Ɗowtaniiɗo Jawmiraawo de'itinan daada mum.

⁷Kulɗo Allah teddinan baaba mum, o huuwanan saaro'en maako bana to ɓe jawmiiko'en.

⁸Teddin baaba ma bee kuuɗe ma e bolle ma. Nden kam a heɓan barka maako.

⁹Barka ka baaba hokkata ɓiyum semmbiɗinan saare ɓikkoy. Ammaa naaloore nde daada waɗata yibbinan nde fuu.

¹⁰Taa tef ɓaŋgtugo daraja ma dow baaba ma, toskaare maako darjiɗintaa ma sam.

¹¹Daraja ma iwan diga neɗɗaaku baaba ma. Daada jawaaɗo semtinan ɓiyum'en.

¹²Ɓiŋngel am, wallu baaba ma to naywi, taa ɓillu mo nder ngeendam maako.

¹³To hakkiilo maako tampi, enɗu mo. Taa jogir mo bee yawaare, an marɗo semmbe ma fuu.

¹⁴Jawmiraawo yejjitittaa mbooɗeeŋga ma heedi baaba ma, nga wo'itinan hakkeeji ma ɗuuɗɗi.

¹⁵To a nasti nder ɓillaare, Jawmiraawo siftorte, hakkeeji ma fuu njoosan bana mallimallooje haa naaŋge.

¹⁶Ammaa gudinɗo baaba mum fotan bee geddo Allah. Mettinɗo daada mum ɓernde boo, Jawmiraawo naalan ɗum. Nafuuda yaŋkinaare

¹⁷Ɓiŋngel am, laata jaŋkiniiɗo haa ko ngaɗata fuu. Bana nii yimɓe ngiɗete ko ɓuri caahiiɗo.

¹⁸No a mawniri fuu, laata jaŋkiniiɗo. Nden kam a heɓan mo'ere haa Jawmiraawo.

¹⁹Mawnitiiɓe e ƴaggiiɓe ɗuuɗi ammaa Allah waŋginta sirriiji mum haa yaŋkiniiɓe.

²⁰Jawmiraawo o baawɗo, ammaa haa yaŋkiniiɓe o heɓata tedduŋgal maako.

²¹Taa tef ko ɓurata saɗango ma, taa suklana ko ɓurete semmbe.

²²Num dow ɗum ko laati waajibiijum dow maaɗa. Sutugo kaayeefiiji nafataa ma!

²³Taa nastu nder kuugal ɓuranŋgal ma semmbe. Ko ngi'ɗa nder duniyaaru haa jonta ɓuran ko goɗɗo waawata faamgo.

²⁴Yimɓe ɗuuɗɓe kalki nde ɓe ngiɗi faamgo kuuje fuu e numooji maɓɓe kalluɗi njiiɓi hakkiilo maɓɓe. Tukku e hakkiilo

²⁵To a maraay ɓiŋngel yiitere, a sooyan annoora. To a walaa anndal, taa hokku sawari.

²⁶Timmoode tukkumaajo halli. Giɗɗo sarru maayan nder maagu.

²⁷Boneeji torran tukkumaajo. O huuwan kalluɗum, o ɗon yowndindira aybe dow aybe.

²⁸Mawnitaare walaa kurgun, fakat huɗo halluko waɗi ɗaɗi nder maako.

²⁹Marɗo hakkiilo numan dow balndi ndotti'en. Nofru heɗitanndu, kanjum hikma yiɗi. Ballootiral

³⁰Bana ndiyam nyifrata yiite nge nyaaɗi, nii non caahu wilirta hakkeeji.

³¹Gaɗɗo mbooɗeeŋga ɗon taasko garanɗum muuɗum: To o do'ake, o heɓan walliinde.