Read Fulfulded Sirasid 30 Bible Online

Sirasid 30 - Fulfulded bible

Sirasid 30

¹Elto ɓikkoy Giɗɗo ɓiɗɗo mum fuu salataako eltugo mo bee ɓoccol. Ɓaawoɗon, ɓiɗɗo oo laatoto seeɓoore seyo maako.

²Mo eltan ɓiɗɗo mum booɗɗum, heɓan haa maako seyo maŋngo. O seyoto daliila maako haa annduɓe mo.

³Eltanɗo ɓiɗɗo mum booɗɗum umminan kaajal konne'en mum, yeeso soobiraaɓe maako o heewan seyo.

⁴To baaba oo maayi, ɗon bana o maayaay ngam o ɗali ɓaawo maako nannduɗo mo.

⁵Saa'i o geeto, o seyan laargo ɓiɗɗo maako. Wakkati maayde maako, miccitoore walaa

⁶ngam o ɗalan goɗɗo mo waawan waataago konne'en maako e mo yettan soobiraaɓe maako.

⁷Cuklananɗo ɓiɗɗo mum ɗuuɗɗum, doole o hurgan naawne maako fuu. To ngel wooki seɗɗa nii, ɓernde maako sakloto.

⁸Puccu ngu eltaaka booɗɗum, caɗɗum wa'aago ngu, ɓiɗɗo peeciiɗo jamum, semtataa.

⁹To a ɗon esta ɓiŋngel ma, ngel waddante haa'inaare hallunde. To a ɗon fija bee maagel, ngel woynete.

¹⁰Taa jaldu bee maagel ngam taa a yara bone bee hirƴindirgo nyii'e daliila aybe maagel.

¹¹Wakkati o derkeejo tawon, taa accu mo o ƴaggo, taa maɓɓu boo gite ma dow aybeeji maako.

¹²Eltu mo diga o derkeejo, faɗɗu mo becce, ngam taa o laato saata-hooreejo e nanaro, ɗum torre.

¹³Haɓdu ngam eltugo ɓiɗɗo ma ngam taa o semtine bee elewre maako. Njamu

¹⁴Ndikka laafuɗo jamo e cemmbiɗɗo dow diskuɗo nyawɗo!

¹⁵Dow kaŋŋeeri duniyaaru fuu, mi ɓuran yerdaago njamu cemmbiɗŋgu, dow jawdi ɗuuɗndi ndikka gikku mbooɗŋgu.

¹⁶Walaa jawdi ɓuranndi njamu ɓanndu, walaa hayru ɓuranɗo ɓernde seyiinde.

¹⁷Ndikka maayde dow joonde yurumnde, ndikka siwtaare duumiinde dow nyawu tokkitiiŋgu!

¹⁸Nyaamduuji belɗi ɗi ɓe ndokkata nyawɗo mo hunnduko welaa nanndi bee nyaamdu lii'anaandu lawru.

¹⁹Ɗume lii'anaago ɗum lawru nafata? Walaa ko ɗum nafata ngam ndu nyaamataa e maatataa dakam! Ɗum hoddiroore nyawɗo mo Jawmiraawo torrata.

²⁰O laaran ko ɓe ndokkan mo, nden o uuman, bana cortaaɗo mo ɗon harlotira bee paanyo debbo: Non ɗum laatanto kiitotooɗo bee semmbe. Riwgo suno

²¹Taa ɗal hoore ma nder suno, taa hebbin hoore ma bee numooji.

²²Seyo ɓernde yeeɗnan ɓii Aadamaajo, ɗum juttinan mo balɗe.

²³Waylitit numooji ma, ɓesdu cuusal, daaytin suno e maaɗa ngam ngo halki ɗuuɗɓe e ngo nafataa koo ɗume.

²⁴Suuno e ɓernuki ndamminan ngeendam, numooji naywinan law.

²⁵To ɓernde seyake, nyaamdu welanan hunnduko, goɗɗo hakkilanan ko o nyaamata boo.