Read Fulfulded Sirasid 31 Bible Online

Sirasid 31 - Fulfulded bible

Sirasid 31

¹Saɗirmaaji jawdi Laruuraaji tampinan njamu diskuɗo, kaɗan mo ɗaanaago.

²Laruura kaɗanka ɗaanaago ɗon bana nyawu caatuŋgu, ka fartan ɗoyɗi.

³Diskuɗo soman mooɓtugo jawdi, to o siwti, o haaran e welwelooji.

⁴Laafuɗo tampan daliila sooynde kuuje kaanduɗe, nden to o dari, bone maako tullitan.

⁵Giɗɗo kaŋŋeeri hisataa aybe: Bee ɗaɓɓugo riba, o daayoto laawol booɗŋgol.

⁶Ɗuuɗɓe laati aybinaaɓe ngam suuno kaŋŋeeri, ɓe tawti ko'e maɓɓe nder nattere,

⁷ngam kaŋŋeeri ɗum tuuforgol ngam suunaaɓe ndi e sooya-hakkiilo'en boo naŋngaaɓe nder maagol.

⁸Barka laatanto diskuɗo mo felataake e mo riskaay bee ɗaɓɓugo kaŋŋeeri!

⁹Ɗum moy? Sey en mana mo, ngam feere maako nder yeɓre maako, o waɗi kaayeefiiji caka ummaatoore maako!

¹⁰Moy waawata munyango jarriboore nde'e haa timmoode? Kaŋko o foti o mawnito. Moy waawino waɗgo aybe e o waɗaay? Malla o waawino waɗgo halleende, o waɗaay nde?

¹¹Goɗɗo oo yi'an hayru maako ɓesdi, ɓe mbaŋginan yeeso yimɓe fuu mbooɗeeŋga maako. To a ɗon nyaamda bee goɗɗo tedduɗo

¹²To a ɗon nyaamda bee goɗɗo tedduɗo, taa maɓɓitit hunnduko bee wi'go: “Kay! Kuuje booɗɗe e ɗuuɗɗe!”

¹³Siftor, laargo kuuje bee suuno, ɗum aybe. Walaa huunde ɓurnde yiitere hallugo, ngam maajum nde ɗon woya nde ɗuuɗɗum.

¹⁴Taa yahru juŋngo ma haa taƴre nyaamdu nde goɗɗo laari, to naa non, juŋngo ma fottan bee ngo maako nder taasawo nyaamdu.

¹⁵Sey keɓta bee hoore ma ko waawan fottango keeddiɗɗiraawo ma, nden num tawon ko ngaɗata.

¹⁶Nyaam bana marɗo elto wooɗŋgo, taa ɓe nganye daliila suuno ma.

¹⁷Hollu elto ma wooɗŋgo: Aartu ummaago haa pellel nyaamdu, ngam taa suuno ma mettina goɗɗo ɓernde.

¹⁸To a ɗon nyaamda bee yimɓe ɗuuɗɓe, taa aartu hoo'ugo nyaamdu.

¹⁹Eltaaɗo ɗon seyoro huunde seɗɗa! To o ɗon waali haa leeso, o walaa ɓilla.

²⁰Mo ɗon nyaama bee hakkiilo maatan ɗoyɗi belɗi, o ummo fajiri cub o jamo koo ɗume! Ɗoyŋgol naawŋgol, tuure, naawreeŋga reedu, ɗum geɗal suunoma'en!

²¹To ɓe ndooli ma nyaamgo ɗuuɗɗum, yah tuutoy yaasi, nden ɗum hoynante.

²²Nananam booɗɗum ɓiŋngel am, taa yaw ko mbi'anmaami: Yeeso seɗɗa a faaman, mi woodi gooŋga. Kuuɗe ma fuu waɗ ɗe bee yaŋkinaare, a hisan nyawuji.

²³To goɗɗo ɗon ewno yimɓe haa ɓe nyaama, ɓe fuu maɓɓe ɓe teddinan mo: Kanjum hollata laaɓɗum o caahiiɗo.

²⁴Ammaa to goɗɗo laatake ndiŋaajo, wuro fuu wolwan dow maako: Kanjum hollata ndiŋaare maako.

²⁵Bee inaboojam, taa waɗ bana a cemmbiɗɗo ngam ɗam sarri yimɓe ɗuuɗɓe.

²⁶Nguleeŋga huɓɓirde waŋginan kuugal gudiijo, non inaboojam boo laati: Ɗam waŋginan gikku mawnitiiɓe haɓanɓe.

²⁷Fodde yimɓe, inaboojam laati alaama ngeendam, to ɗam yarete bee hakkiilo. Ngeendam ɗame mareten to inaboojam walaa? Haa fuɗɗam duniyaaru Allah tagi ɗam ngam seynugo ɓiɓɓe Aadama.

²⁸To ɗam yaraama bana no haani e ɓuraay ko haani, inaboojam welnan joonde, waddan seyo haa ɓernde.

²⁹Ammaa to a yari ko ɓuri ma semmbe, ɗam hallinan joonde, ɗam tuurtinan yimɓe e ɗam liililtinan ɓe.

³⁰Wuykere ɓesdan ɓernuki sooya-hakkiiloojo, haa yerɓa mo nder semteende, nde tampinan mo e nde waddanan mo piyɗe.

³¹To a ewnaama haa nyaamduuji bee inaboojam mbelɗam ton, taa fel keeddiɗɗa, taa leesnu mo, taa wolwan mo naawɗum, taa ɓillu mo bee ƴamtugo mo ceede ɗe tokkuɗa mo.