Read Fulfulded Sirasid 32 Bible Online

Sirasid 32 - Fulfulded bible

Sirasid 32

¹Ne'aare nder nyaamduuji To ɓe ardini ma haa nyaamdu juulde, taa mawnitin hoore ma, laatin hoore ma bana ewnaaɓe woɗɓe. Suklana hokkugo ɓe joonde, nden yah jooɗa,

²timmin kuugal ma, ɓaawoɗon yah jooɗa, ngam ceya yi'go ɓe seyiiɓe, keɓa mbarjaari kuugal ma timmididŋgal.

³To a ɓuri ɓe ndottaaku, wolwu. Ammaa sey mbolwa dow ko annduɗa tan, taa haɗ yimre juulde.

⁴Taa ɗuɗɗin boliiɗe to yimɓe fuu ɗon heɗita yimre juulde e gime. Naa ɗum wakkati hollugo hikma maaɗa.

⁵Gime haa juulde mbooɗi bana hayre marnde saman jo'inaande dow halagaare kaŋŋeeri.

⁶Gime to ɗon njahda bee inaboojam mbelɗam, ɗum wooɗi bana luuluuri jo'inaandi dow yawo kaŋŋeeri.

⁷To a ɓuri luttuɓe nderkaaku, taa wolwu sey to ɗum haani malla boo sey to ɓe ƴami ma nde ɗiɗi malla nde tati.

⁸To a wolwi, taa ɗuɗɗin boliiɗe, wolwu dow kuuje ɗuuɗɗe bee boliiɗe seɗɗa non. Hollu a anndi ko saali fuu ammaa a anndi boo naŋgtugo ɗemŋgal ma.

⁹Caka yimɓe tedduɓe, taa teddin hoore ma. Haa ndotti'en ngoni, taa wolwu bilaa hikma.

¹⁰Bana ma'ere aartata felmaaŋgo, non mbooɗeeŋga yimɓe dow goɗɗo jaŋkiniiɗo.

¹¹To wakkati man yottake, umma taa neeɓ ton, ammaa hootu saare ma law.

¹²Ton a foti a fija, ngaɗa ko ngiɗɗa, ammaa taa waɗ aybe bee boliiɗe mawnitiiɗe.

¹³Ngam daliila welwelooji ɗi'i, yettu Allah tagɗo ma, kaŋko kebbinɗo ma bee barkaaji ɗuuɗɗi. KAƁƁOL WASUYEEJI NAYAƁOL Anndititgo laamu Allah

¹⁴To goɗɗo annditi baawɗe Jawmiraawo, o jaɓan jaŋngineego. Tefanɓe muuyo maako diga fajira keɓan mbooɗeeŋga maako.

¹⁵Jaŋnganɗo Tawreeta maako heɓan nder maaka ko ɓuri kuuje kaanduɗe, ammaa tefanɓe fewango ka, ɓe naŋngeteeɓe nder tuuforgol.

¹⁶Hulɓe Jawmiraawo keɓtan ko Allah yiɗi, mbooɗeeŋga maɓɓe yaynan bana annoora.

¹⁷Goɗɗo kalluɗo saloto pelooje, o ɗon fassitira Tawreeta fodde giɗaaɗi maako.

¹⁸Kakkilɗo yejjitittaa numgo, ammaa jancoowo e mawnitiiɗo kulataa koo ɗume.

¹⁹Taa waɗ koo ɗume bilaa numgo, nden a miccitittaako ɗum sam.

²⁰Taa tokku laawol kalluŋgol ngam taa a fergo dow kaa'e.

²¹Taa hoola laawol ngol a meeɗaay tokkaago,

²²reenta e ɓikkoy ma.

²³Nder ko ngaɗata fuu, aynu hoore ma. Kanjum woni tokkaago umrooje.

²⁴Ɗowtanaago Tawreeta ɗum aynugo hoore mum, koolanɗo Jawmiraawo miccitittaako.