Read Fulfulded Sirasid 33 Bible Online

Sirasid 33 - Fulfulded bible

Sirasid 33

¹(36) Kulɗo Jawmiraawo hisan sarru. Wakkati ɓillaare, o kisneteeɗo.

²Hikmaajo wanyataa Tawreeta, ammaa mo fewanta ka nanndi bee koommbowal nder henndu saatundu.

³Marɗo hakkiilo ɗon hoola wolde Jawmiraawo. Haa maako kam, Tawreeta he'i jaɓeego bana koŋngol limanjo. Paataaɗo e jancoowo

⁴To a yiɗi yimɓe keɗite, sey taaska ko mbolwata. Siftor ko annduɗa hiddeko njaaba.

⁵Numooji paataaɗo ɗon ngirlo bana kosɗe puspus, hakkiilo maako ɗon bana falloore yirlannde.

⁶Soobaajo giɗɗo jancugo yimɓe nanndi bee puccu kijotoongu ba'anɗo ngu keso. Allah peerɗindiroowo

⁷Jayŋgol naaŋge ɗon yaynana nyalɗe nder nduuɓu fuu. Koni nyalaade kazaare ɓuran nyalɗe goɗɗe saman?

⁸Jawmiraawo tagi ɗe feere feere, o senndiri wakkatiiji juulɗe.

⁹Caka maaje, o teddini nyalɗe ceniiɗe, o ɗali luttuɗe boo nder limgal nyalɗe meere.

¹⁰Non boo yimɓe fuu tagraama bee mbulwuldi bana Aadamu mo Allah tagi bee lesdi.

¹¹Jawmiraawo nder hikma mum tagi ɓe feere feere, o waɗani ɓe koddirooje feere feere boo.

¹²O barkiɗini woɗɓe bee jo'ingo ɓe haa dow, o seni woɗɓe feere boo ngam ɓe ɓadito mo. Ammaa luttuɓe, o naali ɓe e o leesni ɓe, o jippini ɓe diga joonde maɓɓe.

¹³Bana loope nder juuɗe mahoowo payanɗe, mahoowo waɗan bee maaje ko o yiɗi, bana non yimɓe haa juuɗe tagɗo ɓe: Ɓe njo'inaaɓe yeeso hoddiroore nde Allah hoddirani ɓe.

¹⁴Yeeso halleende, mbooɗeeŋga ɗon, yeeso maayde, ngeendam ɗon. Bana non boo, yeeso adili'en woodi yedduɓe.

¹⁵Non a laardata ko Allah mo asama tagi fuu: Koo ɗume fuu ɗon bee ɗiɗaɓum mum, waato woore ɗon dartano woɗnde. Binnduɗo deftere nde'e ɗon hiiso kuugal mum

¹⁶Min, mi sakiti wargo haa kuugal bana teɓoowo bukki ɗi teɓooɓe ngejjiti haa ngesa inabooje.

¹⁷Ammaa bee mo'ere Allah barkiɗinɗo yam, mi jokki aartuɓe yam koo nde mi sakiti, nden bana teɓoowo inabooje fuu, mi hebbini ɓiɗɗirde am. Ndimu

¹⁸Paame booɗɗum: To mi ɓilli hoore am, naa ngam hoore am tan, ammaa ngam tefanɓe anndal fuu.

¹⁹Nane e kakkiilaneeɗam, onon ardiiɓe lesdi e ardiiɓe jama'aare.

²⁰Nder joonde ma, taa accu ɓiɗɗo ma malla debbo ma mara baawɗe dow ma, koo deerɗa malla soobaajo ma boo. Non boo, taa halfin jawdi ma haa goɗɗo. Bana nii a marataa haaje ƴamtugo mo to a miccitake waɗgo ɗum.

²¹To a ɗon bee yoŋki, taa accu goɗɗo mare.

²²Yeeso ɓikkoy maaɗa, ndikka laatoɗa dokkoowo dow dookoowo.

²³Nder ko mbaɗata fuu, waɗ ɗum bana jaagorɗo, ngam taa usta nannanti ma.

²⁴To ragare balɗe ma yotti, senndu ndonŋgu ma. Noy jogugo maccuɓe?

²⁵Geene, piyɗe, cabbi e doŋle tedduɗe ɗon ngam wamnde. Nyaamdu, ɗowtaare e kuugal ɗon ngam maccuɗo.

²⁶To a ɗon hokka kuugal haa maccuɗo ma, a heɓan de'eende. To a acci mo o huuwa ko o yiɗi, o tefan doggugo.

²⁷Bee kaɓɓirgal e ɓoggi, ɓe ɗon nyobba hoƴƴudu ngaari. Ngam ɗelmingo maccuɓe halluɓe, sey sawru.

²⁸Huuwnu maccuɗo ma ngam taa o laato o meereejo:

²⁹Joonde meere woni daada aybeeji fuu.

³⁰Suklu mo bee kuugal ngam o ɗon ngam maajum. To o ɗowtanaaki ma, haɓɓu mo bee callallu. Ammaa, taa laatoɗa caatuɗo bee koo moy fuu, taa waɗ koo ɗume ko luuti adilaaku.

³¹To a woodi maccuɗo, aynu mo bana aynirta hoore ma ngam a soodi mo caɗɗum jamum. To kaŋko tan maccuɗo ma, laar mo bana deerɗa ngam bana no marɗa haaje yoŋki ma, non mardirta haaje maako boo.

³²To a yarni mo bone e o doggi kam,

³³noy a ɗaɓɓitirta mo?