Read Fulfulded Sirasid 34 Bible Online

Sirasid 34 - Fulfulded bible

Sirasid 34

¹(31) Koyɗi Tammuɗe meere cargan sey faataaɓe, koyɗi boo fiirnan sooya-hakkiilo'en.

²Jo'ingo tammunde dow koyɗi, ɗum naŋngugo mbeelu malla tokkaago henndu.

³Ko yi'ete nder koyɗi nanndi bee mbeelu bana goɗɗo gi'anɗo yeeso mum haa daarorgal.

⁴Ɓe ngurtinan huunde laaɓnde nder ko soɓi na? Ɓe ngurtinan gooŋga nder fewre na?

⁵Hiila, fillaye e koyɗi, ɗum fuu ɗum nafataa sam. Ɗum ɗon bana numo debbo nder luuwe!

⁶Taa jo'in tammunde dow maajum sam, sonaa to Allah mo asama neldani ma ɗum ngam maatingo ma.

⁷Koyɗi majjini ɗuuɗɓe, waatanɓe hakkiilo dow maaji ndo'i. Jahaale

⁸Tawreeta Allah timmididka daayi bee numooji paataaɗi ɗi'i. Gal kunnduɗe adili'en, hikma wurtoto laaɓɗum tal!

⁹Gaɗanɗo jahaaŋgal ekkititto kuuje ɗuuɗɗe. To goɗɗo woodi kirseeku maŋngu, o wolwan bee hikma.

¹⁰Mo meeɗaay jarribeego woodi anndal seɗɗa tan,

¹¹ammaa gaɗanɗo jahaaŋgal heɓan anndal ɗuuɗŋgal.

¹²Nder jahaale am, mi laari kuuje ɗuuɗɗe, mi faami kuuje ɗuuɗɗe ɓurɗe ko mi waawata limtugo.

¹³Wakkati feere mi ɗonno yeeso joote maayde, ammaa mi daɗi barka kirseeku am. Ɗowtanaago Jawmiraawo

¹⁴Hulanɓe Jawmiraawo, balɗe muuɗum'en njuutinan

¹⁵ngam ɓe ɗon koolo Kisnoowo.

¹⁶Teddinɗo Jawmiraawo hulataa koo ɗume: O diwnataa ngam o jo'ini tammunde maako dow Allah.

¹⁷Barka laatanto ɗowtaniiɗo Jawmiraawo!

¹⁸Dow moy o jo'inta tammunde maako? Moy wallata mo?

¹⁹Gite Jawmiraawo ɗon ngi'a yiɗɓe mo tum. Aynoowo baawɗo, balloowo cemmbiɗɗo, ɗowirde faddannde henndu wulndu, ɗowdi les naaŋge nyalawma, o faddan ɓiɓɓe maako diga saɗirmaaji, o aynan ɓe taa ɓe ndo'o.

²⁰O hesɗitinan cuusal, o jalbitinan gite bee seyo, o hokkan njamu, ngeendam e barka. Dewal potananŋgal Allah

²¹Lii'ango Allah ndabbaawa keɓraŋga bee faasikaare, ɗum jancugo mo.

²²Allah jaɓataa dokke iwɗe haa ɓen ɓe tokkaaki Tawreeta maako.

²³Jawmiraawo mo asama yerdataako dokke yedduɓe, o yaafataako hakkeeji daliila limgal dabbaaji kirsaaɗi.

²⁴Waɗgo dokkal bee jawdi laafuɗo, ɗon bana hirsugo ɓiɗɗo yeeso baaba muuɗum.

²⁵Laafuɗo heɓan ko o nyaama bee caɗɗum. Haɗgo mo ɗum laataago mbaroowo hoore.

²⁶Jaɓtugo nguure keeddiɗɗiiko, ɗum mbargo mo.

²⁷Jaɓtugo keeddiɗɗiiko nguure mum, ɗum mbargo hoore boo.

²⁸Oo ɗon maha, oya boo ɗon yibbina. Ɗum saklere meere haa ɗiɗo fuu.

²⁹Oo ɗon toro, oya boo ɗon naala. Moy caka ɗiɗo ɓe'e jawmum nananta?

³⁰To goɗɗo senake yaake o meemi maayɗo, nden o meemi mo fahin, ɗume senaare maako nafi?

³¹Non ɗum laati nde goɗɗo suumi ngam hakkeeji mum njaafe. To o lortake dow hakke man fahin, moy nanata tornde maako? Ɗume o heɓata bee leesnugo hoore maako?