Read Fulfulded Sirasid 35 Bible Online

Sirasid 35 - Fulfulded bible

Sirasid 35

¹Keeddiɗɗiraawo e dokke Saman tokkaago Tawreeta foti bee saman dokke ɗuuɗɗe.

²Jogaago umrooje maako foti bee kirseteeɗi ngam kawtal Allah bee yimɓe.

³Waɗango goɗɗo mbooɗeeŋga nanndi bee dokkal kuroori ɗiggundi.

⁴Hokkugo huunde haa talakaajo, ɗum dokkal ngam maŋgtugo Allah.

⁵Ko fottani Jawmiraawo, ɗum daayaago halleende. Accugo ko o yerdaaki fotan bee dokkal ngam heɓgo yaafuye maako.

⁶Ammaa taa war yeeso Jawmiraawo juuɗe meere

⁷ngam kaŋko umri en kirseteeɗi ɗi'i fuu.

⁸Dokkal adiliijo ɗum dokkal timmididŋgal, uureeŋga maagal yottoto haa Allah Ɓaŋiiɗo.

⁹Allah jaɓan dokkal adiliijo, o yejjitittaa uurle ɗe ɓe ɗon ngula dow hirsirde.

¹⁰Laatoɗa caahiiɗo to a ɗon teddina Jawmiraawo. To a ɗon wadda ko gese ma ndimi, taa ustu sam nder ko haandani mo.

¹¹To a ɗon waɗa dokkal fuu, sey moosa. Waddu zakka ma boo bee seyo.

¹²Hokku Allah Ɓaŋiiɗo fodde ko o hokki ma, laatoɗa caahiiɗo bee maako fodde jawdi ma.

¹³Jawmiraawo laataaki gettaro, o hokkititte ko ndokkuɗa mo cowi joweeɗiɗi. Kiitoowo adiliijo

¹⁴Taa foondu soodgo ballal Allah ngam o saloto dokke ma.

¹⁵Taa foondu hokkugo dokkal bee jawdi ngujjaandi: Jawmiraawo o kiitoowo mo suklantaako kuuje dow-dowje.

¹⁶O wudintaa laafuɗo ammaa o jaɓan tornde toonyaaɗo.

¹⁷O yawataa atiimeejo torotooɗo mo malla debbo jurumɗo mo siŋkani mo,

¹⁸ammaa o yi'an gonɗi ilanɗi dow gole maako

¹⁹e o nanan wullaandu ndu o wullori boynuɗo mo.

²⁰Kuuwananɗo Jawmiraawo fuu, Jawmiraawo jaɓɓoto mo kommbi muuɗum, tornde maako yottoto haa asama.

²¹Ooho, tornde laafuɓe yottan asama. Nde siwtataako sam sey to nde yottake Allah. Nde lorataako ɓaawo boo sey to Ɓaŋiiɗo ta'i kiita

²²ngooŋɗuka ngam adili'en. Jawmiraawo neeɓataa jaabaago, o munyantaa halluɓe. Wakkati waran ngam o yewa keeci ɓen ɓe enɗataa koo moy,

²³nden o tuurtan dow jama'aaje goɗɗe. Wakkati waran nde o wilan mawnitiiɓe ɗuuɗɓe ɓe'e, o fusan baawɗe maɓɓe cooyɗe adilaaku.

²⁴O warjoto ɓiɓɓe Aadama fodde kuuɗe maɓɓe e anniyaaji maɓɓe boo.

²⁵O ta'an kiita dow ummaatoore maako bee enɗam, o hokkan nde seyo maare.

²⁶Mbooɗeeŋga waŋgan nder wakkati bone bana duule iyeende nder wakkati ceeɗu.