Read Fulfulded Sirasid 36 Bible Online

Sirasid 36 - Fulfulded bible

Sirasid 36

¹Tornde ngam ummaatoore Allah Yurmin min yaa Allah, jaagorɗo duniyaaru fuu.

²Waɗ no ummaatooje fuu anndita an woni Allah.

³Sey juŋngo ma barro ummaatooje jananɗe ngam ɗe paama fakat an woni jaagorɗo.

⁴Bee hiitaago aybeeji amin a holli ɓe no a wa'i. Bee torrugo ɓe, a hollan min maŋngu ma.

⁵Sey ɓe ekkito anndugo ma bana no min ekkitori minin boo: Walaa Allah feere sey an Jawmiraawo!

⁶Hesɗitin kuuɗe maaɗa kayniiɗe, waŋgin kaayeefiiji ma fahin.

⁷Huuw, teddin juŋngo ma nyaamo.

⁸Tikkere ma fetta, sey nde saŋkito

⁹ngam wilgo konne'en amin, ngam namgo wanyɓe min!

¹⁰Waŋgin nii seɗɗa wakkati ragare, taa yejjitit, an darni wakkati man. Bana nii ɓe ngeewtan koo toy dow kuuɗe ma mawɗe.

¹¹Yiite tikkere ma moɗa luttuɓe! Sey toskooɓe ummaatoore ma mbile dow laawol!

¹²Yaaɓ ko'e ardiiɓe konne'en, wi'anɓe: “Walaa goɗɗo feere, sey minin.”

¹³Hawtu le'i Yaakubu fuu,

¹⁶hokkitit ɗi lesdi ndi a hokkino ɗi diga fuɗɗam.

¹⁷Jawmiraawo, yurmin ummaatoore ma, kayre nden jogi innde ma. Yurmin Isra'iila, an laatini mo afo ma.

¹⁸Waŋgin mbooɗeeŋga ma ngam berniwol haykaliiru ma, ngam Urusaliima, pellel joonde ma.

¹⁹Sey Siyona heewa bee yimɓe maŋgtooɓe ma! Hebbin haykaliiru ma bee tedduŋgal maaɗa.

²⁰Hollu Isra'iila woni ummaatoore ma, kayre tagɗa diga fuɗɗam. Nden timmitin iinaaji ɗi annabi'en ma mbaŋginino bee innde ma.

²¹Hokku hooliiɓe ma ko a iini ngam yimɓe paama annabi'en ma ke'i hooleego.

²²Jawmiraawo, a enɗoowo ummaatoore ma, nan tornde huuwanooɓe ma ngam haa duniyaaru fuu anndita an woni Jawmiraawo, Allah haa foroy. Anndititgo ko ɓuri wooɗgo

²³Reedu ɗon jaɓa ko nyaamete fuu, ammaa woodi nyaamduuji feere ɓuran goɗɗi welgo.

²⁴Hunnduko ɗon maata dakam kusel ladde. Bana non boo kakkilɗo heɓtirta to ɓe pewi ɗum.

²⁵Saata-hooreejo saklan! Ammaa marɗo kirseeku hokkitan mo ko haanani mo. Suɓgo debbo

²⁶Debbo jaɓan gorko mo ɓe ndokkata mo, ammaa budurwa'en woɗɓe te'eteeɓe ɓuran woɗɓe wooɗgo.

²⁷Ŋarol debbo seynan gite gorum: Walaa ko o ɓurata yerdaago fahin.

²⁸To o anndi boo wolwugo bee laawol e bee hakkiilo, a tawataa gorko ɓuranɗo mo seyo.

²⁹Mo te'i debbo, heɓi jawdi ɓurndi jawle fuu. O balloowo maako, daŋraŋgal maako.

³⁰To kowaagol woodaa, ngesa yoofaama haa wuyɓe. To debbo walaa boo, gorko laatoto jurumɗo, o anndaa toy o yahata.

³¹Ɓe koolataako gujjo ƴoyɗo, giilotooɗo berniiji, non boo goɗɗo mo walaa saare, baalanɗo haa toy fuu haa jemma tawi mo.