Read Fulfulded Sirasid 37 Bible Online

Sirasid 37 - Fulfulded bible

Sirasid 37

¹Soobiraaɓe feere feere Soobaajo fuu wi'an: “Min boo, mi soobaajo ma!” Ammaa woɗɓe laati sooba'en bee innde tan.

²Kayto, ɗum metteeŋga maŋnga to soobaajo ma mo daande e hoore laatake konneejo ma!

³Woowaande halleende amin, toy nde iwi? Kanjum hebbini duniyaaru bee rikici.

⁴Oo o soobaajo ma ngam hayru ma. Ammaa saa'i sarru, o tuurtante.

⁵Oya boo o soobaajo mo ɗon yarda bone bee ma nde a ɗon nyaamna mo. Ammaa to wakkati haɓre yotti, o suuɗoto ɓaawo ndarganaawal.

⁶Taa yejjitit soobaajo ma to a ɗon nder konu. Siftor mo boo to a heɓi ndahalaagu. Sawariiji ɗiye he'i hooleego?

⁷Carwotooɗo fuu, sawariiji muuɗum maŋgtata. Ammaa woɗɓe feere, sey riba maɓɓe tan ɓe tefata.

⁸Hakkilan dokkoowo ma sawari! Tef faamgo ɗume o ɗaɓɓata bee sawariiji ɗi'i ngam o ɗon numa ko waddanta mo riba. Hakkil ngam teema o ɗon tefa hoo'ugo ko marɗa.

⁹To o wi'i ma: “A suɓi dabarewol booɗŋgol” nden boo o daroto daayiiɗum bee ma ngam haa o laara ko tawete.

¹⁰Taa ƴam sawari haa kaajuɗo ma, suuɗ anniyaaji ma haa haajuɓe ma.

¹¹Taa ƴam sawari haa debbo dow nawliiko malla haa kulɗo haala haɓre malla haa piloowo dow ko coodata malla haa coodoowo dow ko coorrata. Taa ƴam sawari haa suunomaajo dow haala yettoore malla haa kalluɗo dow mbooɗeeŋga. Taa ƴam meereejo sawari dow kuugal malla kuuwoowo ngeenaari dow hitaande timmoode kuugal malla kuuwoowo mbaaseejo dow kuugal maŋngal ngal o tammi waɗgo. Taa suklan sawariiji yimɓe ɓe'e sam.

¹²Hoo'u wakkati ma fuu bee goɗɗo gooŋgaajo mo annduɗa ɗon tokko umrooje Allah. Numooji mon gooti e to a heɓi torra, o wondan bee ma nder naawɗum.

¹³Hoola anniyaaji iwɗi haa ɓernde ma: Walaa carwotooɗo ɓuranɗo hoolaare.

¹⁴Ndego, neɗɗo maatiniiɗo ɓuran sawari aynooɓe joweeɗiɗo aynanɓe haa dow suudu aynirdu.

¹⁵Ammaa ko ɓuri fuu, tora Ɓaŋiiɗo ɗowa ma haa laawol booɗŋgol. Sey hikma nafa woɗɓe feere boo

¹⁶Hiddeko puɗɗa kuugal, waɗ sawari dow maagal. Num booɗɗum hiddeko kuuwa koo ɗume fuu.

¹⁷Nder ɓernde numooji fuu iwata.

¹⁸Nde wurtinan laabi nayi: Mbooɗeeŋga malla halleende, ngeendam malla boo maayde, ammaa tum ɗemŋgal waɗata ɗum.

¹⁹Yimɓe feere mbaawan dawranango woɗɓe, ammaa ngam ko'e maɓɓe, ɓe mbaawataa waɗgo koo ɗume.

²⁰Ɗuuɗa-haala'en boo, yimɓe nganyan ɓe, koo nyaamdu seɗɗa, ɓe keɓataa.

²¹Ngam ɓe keɓaay haa Jawmiraawo barka fottango woɗɓe, ɓe ngalaa hikma koo seɗɗa.

²²Woɗɓe mari hikma ammaa ngam bote maɓɓe tan. Ko ɓe keɓata bee faamu maɓɓe, kamɓe ɗum nafata.

²³Ammaa woɗɓe boo mari hikma ngam bote ummaatoore muuɗum'en, ko ɓe keɓata bee faamu maɓɓe, ɗum kooleteeɗum.

²⁴Marɗo hikma o barkiɗinteeɗo, yi'anɓe mo fuu mbi'an o ceyiiɗo.

²⁵En mbaawan limgo balɗe goɗɗo, ammaa balɗe Isra'iila limataake.

²⁶Marɗo hikma ngam daliila ummaatoore mum heɓan tedduŋgal, innde maako tabitan haa foroy. Margo naŋgtaare

²⁷Ɓiŋngel am, nder joonde ma haa duniyaaru, foondu hoore ma: Heɓtu ko halli ngam ma, nden wudin ɗum.

²⁸Ngam koo ɗume fuu yahantaa koo moy fuu, koo moy yerdataako koo ɗume fuu.

²⁹Mar naŋgtaare yeeso kuuje belɗe, taa diwnan nyaamdu.

³⁰Ngam nyaamgo ɗuuɗɗum nyawnan e ɗuɗɗingo nyaamdu dohan ɓernde.

³¹Yimɓe ɗuuɗɓe maayi ngam ɓe naŋgtaay. Aynanɗo hoore mum juttinan balɗe mum.