Read Fulfulded Sirasid 39 Bible Online

Sirasid 39 - Fulfulded bible

Sirasid 39

¹e mo ɗon ɗaɓɓa hikma moodiɓɓe ɓooyma'en e mo ɗon numa habaru annabi'en.

²Kaŋko, o aynan ciftorki geccaaji dow yimɓe tedduɓe, o haɓdan faamugo bolle hikmaaje ɗe paamataake.

³O tefan sirriiji balndi, o laartan ko nyukki nder bolle hikma.

⁴O foti huuwgo ɗakki yimɓe tedduɓe: Ɓe tawan mo kommbi ardiiɓe lesdi. Kaŋko ɓe nelata lesdi njananndi ngam o woodi kirseeku booɗɗum e kalluɗum neɗɗo.

⁵Fajiri cub, o yahan kommbi Jawmiraawo tagɗo mo, ngam o toro yeeso Allah Ɓaŋiiɗo. Sey haa Allah tan o wolwanta, nden o tuuban aybeeji maako.

⁶O toroto Jawmiraawo, Allah Baawɗo ngam o yerda hokkugo mo hakkiilo. Nden o waawan kaŋko boo waazingo habaru hikma maako e bee yettugo Jawmiraawo nder tornde.

⁷Bana nii marɗo hikma ɗowata muuyo mum e anndal mum, o sukloto faamgo sirriiji Allah.

⁸Hikmaajo hollan jaŋngirde teddunde nde o jaŋngi, o jo'inan seyo maako nder Tawreeta alkawal Jawmiraawo.

⁹Yimɓe fuu mantan faamu hikmaajo, ɓe ngejjitittaa mo sam. Ciftorki maako wilataake, innde maako boo jooɗoto haa ragare yidere ɓiɓɓe Aadama.

¹⁰Yimɓe ngeccan hikma maako makka, jama'aare jobbititto mo.

¹¹To balɗe maako njuuti, o ɗalan ɓaawo maako innde teddunde nde ujineeje keɓaay. To wakkati maako yottake, o maayan o keƴnitiiɗo. Ko Allah waɗi fuu booɗɗum

¹²Nde mi numi, mi nanndi bee lewru nayɓinndu. Mi heewi bee numooji ɗi mi yiɗi waŋgingo.

¹³Keɗiteeɗam, ɓikkoy am yiɗaakoy, mawne bana wardi baŋnge maayo.

¹⁴Uure uureeŋga mbooɗŋga bana ɗaccere alud uurnde, laate bana lekki cuddaaki bee pinndiiji. Ngime hawtaade, ngette Jawmiraawo dow ko o waɗi.

¹⁵Mbaŋgine maŋngu maako, kellane mo bee maŋgtooje mon, ngimane mo bee fiygo garayaaru. Ndaa no on maŋgtirta mo:

¹⁶Ko Allah waɗi fuu wooɗi jamum! Ko o umri fuu ɗon waɗa bee wakkati muuɗum.

¹⁷Taa ƴam hoore ma: “Ɗume ɗo? Ngam ɗume ɗu'um?” Ngam ƴamɗe fuu njaabete bee wakkati maaje. Allah umri wolde woore tan, nden ndiyamji fuu mooɓti nokkuure woore: Dow wolde maako woore fahin, ɗi kawti haa keeleeje.

¹⁸O umri, kuuje fuu laati bana o yiɗi. Walaa kaɗanɗo kisndam ɗam o waddata.

¹⁹O ɗon yi'a ko yimɓe mbaɗata fuu, walaa ko luutata gite maako.

²⁰Gite maako ɗon ngi'a ko saali e ko laatoto fuu, walaa ko hayɗinta mo.

²¹Taa ƴam hoore ma: “Ɗume ɗo?” “Ɗume ɗum nafata?” Ngam o tagi koo ɗume fuu bee daliila.

²²Barka maako ɗon hebbina lesdi fuu bana paccam maayo Niil, bana ilam yarnata lesdi.

²³Non boo tikkere maako yottorto heefeerɓe bana en ngi'i saa'i o wartiri yayre harde non.

²⁴Laawol ngol o diidani hooliiɓe mo, lelataa, ammaa ngol heewi joote ngam luutooɓe umroore maako.

²⁵Diga fuɗɗam, Allah tagi kuuje booɗɗe ngam wooɗɓe e kuuje kalluɗe ngam halluɓe.

²⁶Ngam yeeɗgo, neɗɗo mari kuuje kaanduɗe ɗe'e: Ndiyam, yiite, njamndi e mannda, kuroori, alkamaari, kosam e njumri, inaboojam waato ndiyam inabohi, nebbam e limce.

²⁷Kuuje ɗe'e fuu ɗon nafa hooliiɓe Jawmiraawo, ammaa ɗon sarra heefeerɓe.

²⁸Keni feere tagaama ngam torrugo halluɓe, ɓernuki maɓɓe ɗon ɓesda sarru man fahin. Wakkati darŋgal, ɓe ɗon mbaŋgina doolɗinki maɓɓe, nden ɓe nde'itina tikkere tagɗo ɓe.

²⁹Yiite e mallimallooje, weelo e maayde tagaama kanje boo ngam torrugo halluɓe.

³⁰Nyi'e dabbaaji ladde, jahe, poosokje, kaafahi mbaranki heefeerɓe,

³¹ɗum fuu ɗum ɗon seyo ɗowtanaago umrooje ma. Haa duniyaaru, ɗum ɗon taaski ngam muuyo maako. To wakkati yottanake ɗum, ɗum ɗowtanto wolde maako tan.

³²Ɗum fuu ɗum laaɓɗum haa am diga fuɗɗam. Mi numi dow maajum, nden mi winndi ɗum fuu.

³³Ko Jawmiraawo waɗi fuu ɗum booɗɗum. To ɗum haani, o jo'itinan ko ŋakki.

³⁴Taa wi': “Ɗo tulli dow ɗo.” Ngam wakkati waran haa en anndita ɗum fuu ɗum booɗɗum.

³⁵Jonta kam ngime bee ɓernde mon fuu e bee sawtu ngam yettugo Jawmiraawo.