Read Fulfulded Sirasid 4 Bible Online

Sirasid 4 - Fulfulded bible

Sirasid 4

¹Ɓiŋngel am, taa salan laafuɗo ko wuurnata ɗum, taa reennu mo walaa koo ɗume.

²Taa ɗal dolɗo yaŋgito, taa mettin gonɗo nder laafere.

³Taa ɓesdan mo bone. To o mari haaje huunde, hokku mo, taa reennu mo.

⁴Taa fartu dookotooɗo ngam ɓillaare, taa sala yiidugo bee laafuɗo.

⁵Taa wiirnan gonɗo nder ɓillaare gite ma. Taa hokku mo bososel no o naalire.

⁶Ngam to o waɗi non daliila mettamɓeram, Allah, tagɗo mo, heɗititto do'a maako.

⁷Waɗ no ɓe ngiɗire haa wuro ma, laatoɗa ne'iiɗo haa ardiiɓe.

⁸Heɗita bojji laafuɗo, jaaba mo booɗɗum bee bolle ɗelemɗe.

⁹Rimɗin maccuɗo haa maccinanɗo mo. To a ɗon hiito, hiitora bilaa kulol.

¹⁰Laatoɗa bana baaba bee atiime'en e wallu daadiraaɓe maɓɓe bana gorko maɓɓe. Nii kam a laatoto bana ɓiɗɗo haa Allah Ɓaŋiiɗo, o yiɗete ɓuran daada ma. Hikma e jaŋngirde maaka

¹¹Hikma ɗon teddina ɓikkoy mum, ka aynan ɗaɓɓitanɓe ka.

¹²Yiɗgo hikma ɗum yiɗgo ngeendam. Mo dawi tefgo ka heɓan seyo ɗuuɗŋgo.

¹³Marɗo ka heɓan tedduŋgal. Haa o yehi fuu Jawmiraawo barkiɗinan mo.

¹⁴Huuwanango ka ɗum rewgo Allah gooto, Jawmiraawo yiɗi yiɗɓe ka.

¹⁵Keɗitiiɗo hikma laatoto kiitoowo adiliijo, ɗakkotirɗo bee maaka yeeɗan nder jam.

¹⁶To o hoolake ka, o maran jawdi maaka fuu, ruutu maako heɓan ɗum ɓaawo maako.

¹⁷Hikma fuɗɗiran bee laawol leliiŋgol seɗɗa, waddanan mo kulol maŋngol e ka jaŋnginan mo bee elto haa ka tammoro mo, ka foondan mo bee sarɗiiji.

¹⁸Ɓaawoɗon, ka lortoto haa laawol darnuŋgol, ka seynan mo e ka feftanan mo sirri maaka.

¹⁹Ammaa to o sotti dow laawol hikma, ka wudinan mo, ka ɗalan mo o do'o. Semteende gooŋgaare e fewre

²⁰Reen wakkatiiji booɗɗi ngam huuwgo, daayta e kalluɗum, taa semtu hoore maaɗa.

²¹Woodi cemtuɗum jahranɗum haa halleende, ammaa irin semteende feere waddante daraja e tedduŋgal.

²²Taa saatin hoore ma, ammaa boo taa cemtuɗum jaale.

²³Taa hul wolwugo wakkati haani mbolwa,

²⁴ngam hikma wurtoto nder boliiɗe ma e jaŋngirde nder ko mbi'ata.

²⁵Taa waaba gooŋga, semtu jaahilaare.

²⁶Walaa baawanɗo haɗgo maayo ilgo: An boo taa semtu anndititgo a waɗi aybe.

²⁷Taa accu humakiijo yaaɓa dow hoore ma, taa hul marɗo laamu.

²⁸Haɓ ngam gooŋga haa yotto maayde ma, Allah Jawmiraawo haɓan ngam ma.

²⁹Taa laata gorɗuɗo nder bolle ma, ammaa tampuɗo e baatɗo nder kuuɗe ma.

³⁰Taa laata mbarooga haa saare ma ammaa gertogal coofŋgal to a ɗon caka huuwanooɓe ma.

³¹Taa maɓɓitit juŋngo ma ngam hoo'ugo e taa maɓɓu ngo ngam lornugo.