Read Fulfulded Sirasid 40 Bible Online

Sirasid 40 - Fulfulded bible

Sirasid 40

¹Bone ɓii Aadamaajo Allah waɗani neɗɗo fuu torraaji naawɗi. O roondani ɓiɓɓe Aadama doŋngal tedduŋgal diga saa'i ɓe ngurti reedu daada maɓɓe haa yotti nyalde loraaki maɓɓe nder reedu lesdi, daada yimɓe fuu.

²Ko suklata numooji maɓɓe e ko hulnata ɓe, ko ɓe ndeenata bee kulol, ɗum nyalaade timmoode maɓɓe.

³Ɓe fuu maɓɓe ɓe ɗon nder sirla ngoota, diga laamiiɗo mo jooɗi dow tedduŋgal koromwal laamu mum haa yotti laafuɗo maako ɓurɗo leesgo jooɗiiɗo haa lesdi dow ndoondi,

⁴diga ɓorniiɗo ngapaleewol boɗeewol e meetaleewol haa ɓorniiɗo limce gonnjo.

⁵Fuu maɓɓe ɓe anndi tikkere e kaajal, jiiɓre e saklere, kulol maayde, jogaago dugun e kaɓe. Saa'i ɓe ɗon dow leeso ngam ɓe ciwto, ɗoyŋgol jemma findinan numooji maɓɓe.

⁶Nde ɓe keɓaay siwtaago, ɓe torrorto bana nder cukle caka nyalawma, nder saklere ɗoyŋgol maɓɓe, ɓe ngi'an nder koyɗol, bana sooje'en luutanɓe haɓre.

⁷To haa ɓe kisa, wakkati man ɓe pina nden ɓe kayɗina ngam ɓe kultori meere.

⁸Sababu gooto ɗon torra tagle fuu, diga dabba haa ɓiɓɓe Aadama, ammaa ɗum ɓuran naawgo nde joweeɗiɗi ngam halluɓe.

⁹Ɗum waade malla mbar-hoore, kaɓe, konuuji, sarruuji malla boo weelo, winnde malla bononnda.

¹⁰Kuuje kalluɗe ɗe'e fuu tagaama ngam luutanɓe Tawreeta. Ilam tufaana waɗi ngam daliila aybe maɓɓe.

¹¹Ko iwi haa lesdi loroto haa maari, ko iwi haa ndiyam loroto haa weendu. Timmoode sooynde adilaaku

¹²Caahuuji ɗi yimɓe ngaɗata bana rusiya haa hiitooɓe, sooynde adilaaku, ɗum fuu ɗum timman, ammaa hoolaare duumoto.

¹³Jawle ɗe halluɓe mooɓti fuu laatoto bana maayo ɓeeɓanŋgo. Ɗe caaloto bana felmaaŋgo maŋngo wakkati waabiliire.

¹⁴Kaa'e ceyoto ngam sarru maaje. Bana non luutanɓe Tawreeta kalkan.

¹⁵Ruutu yimɓe ɓe ngalaa diina rimataa lice ɗuuɗɗe. Soɓɓe ɓe'e mbaawataa waɗgo ɗaɗi.

¹⁶Huɗo mawnuko sera ndiyam e fomoonde maayo, aartan huɗooji goɗɗi ɗoofeego,

¹⁷ammaa mbooɗeeŋga laati bana aljanna marka barka. Ballal gaɗanaaŋgal laafuɓe yejjitittaake sam. Booɗɗum e ko ɓuri wooɗgo

¹⁸He'ango hoore mum e huuwugo kuugal, kanjum welnata joonde neɗɗo. Ammaa heɓgo ndesaari ɓuri ɗum seynugo.

¹⁹Margo ɓiɓɓe ɗuuɗɓe malla boo nyiɓugo berniwol, kanjum mawninta daraja neɗɗo, ammaa debbo marɗo hakkiilo ɓuri ɗum margo daraja.

²⁰Yimre e inaboojam seynan ɓernde, ammaa yiɗgo hikma ɓesdan seyo.

²¹Fuufordu e garayaaru ngoodi sonyo welŋgo, ammaa wolde woonde ɓuran welgo.

²²Mo'ere e ŋarol pottanan gite, ammaa haakooji kecci haa gese ɓuran ɗum fuu.

²³Goɗɗo yahan haa soobaajo mum ndego ndego, ammaa debbo bee gorum pottan tum.

²⁴Deerɗiraaɓe malla wallooɓe ngurtinte nder torra wakkati naawɗum, ammaa ko ndokkata laafuɓe ɓuri ɗum.

²⁵Margo kaŋŋeeri e cardi ittan numooji duniyaaru, ammaa yimɓe ɓuri yerdugo sawari mboondi.

²⁶To goɗɗo laatake diskuɗo malla cemmbiɗɗo, ɓernde maako waaloto, ammaa ko ɓuri ɗum fuu ɗum kulol Jawmiraawo. To non kam, walaa ko ŋakkanta en, en marataa haaje tefgo ballal goɗŋgal.

²⁷To a ɗon hula Jawmiraawo, a yi'an hoore ma bana a ɗon nder aljanna, a aynaaɗo ko ɓuri baawɗe goɗɗe fuu. Taa yeeɗ bana dookoowo

²⁸Ɓiŋngel am, taa yeeɗ bee rookaago ko nyaamata, ngam ndikka maaygo dow rookaago!

²⁹To goɗɗo suuni nyaamdu keeddiɗɗiraawo muuɗum, ngeendam mum he'aay ewneego ngeendam. O soɓnan hoore maako bee nyaamdu ndu o waawaay heɓgo bee hoore maako. Neɗɗo jaŋnguɗo e marɗo elto wooɗŋgo haɗan hoore mum waɗgo bana nii.

³⁰Ngam goɗɗo mo semtataa, nyaamdu ndu o rooki laatoto welndu haa hunnduko maako, ammaa nder reedu maako, ndu wulan bana yiite.