Read Fulfulded Sirasid 42 Bible Online

Sirasid 42 - Fulfulded bible

Sirasid 42

¹Cemte lornugo ko on nani e waŋgingo sirriiji. Cemte kuuje ɗe'e fuu, nden koo moy fuu yerdoto on. Taa cemte kuuje ɗe'e Ammaa taa cemte kuuje ɗe'e, taa waɗ geldol ngam waɗugo hakke:

²Taa semtu ɗowtanaago Tawreeta e alkawal Allah Ɓaŋiiɗo malla waɗgo adilaaku haa geddo Allah mo walaa aybe

³malla waɗgo lisaafi bee soobaajo malla bee ɗoftanɗo ma dow laawol malla senndugo ndonŋgu ma bee woɗɓe

⁴malla boo margo kuuje poondirɗe gooŋgaaje malla jaɓgo bote seɗɗa malla ɗuuɗɗum

⁵malla boo riba filu. Taa semtu boo eltugo ɓikkoy ma bee caatal malla boo ɓoccugo haa ƴiiƴam kuuwanoowo ma kalluɗo haa becce.

⁶To debbo ma karammbaaniijo malla wuyɓe ɗon nder saare ma, taa semtu suuɗgo kuuje ma.

⁷To a halfini goɗɗo ceede, lim ɗe, foondu ɗe. Taa semtu winndugo nyamaande nde tokkuɗa goɗɗo malla ko ɓe tokkete.

⁸Taa semtu eltugo paataaɗo malla humakiijo malla nayeejo aybinaaɗo ngam daakaareeku. Non kollirta yimɓe a laati goɗɗo ne'iiɗo, koo moy fuu yerdoto ma fakat.

⁹Margo ɓiɗɗo debbo laati ngam baaba mum fofoodu ɓillaaje koo o wi'aay ɗum. Daliila maako o ɓilloto haa o heɓataa ɗaanaago. To o nyuufiiɗo, o hultoran taa o saalo duuɓi teegal. To o te'aaɗo, o hulan taa gorko maako wanya mo.

¹⁰To o budurwaajo tawon, baaba hulan taa ɓe esta mo nden o reeda haa saare. To o ɗon nder saare goriiko, taa o waalda bee gorko feere. To o wondi bee maako teema o waawataa danygo ɓikkoy.

¹¹To ɓiɗɗo ma debbo semtataa, sey ɓesda aynugo mo. To naa non, joonde maako nyiddunde waddante kuudi konne'en maaɗa. Yimɓe berniwol mbolwan dow maako, ɓe mooɓtan daliila maako. Nden o semtinte caka jama'aare man.

¹²Taa ɓiɗɗo ma debbo holla yeeso mum haa goɗɗo, taa o nasta haa nokkuure rewɓe,

¹³ngam rewɓe accan halleende muuɗum'en wurta bana koowoowe ngurtorto diga limce. Maŋngu Tagɗo

¹⁴Ndikka nganyaandi gorko dow mbooɗeeŋga debbo! Debbo mo semtataa semtinan.

¹⁵Jonta mi yiɗi siftorgo ko Jawmiraawo waɗi fuu, mi yiɗi yeccugo ko mi yi'i. Bee bolle maako, Jawmiraawo tagi koo ɗume fuu. Ko o taƴnori fuu laatoto fodde muuyo maako.

¹⁶Bana naaŋge yaynanta kuuje fuu, non en ngi'an tedduŋgal Jawmiraawo nder ko o waɗi fuu.

¹⁷Koo malaa'ika'en Jawmiraawo mbaawataa yeccugo kuuɗe maako kayɗiniiɗe fuu. Jawmiraawo Baawɗo tabitini ɗe ngam haa duniyaaru yeeɗa yeeso maako bee tedduŋgal.

¹⁸Allah linyan haa luggeeŋga weendu e haa lugguɗum ɓerɗe, o waŋginan sirriiji maajum. Ɓaŋiiɗo anndi koo ɗume fuu. O linyan alaamaaji kollanɗi sannjuki wakkati.

¹⁹O anndinan ko saali e ko warata, o waŋginan sirriiji lugguɗi.

²⁰Walaa numo koo ngoye daɗata mo, walaa wolde koo ndeye suuɗoto yeeso maako.

²¹O jo'ini kuuɗe maako mawɗe ɗe hikma maako taaskino. O waylitittaako haa foroy, walaa ko o ɓesdata malla ko o ittata dow ko o waɗi fuu, o maraay boo haaje sawariijo koo gooto.

²²Ko o waɗi fuu, ɗum kayɗiniiɗum haa yotti feetere ɓurnde famɗugo nde goɗɗo waawaataa yi'ugo!

²³Ɗum fuu ɗum ɗon yeeɗa e duumoto haa foroy, ɗum ɗowtan fodde haaje.

²⁴Koo ɗume fuu bee ɗiɗaɓum mum, huunde nde'e yahda bee ndeya, walaa ko timmidaay.

²⁵Huunde fuu ɗon waŋgina saman huunde feere. Moy saftata laargo tedduŋgal maako?