Read Fulfulded Sirasid 43 Bible Online

Sirasid 43 - Fulfulded bible

Sirasid 43

¹Asama e naaŋge Asama wooɗi masin, senndoode maaga boo laaɓi! Ndaa ko wooɗi to en ɗon ngi'a ɗum:

²To naaŋge fuɗi, waŋgi, nge anndinan no kuuɗe Allah Ɓaŋiiɗo ɗe kayɗiniiɗe.

³Naaŋge caka nyalawma ɗon yoorna lesdi. Moy waawata daraago yeeso nguleeŋga maage?

⁴Gudiijo fuufan yiite ngam waɗgo kuugal mum, ammaa naaŋge wulanŋge kooseeje ɓuran nge semmbe nde tati. Nge sakkinan wifre yiite, nge saŋkitan yiitere maage, nge ɗon wumna.

⁵Ooho, Jawmiraawo o mawɗo! kaŋko tagi nge, kaŋko ɗowata yahdu maage. Lewru

⁶Lewru kayru boo, ndu wurtoto bee wakkati maaru, ndu tabitinan zamanuuji e anndinan wakkatiire saalotoonde.

⁷Tagdi ndi'i ɗon usta haa majjita, ɗon tinndina wakkatiiji juulɗe.

⁸Kayru hokkata lebbi inɗe maaji, to ndu ɗon waylito, ɗum kayɗiniiɗum. Ndu ɗon mawna, ndu laati annoora koode yaynanɗe haa asama. Koode

⁹Njayawri koode, ɗum ŋarol asama. Njayawri maaje ɗelkanndi nyeynan asama Jawmiraawo.

¹⁰Bee umroore Allah Ceniiɗo, ɗe ndaroto haa babal ngal o taƴnori, koo woore maaje ɗalataa babal maare. Booɗki duniyaaru

¹¹Laar timotimooŋgal, nden yettu tagɗo ngal. Wooɗgo maagal ɓuri semmbe.

¹²Ngal diidan haa asama hownde yaynannde. Juuɗe Jawmiraawo Ɓaŋiiɗo diidi ɗum.

¹³Bee umroore woore, o toɓnan mallimalloore. To o umri, o sakkinan ma'e.

¹⁴Ngam maajum keeleeje maako ɗon maɓɓito e duule boo ɗon caŋkito bana colli piiranɗi.

¹⁵Baawɗe Allah caatinan duule nden ɗe ceekan, ɗe laatoto mallimallooje.

¹⁶Nde Jawmiraawo waŋgi, kooseeje ndimmbi. To o yerdake ɗum, o umminan henndu fombina

¹⁷malla naargewol woyla malla boo henndu saatundu. O toɓnan mallimallooje daneeje bana piirol colli koɗanɗi, ɗe njippoto bana piirol baɓɓatti paljanɗi dow lesdi.

¹⁸Booɗki daneejum mallimallooje hayɗinan gite, nden ɓernde boo seyoto to ɗe ɗon toɓa bana nii.

¹⁹Mallimallooje ɗe Allah ɗon saŋkita dow lesdi nanndi bee mannda, peewol laatinan ɗe bana gi'e cewɗe.

²⁰To henndu feewndu woyla fuɗɗi wifgo, kattiniiɗam waɗan dow hoore ndiyam, ɗam ɗon yaaja dow weendu fuu, nden ɗam sudda ndu bana safaare.

²¹Henndu wulndu nyaamtan kooseeje, ndu yoornan lesdi. Bana yiite, ndu wulan haakooji e huɗooji fuu.

²²Ammaa duule keewɗe ndiyam ngaddan kurgun maajum law. Ɓaawo nguleeŋga man, saawawre waddan seyo.

²³Fodde nufaye maako, Allah jaali maayo maŋngo, nden waɗi duuɗe dow maago.

²⁴Yahanɓe bee koommbowal dow maago limti sababu maago e kiistaaji maɓɓe ɗon kayɗina en.

²⁵Haa maago woodi kuuje geete kayɗiniiɗe, booɗɗe, irin dabbaaji feere-feere e dabbaaji kulnanɗi nder ndiyam.

²⁶Barka Allah, nelaaɗo maako ɗon yotto jam, barka wolde maako, ko mari yoŋki fuu ɗon tabiti nder kawtal.

²⁷Min poti wolwugo ɗuuɗɗum, ammaa min timmidintaa ɗum. Min timminan bee wi'ugo: Ɗum fuu ɗum rowo Jawmiraawo.

²⁸Min pamɗi masin ngam teddingo mo, o mawɗo ɓurɗo ko o tagi fuu.

²⁹Jawmiraawo o kulniiɗo, o mawɗo, baawɗe maako ɗe kayɗiniiɗe.

³⁰Ngam teddingo Jawmiraawo, mbaŋgine maŋngu maako bana no on mbaawri fuu, ammaa no on mbolwiri fuu o ɓurdan mawnugo. Kawte semmbe mon fuu ngam maŋgtugo mo, taa paasite sam, ammaa on timmidintaa teddingo mo sam.

³¹Moy yi'i Jawmiraawo haa o wolwa dow maako? Moy waawan teddingo mo bana no haani?

³²Min ɗon ngi'a kuuɗe maako seɗɗa tan, ammaa woodi ɗuuɗɗe feere ɓurɗe mawnugo ɗe min ngi'ataa.

³³Jawmiraawo tagi koo ɗume fuu, o hokki boo hikma haa hooliiɓe mo.