Read Fulfulded Sirasid 45 Bible Online

Sirasid 45 - Fulfulded bible

Sirasid 45

¹giɗaaɗo Allah e giɗaaɗo yimɓe boo. Ɗum Muusa. To en ciftori mo sey en ngetta Allah.

²Jawmiraawo hokki mo tedduŋgal nannduŋgal bee ngal malaa'ika'en, o semmbiɗini mo yeeso konne'en Isra'iila.

³To Muusa anndini kuuje kayɗiniiɗe, Jawmiraawo neeɓataa waɗgo ɗe, o hokki mo baawɗe haa yeeso laamiiɗo. Ngam ummaatoore maako o hokki mo umrooje, nden o yi'ni mo tedduŋgal maako seɗɗa.

⁴Muusa laati goɗɗo adiliijo e de'iiɗo. Ngam maajum Allah seni mo, suɓi mo caka yimɓe feere fuu.

⁵O nanni mo sawtu maako, o ɗowi mo nder ruuldere tekkunde. Ton, yeeso maako, o hokki mo umrooje, Tawreeta ka yeeɗinan e hokkan faamu. Bana nii o ekkitiniri farillaaji alkawal haa ɓiɓɓe Yaakubu, koddirooje maako haa jama'aare Isra'iila. Haruna

⁶Jawmiraawo hokki Haruna hormu, o adiliijo nannduɗo bee Muusa, deerɗiiko, iwɗo lenyol Lewi.

⁷O haɓɓi bee maako alkawal duumiiŋgal. O halfini mo kuugal limanjo jama'aare. O hokki mo hayru bee ɓornugo mo limce booɗɗe, o ɓorni mo toggooje ɗelkanɗe booɗɗe.

⁸O ɓorni mo limce tuppitaaɗe, o jaagni mo bee alaamaaji baawɗe maako: Gajeere, dawrawol, meetaleewol e ɗancikiyel.

⁹O taarni les marabbaare maako bee pawne nannduɗe bee ɓenndalooje rummaanooje e bee leŋnguruuhon kaŋŋeeri ɗuuɗkon. Kon ɗon conƴa falannde Haruna fuu. Kon ɗon conƴa nder haykaliiru ngam anndingo Jawmiraawo ɗon caka jama'aare maako.

¹⁰Haruna ɗonno ɓorni toggoore seniinde nyootaande bee gaaraaji marɗi noone kaŋŋeeri, bee gaaraaji boɗeeji seɗɗa e boɗeeji coy nde tuppitoowo baawɗo tuppiti, dow toggoore man o ɓorni boo jiiba wiɓɓere marka Urim e Tumiina ngam hiitaago.

¹¹Jiiba wiɓɓere nyootaama bee kirtaani boɗeejum seɗɗa ka tuppitoowo tuppiti, nde ɗonno fawni bee kaa'e marɗe saman diidaaɗe bana diidol kaatummeeje, inɗe le'i Isra'iila sappo e ɗiɗi ɗe kaŋŋeeri ɗon ɓili, cannyoowo baawɗo ɓili ɗe.

¹²Pawne kaŋŋeeri ɗonno dow meetaleewol Haruna bee binndi ɗi'i: “Cenaaɗo ngam Jawmiraawo.” Ɗum alaama tedduka, ɗum kuugal booɗŋgal, ceynanŋgal gite, jaagnoore timmididnde.

¹³Diga Haruna waŋgaay, walaa gi'ɗo limce booɗɗe irin ɗe'e. Walaa goɗɗo feere meeɗi ɓornaago ɗe, sonaa ɓiɓɓe maako e taaniraaɓe maako, ngam ɓe ngoodi baawɗe ɓornaago ɗe haa foroy.

¹⁴Kirseteeɗi ɗi Haruna lii'oto nde ɗiɗi nyalaade fuu, haa foroy, sey ɗi ngule fuu.

¹⁵Muusa nastini mo nder kuugal bee rufango mo nebbam ceniiɗam dow hoore. Ɗum laati alkawal haa foroy, ngal duumoto bana asama ngam Haruna e ɓiɓɓe mum. Sey ɓe njaggana Jawmiraawo bana liman'en e ɓe mbarkiɗina yimɓe bee muuyo Allah.

¹⁶Jawmiraawo suɓi Haruna caka woɗɓe feere fuu ngam o lii'ana mo nguleteeŋga, alud e uurle ngam ciftorki e ngam o waɗana jama'aare maako alaama yaafuye hakkeeji.

¹⁷Allah hokki Haruna baawɗe fassitirgo umrooje ngam o waɗa kiita, ngam o faamtina Isra'iila muuyo maako, ngam laataago annoora jama'aare bee Tawreeta maako.

¹⁸Haa ladde hamaadaare, hoɗɓe kaaji mo, ngurŋgurti dow maako bee tikkere e ɓernuki. Ɗum Datan e Abiram e yimɓe muuɗum'en non boo yimɓe tokkiiɓe Kora.

¹⁹Jawmiraawo yi'i ɗum, o ɓerni masin, haa o tikkani ɓe bee waɗgo kaayeefiwol: Nguleeŋga yiite seniiŋge wuli ɓe e mbardi ɓe fuu maɓɓe.

²⁰Ammaa Allah hokki Haruna hayru fahin: O halfini mo, kaŋko e ɓiɓɓe maako, ɓenndalooje gese aartuɗe gaddaaɗe bana dokkal. Bana nii o fuɗɗiri hokkugo ɓe ko ɓe nyaama.

²¹Liman'en ɗonno nyaama ko ɓe lii'anto Jawmiraawo. Allah hokki ɗum haa Haruna e ɓiɓɓe maako.

²²Ammaa liman'en marataa lesdi halal nder lesdi Isra'iila. Kanjum feerotiri ɓe bee jama'aare, ɓe ngalaa geɗal sam, ngam Allah wi'i Haruna: “Min laati geɗal maaɗa, min woni risku ma”. Pinehas

²³Pinehas ɓiɗɗo Eli'azaaru, laati tataɓo margo tedduŋgal ngam o laati caatuɗo ngam o wirfi tedduŋgal Jawmiraawo. Bee ɓernde hebbinaande cuusal, o tikkani jama'aare tuurtunde e o heɓani Isra'iila yaafuye Jawmiraawo.

²⁴Ngam maajum, Jawmiraawo haɓɓi bee maako alkawal salaaman, o ardini mo haa haykaliiru seniindu, o laatini mo wakiiliijo jama'aare maako. O halfini kuugal limanjo mawɗo haa Pinehas e haa ɓiɓɓe maako haa foroy.

²⁵Jawmiraawo haɓɓi alkawal boo bee Daawuda, ɓiɗɗo Yessa mo lenyol Yahuuda. O iinani mo no laamu saaloto diga baaba haa ɓiŋngel, ammaa haa ɓiŋngel gootel tan! Ndonŋgu Haruna hokkaama haa lenyol maako fuu.

²⁶Onon ɓiɓɓe Haruna, mi ɗon toro Jawmiraawo o hebbina ɓerɗe mon bee hikma, ngam on laato adili'en to on ɗon kiito jama'aare maako, ngam taa hayruuji mon e tedduŋgal mon kalka nder garanɗum.