Read Fulfulded Sirasid 46 Bible Online

Sirasid 46 - Fulfulded bible

Sirasid 46

¹Yosuwa e Kaaleb Yosuwa ɓii Nuuna laati konoowo cuusɗo. O laati annabiijo ɓaawo Muusa. Bana maana innde maako, Jawmiraawo laatini mo kisnoowo mawɗo ngam jama'aare nde o suɓi. O jaali konne'en maare, o hokki jama'aare Isra'iila maral lesdi maare.

²Tedduŋgal maŋngal o heɓi yaake o ɓaŋgti juuɗe maako e o forti kaafahi maako ngam hongo berniiji!

³Walaa meeɗɗo laataago cuusɗo bana maako, kaŋko ardani konu Jawmiraawo.

⁴Bee umroore maako, naaŋge dari e nyalawmaare juuti cowi ɗiɗi.

⁵Saa'i konne'en maako taari mo, o tori Ɓaŋiiɗo baawɗo, Jawmiraawo gonɗo nder asama nani tornde maako: O toɓni mallimallooje bee semmbe.

⁶Yosuwa yaawi hongo konne'en, nden wili honooɓe maako nder jipporde Bayti-Horon. Ɗum kaanduɗum ummaatooje heefeerɓe waɗanɓe konu bee Jawmiraawo anndita balmi ɗi Yosuwa mari, ngam o ɗowtani umrooje Jawmiraawo baawɗo bee tiinaare.

⁷Zamanu Muusa, o waŋginino hoolaare maako bee Kaaleb ɓii Yefunna: Ɓe ndartanino jama'aare fuu ngam haɗgo nde tuurtango Jawmiraawo e ngam darnugo pelooje maare ɗe ngalaa gooŋga.

⁸Ɓe ɗiɗo ɓe kisi caka yimɓe ujine teemeɗɗe njoweego ngam nastingo jama'aare Jawmiraawo nder lesdi ndi ɓe tammi margo, lesdi ilnanndi kosam e njumri.

⁹Jawmiraawo hokki Kaaleb semmbe ɗuuɗɗo koo nder nayeewu maako ngam o jaɓta nokkuure hooseere nde ɓiɓɓe maako ndoni.

¹⁰Bana nii Isra'iila'en fuu ndaari no ɗum booɗɗum tokkaago umrooje Jawmiraawo. Alkaali'en

¹¹Sey min mbolwa boo dow alkaali'en: Koo moy caka maɓɓe laati manaaɗo deydey no o wa'i. Ɓerɗe maɓɓe accaay Jawmiraawo ngam rewgo labbi. Ciftoren ɓe e ngetten Jawmiraawo.

¹²Koo to i'e maɓɓe ɗon nder yenaande boo, sey Jawmiraawo heɓana ɓe tokkiiɓe! Sey ɓikkoy yimɓe tedduɓe ɓe'e keɓa manoore bana baabiraaɓe muuɗum'en!

¹³Samuyila, giɗaaɗo Jawmiraawo, annabiijo Jawmiraawo nyiɓi laamorde, o mooyti bee nebbam ardiiɓe bana laamiiɓe jama'aare maako.

¹⁴Bana kiitoowo ummaatoore, o huuwtiniri Tawreeta Jawmiraawo, Jawmiraawo ayni ɓiɓɓe Yaakubu.

¹⁵Daliila amaana maako, o annabiijo gooŋgaajo. Bolle maako kolli o daaroowo ke'iiɗo hooleego.

¹⁶Saa'i konne'en maako taari mo, o tori Jawmiraawo baawɗo bee lii'ango mo jawgel.

¹⁷Nden diga asama, Jawmiraawo waɗi hoolo felmaaŋgo. Bee dimmbannde lesdi, o waŋgini sawtu maako.

¹⁸O nattini ardiiɓe konne'en, waato yerima'en Filisti'en fuu.

¹⁹Hiddeko o maaya, o wolwi yeeso Jawmiraawo e yeeso laamiiɗo ni'i: “Mi meeɗaay hoo'ugo jawdi goɗɗo, koo paɗe maako.” Walaa mo feli mo.

²⁰Nde o ɗon daande maayde, o wolwi bana annabiijo nde o anndini laamiiɗo no o maayrata. Sawtu maako iwi diga lugguɗum lesdi, o ɗonno wolwa ko Jawmiraawo wi'i mo ngam wilugo hakkeeji jama'aare.