Read Fulfulded Sirasid 47 Bible Online

Sirasid 47 - Fulfulded bible

Sirasid 47

¹Annabi Natan e laamiiɗo Daawuda. Ɓaawo Samuyila, Natan laati annabiijo wakkati Daawuda.

²Saa'i kirseteendi ngam kawtal Allah bee yimɓe, ɓe ittan ɓellere, geɗal booɗŋgal. Bana nii ɓe koo'i Daawuda caka Isra'iila'en.

³Haɓgo bee barooɗe e paaɗaaji laati ngam maako fijirde hoynde bana naŋngugo njawdiri malla jawgel pamarel.

⁴Yaake o derkeejo tawon, o mbari goɗɗo maapinndiijo, bana nii o waatori kuudi ɗi Filisti'en kuɗino jama'aare Isra'iila. O waɗi piwlol maako bee hayre, o mbari Goliyat, maapinndiijo mawnitiiɗo.

⁵O torino Jawmiraawo Ɓaŋiiɗo, mo semmbiɗini juŋngo maako nyaamo ngam mbargo konoowo e ngam semmbiɗingo jama'aare maako.

⁶Ngam maajum ɓe teddini mo, ɓe mbi'i o mbarino konne'en ujineeje. Ɓe maŋgti mo. Ɓe ngetti Jawmiraawo e ɓe ndokki mo meetaleewol laamu

⁷ngam o nattini konne'en haa bakkeeje fuu, o meeriɗini Filisti'en konne'en maako, o yewi baawɗe maɓɓe haa foroy.

⁸Nder ko o waɗi fuu, Daawuda maŋgti Allah Ceniiɗo, Ɓaŋiiɗo, o anndini tedduŋgal maako. O sukli hoore maako ngam hawtugo jabuura e yiɗgo Tagɗo mo.

⁹O jo'ini mooɓre yimooɓe ngam yimɓe fuu nana gime belɗe yeeso hirsirde.

¹⁰O samɗini juulɗe e wakkatiiji marɗi saman ngam maŋgtugo innde Jawmiraawo seniinde diga fajira cub, nder suudu seniindu, ɓe nana gime belɗe.

¹¹Jawmiraawo wili aybeeji Daawuda, o semmbiɗini laamu maako haa foroy. O hokki mo baawɗe laamiiɓe, o semmbiɗini laamu maako haa Urusaliima. Suleymaanu

¹²Ɓaawo Daawuda, ɓiŋngel maako marɗo anndal jamum hooci pellel maako. Barka Daawuda, Allah hokki mo salaaman e jam.

¹³Salaaman ɗonno wakkati laamu Suleymaanu. Jawmiraawo hokki mo de'eende haa keeri lesdi maako fuu. Suleymaanu mahani Jawmiraawo haykaliiru seniindu, o taaskani mo nokkuure seniinde haa foroy.

¹⁴Suleymaanu, a hikmaajo diga nderkaaku maaɗa! A keewɗo anndal bana maayo paccuŋgo.

¹⁵Anndal ma heewi duniyaaru fuu e bolle ma lugguɗe meemi kuuje fuu.

¹⁶A laatino tedduɗo koo haa duuɗe daayiiɗe, ɓe ngiɗno ma ngam jam salaaman ngadduɗa.

¹⁷Duniyaaru fuu yerdi gime, balndi, kiitaaji e jaawaabuuji ma fuu.

¹⁸Ɓe ndokki ma innde fodde innde Allah teddunde mo seni Isra'iila. Koyɗum a mooɓtiri kaŋŋeeri bana mooɓtugo njamndi ndaneeri, koyɗum a mooɓtiri cardi bana mooɓtugo njamndi mboɗeeri.

¹⁹Ammaa a hokki hoore ma haa rewɓe, bee maajum a laati maccuɗo maɓɓe.

²⁰A waɗi wuneere dow tedduŋgal ma, nden a tunwi ngal ɓiɓɓe maaɗa boo bee waddugo tikkere Jawmiraawo dow maɓɓe. Ɓe micciti nginnaaku ma masin!

²¹Laamu ma senndaama ɗiɗi: Laamu wooru tuurtiindu iwi gal lenyol Efrayim.

²²Ammaa Jawmiraawo wudinaay mbooɗeeŋga muuɗum, o accaay bolle maako kalka sam. O ɗalaay lenyol cuɓaaɗo maako wila, o yerdaaki asŋgol giɗaaɗo maako halka. Bana no o ɗali yeeɗɓe caka jama'aare Yaakubu, non boo o hokki Daawuda tokkiiɓe iwɓe danygol maako. Robo'am e Yerobo'am

²³Nde Suleymaanu maayi, o tawtoyi kaakiraaɓe maako nder yenaande. O acci ɓaawo maako gooto caka ɓiɓɓe maako keewɗo faataare e cooyɗo faamu: Robo'am mo tuurtini jama'aare maako. Yerobo'am, ɓii Nebat, kaŋko boo daayni le'i woyla lesdi diga laawol booɗŋgol, o yerɓi yimɓe laamu Efrayim nder laawol aybe.

²⁴Yimɓe ɓe'e mbaɗi aybeeji ɗuuɗɗi haa ɓe ndahaama diga lesdi maɓɓe.

²⁵Ɓe nasti huuwgo kuuɗe kalluɗe haa ɗe pooɗani ko'e maɓɓe torra.