Read Fulfulded Sirasid 48 Bible Online

Sirasid 48 - Fulfulded bible

Sirasid 48

¹Eliya Nden annabi Eliya waŋgi, o nannduɗo bee yiite. Wolde maako ɗonno wula bana jamre yiite.

²O waddani Isra'iila weelo saatuŋgo. O yiɗno Jawmiraawo masin, bee tiinaare o famɗitini jama'aare haa yimɓe seɗɗa tan lutti.

³Fodde umroore Jawmiraawo, o darni iyeende, o toɓni yiite diga asama nde tati.

⁴Hey Eliya! No a laatori tedduɗo bee kaayeefiiji ɗi ngaɗɗa? Moy nder mawnitaare mum fotinan hoore mum bee ma?

⁵Bee umroore Allah Ɓaŋiiɗo, a ummitini maayɗo, a wurtini mo diga joonde maayɓe.

⁶A nastini laamiiɓe nder maayde, a leesni mawɓe diga leeso nyawu haa yenaande.

⁷Haa Sina dow hooseere Horeb, a nani pelooje ɗe Jawmiraawo feli ma e o ta'i kiita caatuka.

⁸A mooyti laamiiɓe ngam haa pelle woɗɓe feere e annabi'en ngam tokkitingo kuuɗe ma.

⁹A eeŋgaama haa asama nder duluuru ɗemɗe yiite dow moota pucci ɗi yiite.

¹⁰Fodde ko winnda nder Deftere, a taaski ngam nyannde nde nde'itinta tikkere Allah hiddeko nde fetta. A sulhindiran baaba e ɓiyum, a jo'itinan le'i Isra'iila fuu.

¹¹Barka laatanto yi'anɓe ma e ɓen yiide Allah ɗon ayna nder ɗoyŋgol maayde! Minin boo, fakat min ngeeɗitan! Elisa

¹²Nde Eliya majji nder duluuru, Ruuhu maako nasti Elisa. Nder joonde maako fuu, Elisa diwnaay koo yeeso mawɗo gooto, walaa baawɗo doolugo mo.

¹³Walaa ko laati caɗɗum yeeso maako. Koo nde o maayɗo, ɓanndu maako ɗonno bee baawɗe annabiijo.

¹⁴Saa'i o geeto, o waɗi kaayeefiiji, koo nde o maayɗo boo, o huuwi kuuɗe kayɗiniiɗe.

¹⁵Bee non fuu, jama'aare Isra'iila tuubanaay Allah, nde faasitaay huuwgo halleende, hiddeko nde dahe daayiiɗum e lesdi maare e nde saŋkite nder duniyaaru fuu. Sonaa yimɓe seɗɗa tan lutti ngam daliila Yahuuda e laamiiɗo gooto nder lenyol Daawuda.

¹⁶Laamiiɓe lesdi Yahuuda woɗɓe kuuwi ko fottani Allah, ammaa woɗɓe feere ɓesdi waɗgo aybe dow aybe. Laamiiɗo Hezekiya e annabi Esaaya

¹⁷Hezekiya semmbiɗini laamorde muuɗum, o waddi ndiyam haa yotti Urusaliima: O wurwi tapaare, o mahi keeleeje ndiyam.

¹⁸Saa'i maako, laamiiɗo Sennakerib wari hongo Urusaliima. O neli balloowo maako mo ɓaŋgti juŋngo ngam hongo Siyona bee mawnitaare.

¹⁹Haa Urusaliima, ɓerɗe e juuɗe puɗɗi diwnugo, fuu maɓɓe ɓe maati torra bana debbo saa'i luuwe mum.

²⁰Ammaa ɓe tori Jawmiraawo keewɗo mbooɗeeŋga, ɓe ɓaŋgti juuɗe maɓɓe heedi maako, diga asama, Allah Ceniiɗo jaabi ɓe law, hisni ɓe bee juuɗe Esaaya.

²¹Jawmiraawo honi Assiriya'en, malaa'ikaajo maako mbardi ɓe.

²²Ngam Hezekiya ɗonno huuwa ko fottani Jawmiraawo, o tokki laawol Daawuda, kaaka maako bee tiinaare bana no Esaaya, annabiijo mawɗo baɗanɗo annabaakuuji laaɓɗi tinndiniri mo.

²³Saa'i maajum, Esaaya sakitini naaŋge, nden o juttini balɗe laamiiɗo.

²⁴Bee baawɗe Ruuhu, o yi'i wakkatiiji ragareeji hiddeko ɗum laato, o semmbiɗini sunaaɓe daliila Siyona.

²⁵O holli ko tammi yottaago hidde timmoode duniyaaru, o tinndini kuuje cuuɗiiɗe hidde ɗe laato.