Read Fulfulded Sirasid 50 Bible Online

Sirasid 50 - Fulfulded bible

Sirasid 50

¹Simon hooreejo liman'en Ɗum hooreejo liman'en Simon ɓii Oniyas wo'itini suudu Jawmiraawo saa'i o geeto. Zamanu maako, o semmbiɗini haykaliiru.

²O jo'ini caɓɓaaje mahol ɗiɗaɓol e caɓɓaaje towɗe taariiɗe haykaliiru.

³Saa'i maako, ɓe ngasi heeleewo ndiyam, ngo foti bee ngo haykaliiru hiindu.

⁴O haɓdi ngam hisnugo jama'aare maako diga sarru, o semmbiɗini berniwol ngam faddaago to kippol waɗi.

⁵Tedduŋgal maako ɗonno waŋga saa'i o ɗonno wurto nokkuure seniinde e o ɗonno taaro haykaliiru!

⁶Ɓe mbi'anno ɗum horre baɓɓol yaynannde caka duule malla ɗum leelewal wakkati juulde

⁷malla boo naaŋge yaynanŋge haykaliiru Allah Ɓaŋiiɗo malla timotimooŋgal ɗelkotooŋgal nder duule.

⁸O booɗɗono bana pinndi mboɗeeri yaake seeto malla bana pinndiiji puɗanɗi sera maayo malla boo bana haako hecco wakkati ceeɗu.

⁹Yimɓe ɗonno ciftora mo bana tamre uurnde wulannde dow hirsirde malla boo taasawo kaŋŋeeri fawnaaŋgo bee irin luuluuje fuu.

¹⁰Ɓe mbi'anno ɗum jaytunhi keewki ɓenndalooje malla boo lekki makki ki ɗon tiito asama.

¹¹Saa'i o ɓornino limce hooreejo liman'en, saa'i o waɗi pawne maako booɗɗe, nden o ɗonno wa'o haa hirsirde nder haykaliiru, o ɗonno hebbina dalde haykaliiru fuu bee tedduŋgal.

¹²Nde o ɗonno dari yeeso huɓɓirde hirsirde, liman'en ɗonno ngaddana mo geɗal kirseteeɗi. Deerɗiraaɓe maako nder kuugal ɗonno taari mo bana meetaleewol, bana leɗɗe mawɗe ɗe Liban, bana hownde leɗɗe dibinooje.

¹³Liman'en iwɓe haa lenyol Haruna, fuu maɓɓe ɓe ɗonno bee limce maɓɓe booɗɗe, ɓe ɗonno njogi dokkal ngam Jawmiraawo yeeso jama'aare Isra'iila fuu.

¹⁴Simon ɗonno timmina dewal haa babal hirsirde bee jo'ingo dokke ngam Allah Ɓaŋiiɗo, Jawmiraawo Baawɗo.

¹⁵O ɗonno hoo'a jardugel, o ɗonno rufa inaboojam, iwɗam haa inabooje les hirsirde bana uurdi marndi uureeŋga mbooɗŋga ngam Ɓaŋiiɗo, laamiiɗo duniyaaru fuu.

¹⁶Nden liman'en puɗɗa gookaali, ɓe puufa luwe njamndi, ɗe ngurtina sonyo maŋngo ngam haa jama'aare siftora Allah Ɓaŋiiɗo.

¹⁷Law mooɓre fuu hawtaade tugga koppi haa lesdi ngam ɓe cujidana Jawmiraawo Baawɗo, Ɓaŋiiɗo.

¹⁸Nden yimɓe fuu ɓaŋgta gime, yimre welnde e ɗelemnde ɗonno hebbina haykaliiru.

¹⁹Mooɓre ɗonno toro Jawmiraawo, Ɓaŋiiɗo, ɓe ɗonno nder tornde yeeso Allah Booɗɗo haa timmoode dewal ngam Jawmiraawo.

²⁰Nden Simon jippo hirsirde bee fortugo juuɗe dow mooɓre Isra'iila, bee hunnduko mum o ɗonno hokka nde barka Jawmiraawo. O ɗonno bee hormu ewnaago innde seniinde.

²¹Mooɓre tuuro haa tiinde meema lesdi ngam jaɓgo barka Ɓaŋiiɗo. Tornde barkiɗinannde

²²Ngette jonta Allah duniyaaru fuu, o ɗon waɗa koo toy kuuɗe mawɗe. O mawnini en diga danyeeki men e o ɗon woonani en fodde mbooɗeeŋga maako.

²³O seyna en haa keɓen salaaman fodde ngeendam meeɗen bana ɓooyma nder Isra'iila!

²⁴Sey mbooɗeeŋga maako wonda bee meeɗen tum e nga hisna en balɗe ngeendam meeɗen fuu! Ummaatooje tati wanyaaɗe

²⁵Woodi ummaatooje ɗiɗi nganymi, woodi tataɓre boo, nde nanndaay bee ummaatoore:

²⁶Ɗum yimɓe lesdi Se'ir tawon, ɓaawoɗon Filisti'en, nden faataaɓe wonɓe haa Sikem. Binndoowo e deftere mum

²⁷Ɗum Yeesu, ɓii Sirak e taaniraawo El'aazaru mo Urusaliima, binnduɗo nder deftere nde'e ekkitinol marŋgol faamu e anndal. O ɗon sammina bana iyeende hikma ka heewi ɓernde maako.

²⁸Barka laatanto lortanɗo haa ekkitinolji ɗi'i bilaa somgo e joganɗo ɗi ngam o laato hikmaajo!

²⁹To o ɗon huuwtinira ɗi, o maran semmbe jaalaago torra fuu, ngam o ɗowtanan Jawmiraawo nde weeti fuu. Haa hulɓe Allah, o ɗon hokka hikma. Barka woodani Jawmiraawo haa foroy. Aamiina. Aamiina.