Read Fulfulded Sirasid 51 Bible Online

Sirasid 51 - Fulfulded bible

Sirasid 51

¹Tornde Yeesu ɓii Sirak Jawmiraawo, mi yiɗi yettugo ma, an Laamiiɗo. Yaa Allah, mi yiɗi maŋgtugo ma, an Kisnoowo yam. An ngettanmi

²ngam a laatino jiŋngoowo am, a waddani yam ballal ma, a hisni yam maayde, a hisni yam diga tuuforgol kalluŋgol ngol tuflema'en e fewooɓe ngaɗani yam. Yeeso wulluɓe yam, a walli yam.

³A holli mbooɗeeŋga ma maŋnga, a koolniiɗo dow innde ma woonde, a hisni yam diga yiɗɓe naŋngugo e mbargo yam, yiɗɓe nyaamgo yam mukkannde woore tan. A hisni yam diga sarruuji ɗuuɗɗi ɗi tampinino yam

⁴e diga hownde yiite ɗeɗɗannde yam e ɗemɗe yiite ɗe mi huɓɓaayno.

⁵A daɗni yam diga luggeeŋga reedu joonde maayɓe, diga numooji kalluɗi e bolle pewe

⁶e kuri ɗemŋgal kalluŋgal. Mi ɗonno daande maayde, kosŋgal am gootal ɗonno nder joonde maayɓe,

⁷konne'en am ɗonno taari yam e mi walaano balloowo. Mi ɗaɓɓi goɗɗo ngam o wallammi, ammaa walaa sam!

⁸Nden, Jawmiraawo, mi siftori a Booɗɗo, a kuuwoowo mbooɗeeŋga diga foroy, a hisnan hoolotooɓe ma, a hisnan ɓe diga torraaji halluɓe.

⁹Diga lesdi ndi'i mi ɓaŋgti tornde am heedi ma, mi tori ma a hisna yam diga maayde.

¹⁰Mi wooki: “Jawmiraawo, an woni Baabiraawo am, taa ɗalam nder nyalaade torra, nde mi walaa ballal yeeso mawnitiiɓe.

¹¹Mi faasitittaa maŋgtugo ma, mi yettete bee gime am.” Nden a nani tornde am.

¹²A hisni yam nattere, a hisni yam diga wakkatiire sarru. Ngam maajum mi waɗante yettoore mawnde, mi maŋgtete, Jawmiraawo, mi anndina mbooɗeeŋga nga ngaɗɗanɗa yam. Dow laawol ɗaɓɓititgo hikma

¹³Saa'i mi derkeejono, hidde mi dilla waancuru, mi nyukkaay ngam ɗaɓɓugo hikma bee toraago Allah.

¹⁴Yeeso haykaliiru, mi waɗi tornde ngam mi heɓa ka, nden mi ɗaɓɓi ka haa yotti ragare ngeendam am.

¹⁵Nde ka mawni bana inabooje ɓenndirta, ka laati seeɓoore seyo am. Mi fuɗɗi tokkaago laawol booɗŋgol diga mi pamaro, mi tokki ka bee tiinaare.

¹⁶Mi tiini wakkati seɗɗa ngam heɗitaago ka, mi jaɓi ka, mi heɓi ekkitinol marŋgol saman.

¹⁷Daliila hikma maajum, mi ɓesdi yahgo yeeso yeeso, ngam maajum mi ɗon yetta mo hokki yam hikma.

¹⁸Mi waɗi anniya huuwtinirgo ka, mi ɗaɓɓi mbooɗeeŋga e mi miccitittaako ɗum.

¹⁹Mi waɗi haɓre ngam jogaago hikma, mi tiini huuwtinirgo Tawreeta Allah. Ɓurna fuu, mi tori, juuɗe ɓaŋgtaaɗe heedi asama, mi wi'i mi yeebino hikma.

²⁰Ammaa mi huuciti gal hikma, mi laɓɓini hoore am, mi heɓi ka. Kaŋka hokki yam faamu diga fuɗɗam. Non kadi, walaa no ka ɗalirammi haa foroy.

²¹Mi yelino hawtugo bee maaka, nden mi heɓi jawdi marndi saman man.

²²Ngam o warjoto yam, Jawmiraawo hokki yam no mi wolwira booɗɗum e mi ɗon huuwtinira dokkal nga'al ngam maŋgtugo mo.

²³Ɓaditeeɗam, onon faataaɓe! Njooɗe haa jaŋngirde Hikma.

²⁴Koni mbi'oton ɗum ŋakkani on, asee on ɗon ngelo ka?

²⁵Mi ɗon wi'a ɗum bee semmbe: “Keɓe hikma bilaa ceede.

²⁶Ture daande mon haa les daraja maaka ngam keɓon jaŋngirde maaka. On tawan ka baŋnge mooɗon.

²⁷Ndaare bee gite mon, mi somaay hiddeko mi heɓa siwtaare luggunde.

²⁸Njaɓe jaŋngirde am, ndokke nde hormu e barka maare, on keɓan kaŋŋeeri ɗuuɗndi.”

²⁹Ceyore mbooɗeeŋga Jawmiraawo, taa cemte maŋgtugo mo.

³⁰Kuuwe kuuɗe mon hiddeko wakkati saalo, Jawmiraawo warjoto on nde o taƴnori fuu.