Read Fulfulded Sirasid 6 Bible Online

Sirasid 6 - Fulfulded bible

Sirasid 6

¹Taa laata konneejo soobaajo ma, ngam nannanti kalluki waddan toskaare e feloore. Kanjum heɓata hakkeejo marɗo kunnduɗe ɗiɗi.

²Taa accu suunooji ma ɗowe, to non waɗi boo, semmbe ma sampititte pacal-pacal,

³a wartan bana leggal jorŋgal, ngal haako fuu saamdi e walaa ɓenndalooje.

⁴Jarriboore hallunde yahran goɗɗo haa halkere e ɗum seynan wanywanyɓe maako. Soobiraaɓe gooŋga'en e fewooɓe

⁵Bee wolde woonde en keɓan sooba'en ɗuuɗɓe, kalimaayel belŋgel wallan yimɓe nastotirgo.

⁶Koo ɗuuɗɓe koofni boo, taa jaɓ sawari sey haa gooto nder ujineere.

⁷Foondu goɗɗo hiddeko ngartira mo soobaajo ma, taa yaaw hoolaago mo.

⁸Woodi soobiraaɓe fodde haaje, ammaa to a ɗon nder ɓillaare koo gooto a yi'ataa.

⁹Woodi soobaajo laatotooɗo konneejo haa o semtine, o fefta ko carwootirɗon.

¹⁰Woodi soobaajo nyaamdoowo bee ma, ammaa o doggete to a ɗon nder ɓillaare.

¹¹Nder wakkati keɓal ma, o laati gootum bee ma, o ardanto maa huuwananɓe ma.

¹²Ammaa to masiibo heɓi ma, o laatoto konneejo ma, a meetataa yi'go mo fahin.

¹³Daayta bee konne'en maaɗa, hakkilan hoore ma dow wi'anɓe ɓe sooba'en ma.

¹⁴Soobaajo koolniiɗo ɗon bana ɗuworde. Mo tawi mo, tawi ndesaari.

¹⁵Saman soobaajo koolniiɗo walaa keerol, daraja maako foondataake.

¹⁶O ɗon bana lekki dokkanki ngeendam ki Jawmiraawo hokkata haa ɗowtaniiɓe mo.

¹⁷Kulɗo Jawmiraawo anndan suɓugo sooba'en mum, ngam bana no o wa'i, non soobaajo maako boo laatoto. Ekkitaago hikma

¹⁸Ɓiŋngel am, accu ɓe njaŋngine wakkati nderkaaku ma. Nden a heɓan hikma haa yotto nayeeku ma.

¹⁹Ɓadita hikma bana demoowo malla caakoowo, reen jawdi maaka bee munyal. Ngam a yaran bone seɗɗa bee remgo ka, ɓaawo man a naftorto ɓenndalooje maaka.

²⁰Hikma saɗani yimɓe ɓe keɓaay jaŋngirde maaka, mo walaa hakkiilo tiinataako heɓgo ka.

²¹Ka nanndi bana hayre foondannde semmbe maako, ammaa o neeɓataa sakkingo ka.

²²Hikma, bana innde maaka wi'i, waŋgan haa yimɓe seɗɗa tan.

²³Ɓiŋngel am, nan e jaɓ ko mi wi'ete, taa sala ko mi sarwoto ma.

²⁴Waatu kosɗe haa callallu hikma, nastin daande ma haa kaɓɓirgal maaka.

²⁵Rimndu doŋngal maaka dow balawal ma, taa ɓernu wondugo bee kaɓɓorli maaka.

²⁶Ɓadita ka bee ɓernde ma fuu e bee semmbe ma fuu, tokka dow laawol maaka.

²⁷Tef ka, heɓtu ka, ka waŋgante. To a jogake ka, taa yoftu ka.

²⁸Haa ragare, a siwtoto les maaka. Bone ma laatoto seyo ngam maaɗa.

²⁹Callalluuji maaka haa kosɗe ma laatante faddoore semmbiɗnde, kaɓɓirgal haa nastinta daande ma laatante koɗel neɗɗaaku.

³⁰Kaɓɓirgal maaka, ɗum pawne kaŋŋeeri e callalluuji maaka boo, ɗum meetaleeji marɗi saman.

³¹A ɓornoto ɗum bana limce juulde, bana hufnoore marnde saman.

³²Ɓiŋngel am, to a yiɗi, a heɓan jaŋngirde. To a tiinake, a laatoto baawɗo.

³³To a ɗon heɗito, a ekkititto. To a de'uɗo, a laatoto hikmaajo.

³⁴Yiila ndotti'en, heɗita hikma maɓɓe.

³⁵Nan bolle Allah, taa ɗal balndol hikma fuu.

³⁶To a laari kakkilɗo, yaawɗa haa maako diga fajiri, tokka yahgo haa yolnde maako.

³⁷Num boliiɗe Jawmiraawo, suklanan umrooje maako koo ndeye. O semmbiɗinan ɓernde ma, o hokkete hikma bana ngiɗɗa.