Read Fulfulded Sirasid 8 Bible Online

Sirasid 8 - Fulfulded bible

Sirasid 8

¹Hakkiilo Taa haɓ bee marɗo baawɗe, ngam taa a do'o nder juuɗe maako.

²Taa hiitotir bee diskuɗo: Ngam a fotata bee maako, o ɓurete. Kaŋŋeeri majjini yimɓe ɗuuɗɓe, ndi jaali ɓerɗe laamiiɓe woɗɓe.

³Taa jokkir bee mo naŋgtataa ɗemŋgal mum, ngam taa a walla mo nder ko o waɗata.

⁴Taa waɗ guusa bee laakiijo, ngam o foti huɗgo kaakiraaɓe ma.

⁵Taa fel anndititɗo aybe mum, siftor no en fuu en aybuɓe.

⁶Taa wanyu nayeejo boo, ngam woɗɓe caka men puɗɗi naywugo.

⁷Taa seyora maayde goɗɗo. Siftor no enen fuu, en tammi maaygo.

⁸Taa sala jaŋngirde marɓe hikma, lortu ndego dow balndi maɓɓe. Ngam haa maɓɓe, en keɓan elto wooɗŋgo, en ekkititto huuwango marɓe daraja.

⁹Taa sala ekkitinol marɓe anndal, ngam kamɓe fuu ɓe keɓri ɗum haa saaro'en maɓɓe. Gal maɓɓe en ekkititto faamgo kuuje e jaabaago haa wakkati nde fotti.

¹⁰Taa ummin ɓerɗe buuɗaaje, ɗum huɓɓugo yiite tammiiŋge wulgo ma.

¹¹Taa harkidid bee mo semtataa, ngam teema o yahrete haa mbi'a laakiri.

¹²Taa hokku nyamaande haa ɓurɗo ma semmbe, to a hokki mo boo, waɗ bana ceede man kalki.

¹³Taa fiy dammaana ngam ceede ɓurɗe ma semmbe. To a waɗi ɗum boo, taaska yoɓgo ɗe.

¹⁴Taa hiitotir bee kiitoowo, daraja maako sannjan kiita man.

¹⁵Taa yahdu jahaaŋgal bee gorɗuɗo ngam teema o ɓesdante saɗirmaaji. Kaŋko o waɗan ko warani mo haa hoore e ginnaaku maako yahrete haa maayde.

¹⁶Taa jokkir bee sababuujo, taa ɗoftu mo haa babal biccitiiŋgal, ngam walaa ko haɗata mo mbargo hoore, o mbarete haa a walaa balloowo.

¹⁷Taa waɗ sawari bee humakiijo, ngam o waawataa sigaago sirri mon.

¹⁸Taa huuwru bee cuuɗcuuɗka yeeso koɗo, ngam a anndaa noy o waɗata.

¹⁹Taa maɓɓitit ɓernde ma haa koo moy: Walaa mo yettete!