Read Fulfulded Sirasid 9 Bible Online

Sirasid 9 - Fulfulded bible

Sirasid 9

¹Anndugo jooɗodaago bee rewɓe To a yiɗi debbo ma, taa sek mo, to naa non a ekkitinan mo waɗgo kalluɗum.

²Taa hokku hoore ma fuu haa debbo ngam taa o mare.

³Taa ɓadita ajabaajo, to naa non a nastan tuuforli maako.

⁴Taa neeɓ bee debbo bammbaaɗo marɗo mayaba ngam taa a nasta nder rikici maako.

⁵Taa neeɓnu gite ma dow budurwaajo, ngam ɗum waddante caɗeele ɗuuɗɗe.

⁶Taa hokku hoore ma haa daakaare'en, ngam taa jawdi fuu majja.

⁷Taa yiilnu gite ma dow laabi berniwol fuu, taa yaaɓ haa babe perwuɗe.

⁸Sottin gite ma dow debbo ŋarniiɗo, ngam ŋarol maako goɗɗo feere jeyi. Ŋarol debbo halki worɓe ɗuuɗɓe, ngol huɓɓan yoomre maɓɓe bana yiite.

⁹Taa jaɓ jooɗodaago bee debbo te'aaɗo malla yardugo bee maako dow taabal, ngam taa a muuya mo e nder jarriboore ma, a diirto a halka. Anndugo jooɗodaago bee worɓe

¹⁰Taa seedu bee soobaajo ma ɓooymaajo ngam soobaajo keso fotataa bee maako. Soobaajo keso bana inaboojam kesam wa'i: Ɗam ɓuran welgo to ɗam hiiɗi.

¹¹Taa suuna jaalorgal hakke'en: Ngam a anndaa ko reenata ɓe haa ragare maɓɓe.

¹²Taa yerda jaalorgal yedduɓe. Siftor: Haa duniyaaru maa ɓe hiiteteeɓe.

¹³Daaytu mbaroowo ko'e: A hisan kulol maayde. To a ɓaditi bee gooto maɓɓe, taa waɗ aybe, to naa non o ittete yoŋki. Anndu a ɗon yaha caka tuuforli, a ɗon waanca dow mahi taariiɗi berniwol.

¹⁴To heɓoto, tef fottugo bee bannda'en e jaɓ sawari marɓe hikma.

¹⁵Yeewtidid bee marɓe hakkiilo, ngeewta ma daro dow umrooje Allah Ɓaŋiiɗo tan.

¹⁶Suɓtu yimɓe ɓe a nyaamdata bee maɓɓe caka ɗowtantooɓe umrooje! Kulol Jawmiraawo laato seyo ma. Ardiiɓe ngomna

¹⁷Haa marɓe sanaa'aaji, yimɓe ɗon ngerda kuuɗe juuɗe maɓɓe. Ammaa haa ardiiɗo ngomna, ɗum hikma boliiɗe maako.

¹⁸Ɗuuɗa-haalaajo ɓe kulan ɗum haa wuro mum, ɓe nganyan goɗɗo bollolo.