Read Fulfulded Esaaya 1 Bible Online

Esaaya 1 - Fulfulded bible

Esaaya 1

¹Ndaa wahayu mo Esaaya ɓii Amoosa heɓi dow Yahuuda e Urusaliima nder zamanu Uzziya e Yotam e Akas e Hezekiya, laamiiɓe Yahuuda.

²“Asamanji, nane! Lesdi, heɗita! Ngam min Jawmiraawo wolwata. Mi mawnini ɓikkoy, mi wuurni koy, ammaa koy tuurtani yam.

³Ngaari anndi marɗo ɗum, wamnde boo anndi ngaɓaare haa jawmiire nyaamnata ɗum. Ammaa koo ko Isra'iila anndi, ummaatoore am faamataa sam.”

⁴Bone laatanto ummaatoore hakke'en nde'e, ummaatoore heewnde zunuuba, asŋgol halluɓe, ɓiɓɓe wonniiɓe! Ɓe ngudini Jawmiraawo, ɓe njawi Ceniiɗo Isra'iila, ɓe ndokkiti mo ɓaawo.

⁵Haa toy ngiɗɗon goɗɗo fiya on fahin, onon tokkitinanɓe tuurtol? Hoore fuu heewi elooɗi, ɓernde fuu ɗon nder naawɗum.

⁶Teppere haa hoore fuu yamɗaay sam, sey naawne e ɓoostanɗe e kuuduuje. Ɗe lallaaka, ɗe kaɓɓaaka, ɗe ndufaaka nebbam.

⁷Lesdi mon laatake ladde meere, yiite nyaami berniiji mon. Jananɓe ɗon mbonna lesdi mon haa yeeso mooɗon, ɗum nattere nde jananɓe ukkani on.

⁸Urusaliima warti bana daŋki nder ngesa inabooje, bana daŋgel nder ngesa kurciije, bana berniwol kippaaŋgol.

⁹To Jawmiraawo honooɓe asama luttanaayno en yeeɗɓe seɗɗa, en laatotono bana Sodoma, en nanndanno bee Gomorra.

¹⁰Nane wolde Jawmiraawo, onon ardiiɓe Sodoma[1]! Heɗita tawreeta Allah, an Gomorra!

¹¹Jawmiraawo wi'i: “Ko yaali yam bee ɗuuɗeeŋga kirsaaɗi mon? Mi safti jawɗi gulaaɗi e ɓellere nyalbi. Mi seyortaako ƴiiƴam ga'i kalhali e baali e jawɗi be'i.

¹²Nde ngaroton sujidango yam, moy umri on yaaɓugo dalde saare am?

¹³Acce waddugo dokke hayamje. Uurle uurooje ɗe nyidduɗe yeeso am. Juulɗe lewru hesru e nyalɗe ciwtorɗe e mooɓtuki mooɓorle — min kam, mi waawataa munyango ɗum, ngam on mbonni ɗum fuu bee hakkeeji mon.

¹⁴Mi wanyi juulɗe mon hakkunde lebbi e juulɗe mon goɗɗe fuu. Ɗe laatani yam doŋngal, mi somi roondaago ngal.

¹⁵To on mbeeɗi juuɗe mooɗon ngam do'aago, mi wiirnan gite am ngam taa mi yi'a on. Koo to on ɗuɗɗini do'aaje, mi nanataa ngam juuɗe mooɗon keewi ƴiiƴam.

¹⁶Ngiiwe, laɓɓine ko'e mooɗon! Cottine kuuɗe mon kalluɗe yeeso am, acce waɗugo kalluɗum!

¹⁷Ekkite waɗugo ko wooɗi, ɗaɓɓite ko fotti! Ndartine toonyooɓe, kiitane atiimeejo bee gooŋga, njiŋnge rewɓe yurumɓe!”

¹⁸“Kadi, ngare haa kujjotiren” — non Jawmiraawo wi'i. “Koo to hakkeeji mooɗon mbooji coy, ɗi ndanwan bana mallimallooje. To ɗi mbooji bana ƴiiƴam, ɗi ndanwan bana hottollo.

¹⁹To on njaɓi ɗowtanaago yam, on nyaaman ɓurɗum wooɗugo haa lesdi.

²⁰Ammaa to on calake, on tuurti, nden kam kaafahi nyaaman on.” Min Jawmiraawo wi'i ɗum.

²¹Kayto! Berniwol koolaaŋgol naane laati bana debbo daakaareejo. Naane adili'en njooɗi ton, ammaa jonta sey mbarooɓe ko'e.

²²Cardi ma laatake njamndi meere, inaboojam ma mbooɗɗam jilliraama ndiyam.

²³Ardiiɓe ma laatake tuurtooɓe, ɓe sooba'en wuyɓe. Ɓe fuu ɓe ngiɗi caahuuji rusiya[2], ɓe ɗon ɗaɓɓa ngeenaari zammba. Ɓe njiŋngataa atiime'en fodde adilaaku, ɓe cuklantaako haala rewɓe yurumɓe.

²⁴Ngam maajum, ndaa nii Allah, Jawmiraawo honooɓe asama, Baawɗo Isra'iila wi'i: “Kay! Mi feewtinan ɓernde am dow wanyɓe yam, mi waatoto konne'en am.

²⁵An Urusaliima, juŋngo am teddan dow maaɗa. Mi ɓolinte, mi laɓɓinte, mi wurtinan tuundi ma fuu.

²⁶Mi wartiran hiitooɓe bana naane, sarwooɓe boo bana ɓooyma. Ɓaawoɗon ɓe ewnete Berniwol-Adilaaku e Wuro-Hoolaare.”

²⁷To Siyona waɗi kiita ngooŋɗuka, ngol hisnete. To yimɓe maagol tuubi, mbaɗi ko fottanta adilaaku, ɓe kisneteeɓe.

²⁸Ammaa tuurtooɓe e hakke'en, masiibo ukkanto ɓe, accuɓe Jawmiraawo boo nattan.

²⁹On cemtan ngam on ndewi labbi les leɗɗe mawɗe, on keewan semteende daliila jarne labbi ɗe cuɓɗon.

³⁰On laatoto bana leɗɗe mawɗe ɗe haako maaje ɗayli, bana jarne ɗe ngalaa ndiyam.

³¹Bana hottollo wuldata to fe'tere yiite meemi ko, bana non semmbiɗɓe nattirta ngam daliila kuuɗe maɓɓe kalluɗe. Walaa kaɗanɗo halkere.