Read Fulfulded Esaaya 11 Bible Online

Esaaya 11 - Fulfulded bible

Esaaya 11

¹Laamu laamiiɓe ɓe asŋgol Daawuda ɓii Yessa ittaama. Ammaa bana lisal keccal fuɗirta diga tuggere lekki, bana non laamiiɗo keso mo asŋgol Yessa waŋgirta.

²Ruuhu Jawmiraawo ɗon dow maako, ruuhu hikma e hakkiilo, ruuhu sawari e cuusal, ruuhu anndal e kulol Jawmiraawo.

³O seyorto kulol Jawmiraawo. O hiitataako fodde giiɗe gite maako, o ta'ataa kiita fodde nanɗe noppi maako.

⁴Ammaa o hiitanto laafuɓe fodde adilaaku, o hiitoto leesɓe lesdi kiita ngooŋɗuka. O halkan duniyaaru bee wolde wurtiinde diga hunnduko maako, bee poofɗe hunnduko maako o mbaran kalluɗo.

⁵Adilaaku e gooŋgaaku laatoto taadorgol maako.

⁶Nden saafaandu wondan bee bortel, paaɗaawu waaloto kommbi jawgel, nyalahe e baroogel ngondan, ɓiŋngel duran ɗum.

⁷Nagge e ɓoodu[13] ndurdan, ɓikkoy maajum mbaaldoto nokkuure woore. Mbarooga nyaaman huɗo bana ngaari.

⁸Ɓiŋngel musinanŋgel fijan haa ngaska culanndi, entaaŋgel fortan juŋngo mum haa ngaska foosokre.

⁹Walaa kalluɗum, walaa bonnuki dow hooseere Allah seniinde fuu, ngam duniyaaru heewan anndal Jawmiraawo bana mbeela heewirta ndiyamji.

¹⁰Nyalaade man laamiiɗo keso mo asŋgol Yessa go daroto bana tuutawal ngam jama'aaje. Ummaatooje ɗaɓɓitan mo, nokkuure siwtaago maako laatoto teddunde.

¹¹Nyalaade man Jawmiraawo fortan juŋngo muuɗum ɗiɗaɓre fahin, haa o rimɗina luttuɓe yimɓe maako, luttanɓe haa Assuura e Misra e Paturus e Etiyopiya e Elam e Sine'ar e Hamat e duuɗe mbeela.

¹²O ɓaŋgtan tuutawal ngam ummaatooje, o hawtan riiwaaɓe Isra'iila, o mooɓtan saŋkitiiɓe Yahuuda diga alkibilaaji nayi fuu.

¹³Kaajal Efrayim sottan, konne'en Yahuuda nattinteeɓe. Efrayim meetataa haajugo Yahuuda, Yahuuda boo meetataa ɓillugo Efrayim.

¹⁴Ummaatooje ɗiɗi ɗe'e ukkanto Filisti'en haa hiirnaaŋge, ɓe njaɓtan mardi yimɓe fuunaaŋge. Juuɗe maɓɓe ngaran dow Edoom e Mo'ab, yimɓe Ammoon leesanan ɓe.

¹⁵Jawmiraawo ɓeeɓnan lonyoodu mbeela Misra, ruggoto maayo Efratis. Bee nguleeŋga poofɗe maako o seekan ngo, ngo senndititto maahoy njoweeɗiɗoy, haa goɗɗo eero koy bee paɗe.

¹⁶Bana non laawol jaasŋgol ɗon ngam luttuɓe yimɓe maako, luttanɓe haa Assuura, bana ngol laatorani Isra'iila'en ɓooyma, saa'i gurtaaki maɓɓe e Misra.