Read Fulfulded Esaaya 15 Bible Online

Esaaya 15 - Fulfulded bible

Esaaya 15

¹Ndaa koŋngol dow Mo'ab. Jemmaare woore ngol natti. Ar-Mo'ab wilaama non boo Kir-Mo'ab.

²Jooɗiiɓe haa Bayit e haa Dibon ɗon mba'o haa nokkuuje towɗe ngam woyugo ton. Yimɓe Mo'ab ɗon mboya berniiji Nebo e Medeba. Ko'e maɓɓe fuu pemmbaama, bakkuɗe fuu laɓaama.

³Dow laabi Mo'ab ɓe ɗon ɓorno limce buhuuje. Dow soorooji e haa babe fuu, ɓe ɗon mboya, ɓe ɗon ilna gonɗi.

⁴Jooɗiiɓe haa Hesbon e El'ale ɗon ngooka, hoolo maɓɓe ɗon yotto Yahas. Ngam maajum jogiiɓe balmi nder Mo'ab ɗon koola, ɓerɗe maɓɓe ɗon ndiwna nder maɓɓe.

⁵Ɓernde am ɗon woya dow lesdi Mo'ab. Ngam dogguɓe maari ɗon ndogga haa yotti Co'ar e Egilat-Silisiya. Ɓe ɗon mba'o wa'orde Luhit bee bojji. Dow laawol Horonayim ɓe ɗon mbaɗa gookaali daliila halkere.

⁶Ndiyamji Nimrim ɓeeɓi. Huɗo ɗayli, haako jinni, walaa keccum sam.

⁷Ngam maajum ɓe njahran jawdi maɓɓe e ndesaaje maɓɓe haa lekki kommbi maayo.

⁸Gookaali ɗon nane haa keeri Mo'ab fuu. Bojji maɓɓe ɗon njotto Egilayim e Biir-Elim.

⁹Ndiyamji Dimoon keewi ƴiiƴam, ngam Allah ukkanan Dimoon sarru ngoɗŋgu: Mbarooga hippoto daɗɓe Mo'ab e luttuɓe nder lesdi.